নুংশিবা চিঠি কয়াগী মরক্তা ‘ইমাদা ইবা চিঠি’ শৈরেং লাইরিক অসিদা মীৎয়েং অমা

Homeআর্টস

নুংশিবা চিঠি কয়াগী মরক্তা ‘ইমাদা ইবা চিঠি’ শৈরেং লাইরিক অসিদা মীৎয়েং অমা

লাইরিক্কী মমিংঃ ইমাদা ইবা চিঠি                                                                                                                       

লাইরিক্কী মমিংঃ ইমাদা ইবা চিঠি                                                                                                                                                                                                                  অইবীঃ খোইস্নাম ওংবী বীরলা                                                                                                                                                                                                                অফোংবাঃ অশাংবা কমিউনিকেসন, ইম্ফাল, ২০২১                                                                                                                                                                                            লাইরিক্কী মখলঃ শৈরেং                                                                                                                                                                                                                                  লাইরিক লমায় মশিংঃ ১৩০ লাইরিক্কী মমলঃ ২০০/-

ইমা হায়নদং পল্লকপদা পুকনিং নৌরোইদবা মচা কনা লৈরমগনি। পোকনফম লমদমবু নুংশিদবা লৈরম্লোই মালেমদা কনাসু। অদুনা ‘ইমা’ হায়রিবা অসিদা নুংশিনা ‘শোনলি তত্তনা/ মৈতৈ পোকপী ইমা/ নঙগী কোলোয় মিংলেনতবু/ মীনুংশি চাওবী নহাক্কী/ অমত্তা ওইবগী লংলানা/চেৎনা কীরিবা কীশিসে/ তৎনা থানবা য়াদ্রবা/ঈ মরিগী নুংশিবা/ নচা ঐগী থম্মোয়সিদা।’ লমদম তাম্না লৈরগসু হেন্না পুকনিং নুংশিবা পোকহল্লি। মতম লৈবা খিবিক্তা মপান মনিপুরদা খুন্দা লৈতাদুনা লৈরিবা মীওইশিংনা ইমা লৈবাক মনিপুরবু কয়াগী মতিক নুংশিজবগে হায়বদু শৈরেং অসিদা মমি ফজনা তারি।

নুপী ওইবীশিংগী অৱাবদি নুপীশিংতনা হেন্না উশিল্লি অমদি খঙই। অপিকপা ইমুং, অচৌবা ইমুং, কাংলুপ ফুরুপ, লাইনিং লাইশোল মান্নদবা মীওই কয়ানা খুন্দাদুনা লৈবা লমদমশিংদা ইতৎ তত্তনা তাই মুকনবগী, য়ান্নদবগী, চারৌ মরৌনবগী। আইদেন্তিতি হায়বসিসু অমুক লেংদনা অমদি ঙাকনা থমদবা য়াদে। মরমদি মান্নদবা মরক্তা মালেমসিদা ফজবা নুংশিবা হায়বদু য়াওদুনা লৈরি। য়ুমথংনবনা ফনা য়াম্না খৎনবা হৌরবসু কনাগুম্বা কায়জা লাঞ্জদবা মীওইশিংদি মী খৎনবা তন্দুনা অমদি মদুনা করিসু পুন্সিদা নুংঙাইবা অমদি শান্তি পুরক্তে হায়বসি খঙদুনা লেম্না লৈথোকপা য়াওদবা নত্তে। লম মচেৎ খরগী খৎ-চৈনদুনা শিবদা পুবা য়ারোইদবা লম খরগী খন্দুনা করিসু মীকারুদবা পূকচেল চাওবা মীসু হৌজিক মতমসিদা অদুমক লৈতবা নত্তে। অদুবু চুম্না হৌজরিবা তলা পামেল নাচুম্বা অদুদা য়োৎকি শিংজংনা অসুম য়ানশিল্লকলবদি লেপ্না অদুম হায়থখিবা তাবনি ফনা য়াম্না লাঞ্জদ্রবসু। মসিনি হৌজীক মতমদা ইতৎ তত্তনা থেংনবা চাওখৎলবা লৈকায়দা, শহরদা অমদি খুঙ্গংদা থেংনরিবা মী মশেল মরক্কি লান অমা হায়রগদি।  অদুবু নুংশিবগী চম্লবা থম্মোয়, অমকপা য়াওদ্রবা ৱাখল মীওইবা জাতিবু অমত্তা ওইনা উবা ঙম্বা মীওইশিংসু ঙসিগী মালেমসিদা মরাং কায়না লৈরি। মখোয়না পীরি হিংবগী আশা, পুন্সিগী ফজবা শক্তমশিং। পুন্সি অমসুং খুনাই অমনা মীওইবদা মতম খুদিং পরা অমদি তম্লি লেপ্তনা। মসি উশিনবা খঙজিনবা অমদি তঙাই ফদে হায়না খল্লি।

অইবী খোইস্নাম ওংবী বীরলা ১৯৭৮তা ত্রিপুরাগী মৈতৈ খুল অমা ওইরিবা গৌরনগর খোৱাইদা পোকখি। ত্রিপুরাদা লৈবা মনিপুরী নুপী অইবীশিংগী মরক্তা মহাক্কীসু ফিদা অমা চাওনা কন্দুনা লাক্লি। ২০১২তা অহানবা শৈরেং লাইরিক ‘প্রলয়গী খূৎশেক্তা’ হায়না মিংথোনবা শৈরেং লাইরিক অমা ফোংখ্রে। হৌজীক হৌজীক আগরতলা নুপীশিংগী লুপ ‘তখেল তেঙবাং লূপ’কী সেক্রেটরি ওইনা থৌ পুরি অমসুং থা অহুম অহুমগী চেফোং ‘তখেল্লৈ  নাচোম’গী এদিটরসু ওইরি। মহাকনা খুনাইসিদা লৌরিবা থৌদাং অমদি মনিপুরী খোরিলোল চাওখৎনবা হোৎরিবা অসিবু শকখঙবা ওইনা মনিপুরী সাহিত্য পরিষদ ত্রিপুরানা ‘লৈহাও তেম্বী মেমোরিয়াল লিটরেরি এৱার্দ, ২০১৩ পীখি অমসুং ঈপাক ফিল্মস মনিপুরনা ‘অখাং কনবী মৈতৈ লৈমা লাইফতাইম এচিফমেণ্ট এৱার্দ’সু পীদুনা ইকায়খুম্নবা উৎখি।

অইবী অসিনা মহাক্কী মিংথোল ওইরিবা শৈরেং অসিদা নুংদা ফুমদুনা চেলহল্লিবা ইচেলদি নুংশিবনি, ধর্ম্মানি, ঙাকপিহৈবদুনি। অৱাবা, নুংঙাইতবা, পেন্দবা, কাংলুপ ফুরুপকি মুকনবা পুম্নমক লাকয়েল তাইশিনবদি পাম্লি শংবানবা অতিয়াগী ফজরবা ফিজোলদা অমতা ওইনা মীওইববু। অপিকপা ফুরুপপু অচৌবা কাংলূপ্না মখোয়গী ফীবান্নুংদা য়োমশিন্নবা তৌবা থৌরাং মহাকনা পামদে। মীওইবা ওইনা পুন্না লৈনিংই। অদুবু করাম চাওরবা মীওঈবগী লীচৎ অদুবুদি মহাক তুমিন্না য়েংদুনা লৈবা ঙমদে অদুনা পেঞ্জদনা পাউদম্লি ইরিবা চিঠি অসিদা, মহূ পানবা জিবশিংনা তানশিল্লক্লে/ মীনম্বা শারমচৎ চৎপশিংনা/ শেৎনা শেৎনা চারক্লিবা/ অকোইবগী শম্বল লানশিল্লক্তুনা/ ঙসিদি ফনা য়াম্না চংশিল্লক্লে/ মপু পান্দবগুম্না, শরৌ লাং থাক্তুনা/ পীতৎ পাতৎপা মীমান্নদ্রবা নচাশিং/ অহিং চাক্তাবশিংগী খয়াত্তা/ নুংতি নুমিৎ ফাদোক তারিবা/ পীদোন্নরবা ৱারীসে/ করম্না পাউদমসিগে ইমা।।”  অচুম্বা হায়বা লাইৱা অদুদি মতম খুদিং তুংইঞ্জবা পাম্লি মরমদি মসিদা লৈরি মীওইবগী অথোইবা মগুনসু অদুনা পালেম অপোকপীনা তাকপীরম্বা লাইৱা অদু কাওবা লৈতে অইবীনাধর্ম্মদি হৌজীকসু মাংদ্রি/ ইমানা তম্বিবা পুন্সিগী লায়ৱা/ চেৎনা থম্মি নচাশিংনা/ ৱাশক কয়াগী ৱারেপ ঙাক্তুনা/ ধর্ম্মগী লানফমদা/ মোয়বুংগী নুংশিবা মখোল ঙায়দুনা

শৈরেং ৪৪পুল্লগা শেম্লিবা লাইরিক অসিদা ‘ইমা’ হায়বা শৈরেং অসিনা হৌদুনা ‘ঐখোয়গী লাইবক কনানা লেপকনি’হায়বা শৈরেং অসিনা লোয়শিল্লি। মসিদা য়েক্লিবসি মনিপুরনি। ৱাহং কয়া হংলি অইবীনা লমদম অসিদা লৈরিবা মশাগী ওইজবতা থিরিবা মচাশিংদা মনিপুর ইমাগী। ঐখোয় মশেল মরক্তা লিংজেল মান্নদবগী তারিবা অপিকপা পুকচেল অসিবু য়েংদুনা লৈবা ঙমজদে অদুনা মকা ফোংনা হায়দোকনিংলকই অদুনা হংলক্লি, ‘অমগা অমগা ৱাখল তান্নদ্রবা/ অমনা হায়বদা অমনা তাবিদ্রবা লমদমসিদা/ কনানা লেপহৌগনি ঐখোয়গী লাইবক’ ইমা নচাশিং ঙসিদি লমমুকনরে…’ অইবীনা তেংথারি ৱাখল থেল্লবা মচাশিংগীদমক। অদুগা নাওথি শাজরি ইমা মহাক্কী মফমদা, ৱাদবসু ঙমদে। নিংদোল পোম্লি মণিপুর ইমাগীদমক অদুনা হায়রক্লি, ‘মপা মপু মীরাইবগা/ মায়পাকপগী করি ইতিহাস ইগনি!/ হায়য়ু তাসি ইমা/ লমদমসিদা ঐখোয়গী লাইবক কনানা লেপকনি!’

ইমা হায়নদং পল্লকপদা পুকনিং নৌরোইদবা মচা কনা লৈরমগনি। পোকনফম লমদমবু নুংশিদবা লৈরম্লোই মালেমদা কনাসু। অদুনা ‘ইমা’ হায়রিবা অসিদা নুংশিনা ‘শোনলি তত্তনা/ মৈতৈ পোকপী ইমা/ নঙগী কোলোয় মিংলেনতবু/ মীনুংশি চাওবী নহাক্কী/ অমত্তা ওইবগী লংলানা/চেৎনা কীরিবা কীশিসে/ তৎনা থানবা য়াদ্রবা/ঈ মরিগী নুংশিবা/ নচা ঐগী থম্মোয়সিদা।’ লমদম তাম্না লৈরগসু হেন্না পুকনিং নুংশিবা পোকহল্লি। মতম লৈবা খিবিক্তা মপান মনিপুরদা খুন্দা লৈতাদুনা লৈরিবা মীওইশিংনা ইমা লৈবাক মনিপুরবু কয়াগী মতিক নুংশিজবগে হায়বদু শৈরেং অসিদা মমি ফজনা তারি।

অহল লমনশিং, মপু মবেন্না মচা মশুশিংদা পীরম্বা পাউতাক পাউজেল কয়া ঙসিগী মীরোলনা কয়া থৌশানরক্তবা অমদি চাওখৎপগী মিংদা হোংলক্লিবা লমচৎ শাজৎ, থকসি খাসি থৌগল্লোন পুম্নমক অসিগী খঞ্জবদা ৱাদবা ঙমদে অইবীনা অদুনা হায়রক্লি, “ইমাগী পাউতাক কাওনরে” হায়না মিংথোনবা শৈরেং অসিদা, “মেনশিন্নবা কনা লৈতরে/ মচেৎতানা কিন্থরক্লে/ পুরেল পুধৌগী লীক্লমসে…খ্বাংজেৎ মচী লাংলম্বা/ ঙসিদি উবা ফংলক্তরে” ইচম চম্বা ৱাহৈনা ৱাহন্থোক লৈনা শাফু লৈনা ফোংদোকপা হৈবগী হৈ শিংবা অদুমদি শৈরেং অয়াম্বদা থেংনৈ।

মীওইবনা চাওখৎপগী মিংদা মহৌশা অকোয়বদা লৈরিবা উমং ৱামং, চীং পাৎ তুরেল কয়াদা লেপ্তনা লান্দাদুনা লাকপনা অঙকপা ফংনা হোংলক্লিবা অমদি কায়থারক্লিবা মহৌশাগী শক্তম  মসিগীদমক্তা অইবনা তেংথাজরি মহাক্কী শৈরেং “মহৌশা” হায়বসিদা। অইবশিংনা হেন্না সেন্সিতিব ওইবা অমদি হেন্না উশিনগল্লি হায়বসিসু অইবীনা খুনাই অসিদা থোক্লিবা থৌদোক ৱাথোক কয়াগী মতাংদা ইরক্লিবা অমদি অশোয়বা, অরানবা কয়াবু চুম্থোকনিংবগী ফোংদোক্লিবা ৱাহৈশিংনা লেংদ্রবা খুদমনি। অহোংবা, অওনবা নাইবা পুন্সি খোঙচৎকী লেপ্তনা চৎলিবা লম্বী পরিংদা থেংনরিবা নুংশিবা মিকুপ, কাওঙমদ্রবা থৌদোক, অৱাবা পুংফম, খাংঙমদ্রবা চৈনাখোল, পাঊখূম লৈত্রবা পুন্সিগী ৱাহংশিং পুম্নমক মহাক্কি শৈরেংগী কেনভাস্তা মমি তাদনা তোক্তে।

নুংশিবগী মিকুপশিংগী মরক্তা কুমওন খুদিং পুদুনা লাক্লিবা শাজিবু চৈরাওবগী নুংশিরবা শক্তমশিং, হিয়াংগৈ থানা লাকপদা কুমজা খুদিং পাংথোক্লিবা নীংঙোল চাক্কৌবা কাওবা লৈতে অইবীনা। অদুনা শৈরেং ওইনা থোক্লকই চৈরাওবগী নুংশিরবা নুমিৎকী শক্তমশিং। নীংঙোল ওইবীশিংনা খৌরাংনা মতম খুদিং ঙায়জদুনা লৈজবা নুমিৎ নীংঙোল চাক্কৌবা শৈথাদুনা ইরক্লি, “ অৱা – নুংঙাই মরক্তা/ চহী কূমজা খুদিং/ য়াইফ পাউজেল পুদুনা/ লাকই মৈতৈ নিঙোল চাক্কৌবা।। য়ুম্নাক শগৈ হোংলবী/ নিংঙোলগী শম্লাং খোমগৎলবী/ হরাও মিনোক তমজরি…”

অইবীনা শিজিন্নরিবা ৱাহৈশিং য়াম্না থোৎ – মেংবা অমদি ইচম চম্বা ৱাহৈনা লাইরিক অসিবু পারুবা অপাবশিংগী থম্মোয়বু পেনহল্লি, নুংশিবা ফাওহল্লি অমদি ৱাখল খলহল্লি। খোরিরোলগী পান্দমসু অপাবশিংদা ৱাখল খলহনবদুনি অমদি করিগুম্বা লম্বী অমদা লান্না চৎলুরবশিংদা অচূম্বা লম্বী অমা তাকপদুনি, মঙাল অমা পীবদুনি খ্বাইদগী মরু ওইরিবদি। হীরম অসোমদা য়েংবদা শৈরেং লাইরিক অসি মায় পাক্লে হায়না লৌবা য়াই।

COMMENTS

WORDPRESS: 0
DISQUS: