নাওরেম বেবীরোজিসনা চনু অমসুং থোকচোম সনামচা চনু  য়াওনা ইন্দিয়াগী নুপী বক্সার ৬ গোল্ড মেডেল ফংখ্রে

Homeশান্নবা

নাওরেম বেবীরোজিসনা চনু অমসুং থোকচোম সনামচা চনু য়াওনা ইন্দিয়াগী নুপী বক্সার ৬ গোল্ড মেডেল ফংখ্রে

পোলেন্ডগী সিটি কিলচেদা পাঙথোকপা য়ুঠ মেন্স এন্ড উইমেন্স ৱার্ল্ড বোক্সিং চেম্পিয়নশিপকী ঙসি পাঙথোকখিবা নুপীগী বাউট ১০গী মনুংদা ইন্দিয়াগী মায়কৈদগী বোক্সার

পোলেন্ডগী সিটি কিলচেদা পাঙথোকপা য়ুঠ মেন্স এন্ড উইমেন্স ৱার্ল্ড বোক্সিং চেম্পিয়নশিপকী ঙসি পাঙথোকখিবা নুপীগী বাউট ১০গী মনুংদা ইন্দিয়াগী মায়কৈদগী বোক্সার ৭না শরুক য়াখিবদা মণিপুরদগী হৌখিবা নাওরেম বেবীরোজিসনা চনু অমসুং থোকচোম সনামচা চনু য়াওনা পুন্না গোল্ড মেডেল ৬ ফংদুনা নুপীগী কাঙলূপ অদুদা ইন্দিয়াবু লম্বা পীবা ঙমখিদ্রে।

কিলোগ্রাম ৫১ গী কাঙলুপ্তা ইন্দিয়াগী বোক্সার অমা ওইরিবী নাওরেম বেবীরোজিসনা চনুনা ফাইনেল বাউট অদুদা রেদ কোর্নারদা শরুক য়াদুনা রাশিয়াগী বোক্সার ভালেরিয়া লিনকোভাগা লম্বা তৌনখি। বোক্সার অনিগী লম্বা য়েংনরুবদা রাশিয়াগী বোক্সার অদুনা বেবীরোজিসনা চনুদগী মরেপ ৱাংবা হেনখি। অদুবু ফুট ৱাকতা অমদি বোক্সার অমগী ফজবা মশান্না পুম্নমক উৎপা ঙমদুনা লম্বা ওইখিবী রাশিয়াগী মরেপ ৱাংবী বোক্সার অদুবু অহানবা রাউন্দদগী হৌরগা খূদুম চন্না শান্নবা ঙমখি।

অহানবা রাউন্দ অদু লোইশিল্লকপদা বেবীরোজিসনা চনুনা রাশিয়াগী বোক্সার অদুবু ৩-২দা হেন্দুনা লৈখি। জজ ৫গী মনুংদা জজ ৩না বেবীরোজিসনাগী ফেভারদা পীখিবনি। অনীশুবা বাউট অদুসু রাশিয়াগী বোক্সার অদুবু বেবীরোজিসনা চনুনা হীরম খূদিংমক্তা হেনবা ঙমখি। মহাক্কী শাফূ কল্লবা কিনশিং অদুনা রাশিয়াগী ভালেরিয়া লিনকোভাবু তান্না-তান্নন থিনখি। রাউন্দ অদু লোইশিল্লকপদসু বেবীরোজিসনানা পয়েন্ট হেনখি। অহুমশুবা অমদি অরোইবা রাউন্ড অদুদা রাশিয়াগী বোক্সার অদুগী মায়কৈদগী পয়েন্ট য়াম্না ফংগদবা শোট য়াওবা ঙমখিদে। মদুগী ওন্নবদা বেবীরোজিসনানা মগুণ রৈবা পঞ্চ অমদি জেব কয়া য়াওখিবনা মখা তানা পয়েন্ট হেনখিবদগী বাউট অদু লোইশিল্লকপদা মহাক্না ঙমদুনা গোল্ড মেডেল ফংবা ঙমখি। নুপীগি কিলোগ্রমা ৭৫ গী কাঙলূপ্তা ইন্দিয়াগী মায়কৈদগী শরুক য়াখিবি মণিপুর মচা থোকচোম সনামচা চনুনা কজখস্টানগী বোক্সার দানা দিদেগা লম্বা তৌনখি। শান্নরোয় অনী মরেপ ৱাংবা মান্নরবসু পঞ্চকী শাফূ কনবদি সনামচা চনুনা হেনখি। অহানবা রাউন্দ লেং খরা মান্নরবসু সনামচা চনুদা জজ ৫গী মনুংদা ৩না ফেভার তৌখি। অনীশুবা রাউন্দদা সনামচা চনুনা কজাখস্টানগী দিদেবু য়াম্না ফজবা পঞ্চ অমগী মতেংনা নাহী তাহনখি।

কজাখস্টানগী বোক্সার অদুনা অহুমশুবা রাউন্দ অদুদা মশা চোকথরকপা মরম্না অয়াম্বা মতম সনামচাদা কোনশিন্দুনা অমদি ঙাশিন্দুনা মতম লৌনবা হোৎনখি। অদুবু সনামচাগী হৈথোই-শিংথোইবা অদুনা দিদেবু ইন্থোক্লগা পয়েন্ট ফংবা যাবা পঞ্চ কয়াসু থিনবা ঙমখি। মহাক্না রাউন্দ অহুম্মক্তা হেন্দুনা গোল্ড মেডেল ফংবা ঙমখি।

চেম্পিয়নশিপ অদুদা ইন্দিয়াগী মায়কৈদগী গোল্ড ফংখিবা  অতোপ্পা বোক্সারশিং অদুদি কেজি ৪৮গীদা গীতিকা, কেজি ৫৭তা পুনম, কেজি ৬০দা ভিনকা অমসুং কেজি ৬৯দা অরুনধাটি চৌধুরি নি। ফাইনাল ৭ চঙবগী মনুংদা সিলভার ফংহৌবী ইন্দিয়াগী বোক্সার অদুদি অলফিয়া তরানম পথাননি। হয়েং নুপাগী ফাইনেল শান্নগনি।

সোর্সঃ হুইয়েন লানপাউ।

COMMENTS

WORDPRESS: 0
DISQUS: