দি গ্রেট জুন আপরাইজিং, য়ুনিটি ডে পাঙথোকখ্রে

Homeকমিউনিটি

দি গ্রেট জুন আপরাইজিং, য়ুনিটি ডে পাঙথোকখ্রে

ইম্ফাল, জুন ১৮ঃ অমুকো অমসুং য়ু সি এমগী অবজার্ভেশন কমিটি ২০ শুবা দি গ্রেট জুন আপরাইজিং ডে, য়ুনিটি ডেনা শীন্দুনা ঙসি অথৌবা-অথৌবী১৮না থৱায় কৎখিবা নুমিৎ ন

ইম্ফাল, জুন ১৮ঃ অমুকো অমসুং য়ু সি এমগী অবজার্ভেশন কমিটি ২০ শুবা দি গ্রেট জুন আপরাইজিং ডে, য়ুনিটি ডেনা শীন্দুনা ঙসি অথৌবা-অথৌবী১৮না থৱায় কৎখিবা নুমিৎ নীংশিংদুনা ক্রেকুপাৎতা থৌরম অমা পাঙথোকখ্রে। কোভিদনা মরম ওইদুনা মীয়অম পাকশন্না শরুক য়অবা ঙমদ্রবা অমুকো অমদি য়ুসিএমগী লুচিংবশিং, লৈকায়, ক্লাব, নুপী লূপ, অর্গানাইজেশন, মহৈরোয় লুপশিংগী লুচিংবশিংনা এসওপি ঙাক্না অথৌবাশিংগী খুভমদা হৈকৎ তমখি। থৌরম অদুদা অবজার্ভেন্স কমিটিগী চেয়ারমেন ফৈরোইজম নন্দো লুৱাংনা পাউমীশিংদা হায়, ঙসি জুন ১৮গী থৌরম শীল্লিবা অমদি অথৌবা অথৌবীশিংদা হৈকৎ লৈকৎ তম্লিবা অসি মণিপুরগী অপূনবা শক্তম থুগায়বা য়ারোই হায়বগী পাউজেল অমা পীরবনি অমদি অপূনবগী শক্তমদা থেংনগনি হায়না ৱাশক লৌরিবনি। ইন্দিয়া লৈঙাক্না ঐখোয়গী অপূনবগী শক্তমদা কয়াম কুইনা শান্নরগা লৈহনসি হায়রিবনো হায়না হংলদুনা ঐখোয় মীৎকপ থোক্লসি হায়না মণিপুরগী কাঙলূপ, ফূরুপ খূদিংমক্তা আপীল তৌখি। ইন্দিয়ানা শান্নরিবা দিভিসিভ গেম অসিদা মায়া পাক্লগা নুংঙাইগনি হায়না ফূরুপ খরগী মীওইশিংনা খল্লিবা ৱাখলদু মতমগা চনাদ্রবা অমনি। হৌজিক মণিপুরগী মফম কয়াদা মান্নদবা কাঙলূপশিংগী লমগী ৱাথোক ময়াম অমা থোরক্লিবসিগী মরুমদা করি লৈ নৎত্রগা করম্বা অচৌবা খূৎ য়াওবগে হায়বসি ঐখোয়না মুন্না য়েংশিনবা মথৌ তাই।

মফম কয়াদা থোক্লিবা লমগী ৱাথোক অদুনা মমৈদা মণিপুরগী অপূনবা শক্তম কায়নবা মচাক ওইরকপা য়াই। অদুনা ফূরুপ খুদিঙমক্না চেকশিনগদবনি। ফূরুপ অমনা অমবু করম্বা মতমদা কদায়ৱাইদা তুহৎলগা নুংঙাইগদৌরিবনো হায়নসু হংলদুনা ঐখোয় মশেলগী মরক্তা মূক্নবা, অৱায় অখুম তৌনবা মতাং ময়াম লৈখ্রৈ। অদুবু মদুগী কান্নবা করিসু লৈত্রি। মরমদি মণিপুর হায়বসি তোঙান তোঙানবা ফূরুপশিংনা ঙাকমিন্নগদবনি।

ক্রেকুপাৎনা হেক লৈরিবমখৈ অমদি মণিপুরগী অশেংবা মপারি ময়াম অসিনা হেক লৈরিবমখৈ মণিপুরগী অপুনবা শক্তম থুগায়বা শুকঙম ঙম্লোই। কেক্রুপাৎতা লৈ কৎলিবা খুৎ অসি মণিপুরগী অপুনবা শক্তম ঙাক্নবা খুৎনি হায়বসি ইন্দিয়া লৈঙাক্না খঙবীয়ু। ইন্দিয়ানা কাঙলুপ ফুরুপতা য়ূম্ফম ওইবা লালহৌলূপ খরা শীজিন্নরগা মণিপুরগী অপূনবা শক্তম থুগাইনবা হোৎনরিবসি মণিপুরগী মীয়াম্না খঙমিন্নসি অমদি চেকশিনমিন্নসি। ইন্দিয়াগী থৌইনশিন্দা চৎলিবা ফুরুপতা য়ুম্ফম ওইবা লালহৌবাশিংসু মখোয়গী খোঙথাং অদু চুম্লিবরা হায়বা ৱাখল খন্থবীয়ু, নৈনবীয়ু হায়নসু মহাক্না আপীল তৌখি। হৌজিক কোভিদ-১৯ গী পেন্দামিক লৈবগী অপূনবগী শক্তমদা ইন্দিয়া লৈঙাক্না দিভিসিভ গেম শান্নবা খরা লেপ্পনি। পেন্দামিক অসি হেক লোইবগা ইন্দিয়া লৈঙাক্না মণিপুরদা করি তৌরক্কদৌরিবনো হায়বসি খঙবা ঙমদ্রিবা ৱাফমনি। লমদম অসিদা খুন্দারিবা ফুরুপ খরগী খূৎলায় পায়বা লালহৌলুপশিং শীজিন্নরগা অপুনবা শক্তম থুগাইনবা হোৎনরিবা অসিগী মথক্তা হৌজিক্তি পোলিটিশিয়ান কয়া শীজিন্নরক্কদ্রা হায়বসি মীয়াম্নসু মীৎয়েং থমিন্নরসি হায়খি।

ইন্দিয়া লৈঙাক্না চহী কয়া মোইথেম তৌদুনা থম্লিবা লালহৌলুপশিংসু নৌহৌননা ৱাখল খন্থবা ওইরে। মরমদি মূক্নবদা শিখিবা, শোকখিবসি লমদম অসিগী মীওই ঙাক্তনি। ঙসি জুন ১৮গী শেংলবা নুমিৎ অসিদা অদুঙৈ কুমজা ২০০১ গী মণিপুরগী অপূনবা শক্তম ঙাক্নবা খোঙজং চঙশিনবদা থৱায় থাখ্রবা অথৌবা অথৌমীশিংনা লাইরম্লেনদগী মীয়ামদা থৌনা লিংজেল পীবীবা ওইরসনু হায়না মহাক্না মখা তাখি।

COMMENTS

WORDPRESS: 0
DISQUS: