নীংশিংবগী লাতম অমদা থাঙ তাবু হিংহল্লম্বা মীয়ামগী ওজা হেরামোৎওজা হেরামোৎ

Homeৱাখল্লোন

নীংশিংবগী লাতম অমদা থাঙ তাবু হিংহল্লম্বা মীয়ামগী ওজা হেরামোৎ

মরমদম মজাতিগী আর্ত ফোর্ম অমবু হিংহন্নবা কন্না হোৎনরকখিবা শিন্তাকপুরেল হেরামোৎকী হোৎনজমনবু অমুক হেন্না শকখঙলকখি ভারত সরকারনা। অদুনা ২০০৮-০৯গী লেমজন

তোংব্রম অমরজিৎ

মরমদম মজাতিগী আর্ত ফোর্ম অমবু হিংহন্নবা কন্না হোৎনরকখিবা শিন্তাকপুরেল হেরামোৎকী হোৎনজমনবু অমুক হেন্না শকখঙলকখি ভারত সরকারনা। অদুনা ২০০৮-০৯গী লেমজনিংঙাই ওইরবা সঙ্গিত নাটক একাদেমি এৱার্দ পীদুনা ইকায়খুম্নখি। লৈবাকনা শকখঙলবা শিন্তাকপুরেল অমা ওইরবসু পেন্থোকপা হায়বদুদি লৈখিদে। পুন্সি নুমিদাংৱাইরম ওইরক্লবা মাংগী লম্বীনা তেনশিল্লক্লবা তুংগী লম্বীনা শাংহৌরবা মতমদুদা ফাওবা ইপানাৎ ইপুনাৎকি মহৈ অসিবু হীংগৎহন্দুনা মৈতৈগী ময়েং তারুরবা মাংফদ্রবা মহৈ অসিবু পাকশন্না শন্দোকপদা খরদং ওইরবসু মতেং ওইনবা হায়দুনা চহী ১০ হেণ্ণা তমগদবা “থাঙহাইরোল” হায়বা তম্নবা লাইরিকসি সিলেবস নাইনা ইজবনি হায়না লাইরিক অসিগী ৱাহৌদোক্তা ইরি।

নিপুরগী য়েলহৌমীশিংবু চহী লীশাং শিৎনা ঙাক্তুনা কন্দুনা লাক্লিবা, ঙসিসু মৈতৈশিংগী ঈদা তোংদা চেল্লিবা আর্ত ফোর্ম অমা হায়রগদি থাঙ তাগী মহৈসিনি। মসিননি পীক্লবা চীংলৈবাক অসিনা য়েকনবা কয়াবু মায়থিবা পীদুনা মনিং তম্বা লৈবাক অমা ওইনা পাল্লকখিবা। মসিতগী মহৈনা চহী তরেৎ অৱাশিংগী মখুত্তা খুন্তাক লানশিরুরবা মতুংদা অমুক গম্ভির সিংহ, নরসিংহ অনীনা মৈতৈ লৈবাক্কী নীংতম্বা হনজিনহনখিবা। মীশিং য়ামখিদ্রবা মৈতৈগী য়ুমথোং খুদিংদা মৈতৈ লান্মী কয়া লৈরম্মী। মনিপুরনা চাওরবা বৃটিশ লোইলম লৈঙাক্কী মখুত্তা ১৮৯১গী খোংজোম লানফমদা মায়থিবা ফংদ্রিঙৈগী মমাংদদি থাঙ তাগী মহৈসি য়াম্না চাওখৎলম্মী। অদুবু বৃটিশনা লৈঙাকপা মতম, চহী নিফুহুমদোইদি থাঙ তাগী মহৈসি তাকপী তম্বীবা থিংজিনখি। অদুবু কল্লে থৌরে হায়রিবা মখোয়না কয়াম কুইনা ঐখোয়গী থাঙ-তাগী মহৈ অসিবু থিংজিনবা ঙম্লুগনি। খরা লৈরগা ১৯৩৪দা বৃটীশনা থাঙ তা তম্বগী অয়াবদু মতমদুগী নীংথৌ চুড়াচান্দ মহারাজদা পীদুনা নৌহৌনা তমখৎনখি। লাইবকথিবনা মালেমগী অনীশুবা লাঞ্জাওসু ১৯৩৯দা মনিপুর য়ৌরক্তুনা মসিগী কল্লবা শাফূ অমা পীখি। নোংমৈ বোম তোপনচিংবা লানগী খূৎচু খুৎলাইশিংগী মরক্তা থাঙ তানা কৈদৌনরুগনি হায়দুনা মতমদুগী অয়াম্বা ইপা ইপুশিংদুনা মহৈ অসি মতম খরা মীরায়রুবদগী মমি শামজিল্লকখি। অদুবু থাঙ তাগী মগুন খঙবা মৈতৈ ঈ শেংনা চেল্লিবা অহল লমন ওজাশিংনা মশাগী ওইজবা  থাদোক্তুনা মনিপুরগী লোইজিং লোয়া, খুঙ্গং কয়াদা চত্তুনা মাংফদ্রবা থাঙ তাগী মহৈ অসিবু হৌরক্লিবা নহারোলশিংদা, তুংগী মীরোল কয়াদা অখঙবা মখৈ তাকপী তম্বীদুনা মহৈ অসি শন্দোকপীরম্বা লাইওইখ্রবা থাঙ তাগী ওজাশিংগী মনুংদা কংলৈ ঈনাৎ থাঙ তা শিন্দম শঙলেনগী প্রসিদেন্ট ওইবীরম্বা লৈতানথেম ওজা হেরামোৎসু অমনি।

ওজা হেরামোৎনা মশাগী চহী ১৪দা থাঙ তাগী মহৈসি খোংজোম পর্ব্বগী ঈশৈ তারুবদগী খোংজোম লানগী অকল অথৌশিংগী থাঙ তাগী হৈশিংবা কয়াগী মগুনদুনা ইনোৎ অমা পীদুনা মতমদুদা কোংপাল পোরোমপাৎ ক্ষেত্রি লৈকায়দা লৈবা থাঙ তাগী পূরেলহন থৌদাম চাওবা খ্বাই মীয়াম্না খৌশাবা হায়না খঙনবা ওজা অসিদা অহানবা ওইনা থাঙ তা তমলকখি। মতম অসিদা পুরেনহন থৌদাম চাওবদি অহল মতম ওইশিল্লকখি। অদুনা থাঙ তা তম্বীবদু পাঙ্গল শোল্লবনিনা ঙমশিল্লকখিদে। অমরোমদা শিন্তাকপুরেল হেরামোৎকী থৱায় য়াওবা, হৈথোই শিংথোইবা, অখাং কনবা, হোৎণবা লেপ্তবা মতৌ উদুনা পুরেলহন চাওবনা পুকনিং থৌগৎলদুনা ৱাংখৈ কোইজম লৈকায়দা লৈবা পূরেলহন মোইরাংথেম অঙাহলদা চৈবী ফুনবা, তা খৌশাবনচিংবা তম্নবগীদমক্তা শিন্নবীরমখি। হোৎনবা লেপ্তবা, অখাং কনবগী মহৈ ওইনা থাঙ তাগী মহৈসি পুন্সিগী অহানবা ওইনা ১৯৪৮গী আগস্ট ১৫দা মীয়াম মমাংদা ফোংদোকপা হৌখি।

য়ুমগী অহল লমনশিংনদি থাঙ তা তম্বদু পুকনিং থৌগৎলমদে মরমদি মতম অমদা থাঙ তানা লান শোকনরিঙৈদদি থাঙ তা হৈবশিংবু নীংথৌনা অখন্নবা মনা মথূমশিং পীরম্মী। খুদম ওইনা নীংথৌগী মনা ফি, মনা লৌ অসিনচিংবা ফংবতা নত্তনা সনা কোনুং অকা অকুমদা দোলাই তোংনরম্মী। অদুবু থাঙ তাগী মতম ওইদ্রবা নোংমৈ বোম টোপকী মতমসিদা থাঙ তা তম্লগা করি কান্নবা ফংদোইনো হায়দুনা থাঙ তা তম্বা য়ারমদে। আর্ত ফোর্ম অসিবু পামজরুবনা মসিবু হিংহন্নবা, তুংগী মীরোলশিংদা মথং মথং তমহৌনবা হোৎনবা হায়বসিনা পুরেলহন হেরামোৎকী ফীরেপ ওইখি। মতমদুদা থাঙ তা ফাওবা পায়নিংঙাই লৈতদুনা টিণ্ণা চুঙ, চুঙ্গোয় অমদি তা অদু মশাণা শাজরম্মী। থাঙসু জিংঘ বান ফারকপগী লখা অথাবনা শারম্মী। থাঙ তা তম্না তম্না অতোপ্পা খুৎশা হৈবগী শিনফমশিংদসু নহা ওইরিঙৈদগী পামজদুনা লাকপনা খামেন চৎপা ময়েক ফিদা নম্বসু খুরাই থাঙজম লৈকায়দা লৈবা লৈবাকনা শকখঙনরবা খুৎনাইবা স্নখ্বা রোতোনসনাদা তম্লকখি।মসিতা নত্তনা কজেংলৈ শাবসু হৈরকখি। মালেমগী অনীশুবা লাঞ্জাও মনুংদা পুরেলহন থোকচোম নীংথেমজাওগা থেংনদুনা জিংঘগী পেড়ে, খূদেং বালতিননচিংবাসু শাবা তমলকখি। ইনখৎলক্লিবা নহারোলশিংবু শেন্থোক লম্বী লৈনবা হোৎনবদা শিনফম অসিনা মতেং ওইনরকখি মতমদুদা।

শিন্তাকপুরেল হেরামোৎকি হৈ শিংবা মতৌশিং লোৎলগা লৈবা য়ারক্তে। ১৯৪৮কি ফেব্রুৱারী ১৩দা কোংবা শৌদোংপুঙ মৈতৈ ময়েক হায়স্কুলদা লফু ককপদা ফজমনখ্রদুনা মতমদুগী দি এস পি ঐচ চন্দ্রকুমার সিংহনা চান্দিগী মেদল অমা পীদুনা ইকায়খুম্নবা উৎখি। লফু ককপা হায়রগা ইচম চম্না ককপদু নত্তে অদুনা ১৯৫১গী এপ্রিল ৫দসু মহারাজ বোধচন্দ্রনা লফু ককপা উবদা পেনবীখ্রদুনা সনাগী মেদল অমা পীখি। চহী অসিমক্কী মে ১৫দা থাঙ তাগী শিন্দম শঙলেন অমা লিংখৎখি। মসিনা মমি শাম্লুরবা মহৈ অসিবু ময়েক মঙাল থোকহনবদা য়াম্না চাওরবা থৌদাং অমা লৌবা হৌরকখি। ১৯৫২গী মে ২৬ অসি মনিপুর মীয়াম্না কাওবা ঙমদবা নুমিৎ অমা হায়বদো ওইখি। হৌজীক লৈরিবা আর দি এস (রাজা দুম্বরা সিংহ হায়স্কুলগী হোলদনি শিন্তাকপুরেল হেরামোৎনা জিংঘ তরুক লোল্লগা মখুৎনা শেৎপদা মতমদুগী ইম্ফাল ইস্ত ইন্তরমেদিয়েৎ কংগ্রেস কমিতিগী সেক্রেটরি লাইখুরাম ইবোবীনা পেল্লদুনা চান্দিগী মেদলদা ময়ায়দা সনা হৎপা মেদল পীদুনা ইকায়খুম্নবা উৎখি। হৌজীক্কী মতমদা ওইরবদি গিনিস বুক ওফ ৱার্ল্ড রেকোর্দতা শোয়দনা চল্লমগনি। থাঙ তাখক খঙবা হৈবনা য়ারক্তবা মতাং কয়া লাকপনা ১৯৫৩দা শিন্তাকপুরেলহন শগোলশেম ইন্দ্রমনিদা শারৈ-শারা তমখি। ১৯৭৫তগী হৌদুনা থা ৬/৬কী ওইবা শারৈ শারাগী চেফোঙসু পুথোকপা হৌখি। মসিমকনা ১৯৭৮তা শারৈ শারা হায়না মিংথোনবা মার্সিয়েল আর্টকি অয়েকপা লাই কয়া য়াওরবা লাইরিকসু ফোঙখিবনি।

শিন্তাকপুরেল হেরামোৎমা থাঙ তাগী লমদা নীংহন্নবা লৈতনা হোৎনরিবা কয়াবু শকখঙবা ওইনা হুইয়েন শাফবা হায়বা মিংথোল অসি ১৯৭৫গী এপ্রিল ২৯দা অখিল মনিপুর কলাকার সম্মেলন্না পীখি। “য়ুনাইতেড কলচরেল কাওন্সিল ইন এক্সননসু ১৯৭১দা সনাগী মেদল অমা পীখি। লেপ্পা লৈতনা চঙশিল্লক্লিবা থাঙ তাবু শারৈ শরাবু হীংহন্নবা হোৎনবগী খোংজংসিবু শকখঙলকখি মনিপুর লৈঙাকনসু। অদুনা ১৯৮৮তা মনিপুর স্তেট কলা একাদেমি এৱার্দ পীখি। ২০০২দসু “সনসম মৈপাক এৱার্দ” ফংখি। মরমদম মজাতিগী আর্ত ফোর্ম অমবু হিংহন্নবা কন্না হোৎনরকখিবা শিন্তাকপুরেল হেরামোৎকী হোৎনজমনবু অমুক হেন্না শকখঙলকখি ভারত সরকারনা। অদুনা ২০০৮-০৯গী লেমজনিংঙাই ওইরবা সঙ্গিত নাটক একাদেমি এৱার্দ পীদুনা ইকায়খুম্নখি। লৈবাকনা শকখঙলবা শিন্তাকপুরেল অমা ওইরবসু পেন্থোকপা হায়বদুদি লৈখিদে। পুন্সি নুমিদাংৱাইরম ওইরক্লবা মাংগী লম্বীনা তেনশিল্লক্লবা তুংগী লম্বীনা শাংহৌরবা মতমদুদা ফাওবা ইপানাৎ ইপুনাৎকি মহৈ অসিবু হীংগৎহন্দুনা মৈতৈগী ময়েং তারুরবা মাংফদ্রবা মহৈ অসিবু পাকশন্না শন্দোকপদা খরদং ওইরবসু মতেং ওইনবা হায়দুনা চহী ১০ হেণ্ণা তমগদবা “থাঙহাইরোল” হায়বা তম্নবা লাইরিকসি সিলেবস নাইনা ইজবনি হায়না লাইরিক অসিগী ৱাহৌদোক্তা ইরি।

অহল মতম ওইশিল্লক্লবা, কাওজন থিরবা, কম্লাক চিংখৎপা ঙম্লক্ত্রবা, অদুগীসু মথক্তা মশাগী চহী ২৩দগী ৮০ ফাওবদা নারক্লবা লাইনা অমা লৈনা লৈনা নীংশিংবগী ঈরেনবুংদা হন্না হন্না চোংথদুনা মচঙ ওইবা থাঙহাইরোলগী পরাশিংবু ইদুনা থনম্নবা হোৎনবা হায়বসে অরায়বা থবক অমদি নত্তে। অইবনা থাঙ তাগী মহৈসি কয়ামূক পাম্মুবগে হায়বদু থাঙহাইরোলগী ৱাহৌদোক্তা অসুম্না পল্লি- “শিবদা পুখিবা পাম্মুই, লাইরিক ওইনা ইদুনা থনমগে হায়দুনা শদৌ থোংখৈ ৱানা নোংঙানবদগী নুমিৎ তাবা ফাওবা চোংদুনা থাঙ হাইরগা লাইরিক অসি ইরকপসি চহী মরি মঙা চংখি। মসিগী মনুংদা থা অহুম খরা হেন্না ইরকপখৈ লাল্লমদুনা মৈ থাদোকখিবা কয়ানি। ইশাগী ওইনা ময়ামগা চিঞ্জাক তিন্নদবনিনা ইশানা তোঙান্না চাক থোংঙগা চায়। নোংঙাল্লগা থোংদুনা চাবদি মতম মাঙঙি লাইরিক য়ামণা ইহৌদে হায়দুনা অহিংদা থোংঙগা নোংঙাল্লকপা মম্লি মম্লি তৌরকপদগী হৌনা ইরকপদুনা নুমিদাংৱাইরম মম্লি মম্লি তৌরকপা লাইরিক ইবা উরক্ত্রবা মতমদা তোকপনি” ৱাহৈ পরেং খরসিনা মৈতৈশিংগী ঈদা মপা মপু নুংশিবগী মখোয়না থম্লবা মহৈ অসিবু মাংহন্দনা থমনিংবগী ময়েক লারবা খুদমনি হায়না লৌদবা য়ারোই। লাইরিক অসি প্রুফ ১৩/১৪ কক্লবা মতুংদা ফোংনবা নুমিৎসু কয়ারক লেপ্লবা মতুংদা মঙারক শুবদা ফোংবনি হায়না পল্লি।

ঙসিদি মনিপুর লৈঙাক্কী এডূকেসন দিপার্টমেন্টণা শকখঙলক্তুনা মহৈ লোইশঙশিংদা প্রাইমরিগী থাক্তা তম্বা য়াহনখ্রে। হৌজিক মনিপুর য়ুনিভর্সিতি ওফ কলচরদা তম্নরি। হেন্না নুংঙাইজবা অমদি চাওথোকচনিংঙাই ওইরিবদি ইন্দিরা গান্ধী নেসনেল ওপন য়ুনিভর্সিতিনা ইন্দিয়াগী ওইনা তম্বা য়ারবা মার্সিয়েল আর্ত ফোর্ম অনী খনগৎপদা মৈতৈগী থাঙ তাসু য়াওরকপা অসিনি। অমনা কেরেলাগী মার্সিয়েল আর্তনি। ঙসিদি মালেমগী মফম কয়াদগী মনিপুরদা থাঙ তা তম্বা লাকনরি। হীরম অসিদা থিজিনবা কয়াসু লাকপা লেপ্তে। শিন্তাকপুরেল মনিপুর মীয়ামগী ওজা হেরামোৎনা লাইরমলেন্দা তাইবঙ মপুগী লৈকোলদা তিনখ্রবসু মহাকনা শাগৎচরম্বা মঙলান কয়াদুদি তপ্না তপ্না মঙফাওনবা হৌরক্লি হায়বা য়াই। ঙসিফাওবদা ওজা হেরামোৎনা থাঙ তাগী লাইরিকখক নত্তনা মাংখিগদৌরবা লমদম অসিগী নুংশিরবা অকল অথৌ কয়াগী ৱারীগী খোমজিনবা লাইরিকসু ইবীরমখি। লৌশিং পুক্কৈ ওইরবা লাইরিকশিংসু থম্বীরমখি। মখোয়শিংদুদিঃ অখুনবা লীক্লু পরেং(১৯৯৮); ওইনাম বিজান্দো(১৯৯৩); খুরাই নানবা(১৯৯৮); মীহাৎ-মীকন (১৯৮৪ অসিনচিংবনি।

COMMENTS

WORDPRESS: 0
DISQUS: