থৌনা ফবা ইপা-ইপুশিংগী শরূশিং ইম্ফালদা পুরক্লে -নোমিতা খোংবান্তাবম

Homeস্ক্রলবার

থৌনা ফবা ইপা-ইপুশিংগী শরূশিং ইম্ফালদা পুরক্লে -নোমিতা খোংবান্তাবম

শরূশিং অসি খোংজোম লান নুমিৎকী মফম অসিগী খেব চীংদা পাঙথোকপা চহীগী থৌরমশিংদা শরুক য়াবা লাকপা মীওইশিং খক্তা নত্তনা মরক্তসু টুরিষ্টশিং অমসুং খোংজোম লানফমব

শরূশিং অসি খোংজোম লান নুমিৎকী মফম অসিগী খেব চীংদা পাঙথোকপা চহীগী থৌরমশিংদা শরুক য়াবা লাকপা মীওইশিং খক্তা নত্তনা মরক্তসু টুরিষ্টশিং অমসুং খোংজোম লানফমবু য়েংনীংবা মীওইশিংনা লাক্তুনা য়েংলরিবনি। অদুম ওইনমক তেঙ্গোল লম্পাক্তা শঙ মচা অমা শাদুনা য়োক্তুনা থম্লকপা শরূশিং অসিগী ফীভমদা য়েংবা নুংঙাইতবা য়াওশিল্লকপদগী তঙাইফদনা মসিবু থম্লিবা শঙ অমসুং মদুগী অকোয়বগী ফীভম শেমগৎ শাগৎনবগীদমক ইম্ফালদা পুরকপনি হায়রি।

অদুঙৈ কুমজা ১৮৯১ গী এপ্রিলদা মমা লৈবাক মণিপুরগী নীংতম্বা কন্নবগী লানফম ‘এংলো-মণিপুর ৱার-১৮৯১’ গী লানফমদা থৱায়না পোন্থা পীখ্রবা লাইওইখ্রবা ইপা-ইপুশিংগী শেংলবা শরূশিং ষ্টেট আর্কিওলোজিগী অফিসিয়েলশিংনা খোংজোমগী তেঙ্গোল লম্পাক্তগী ইম্ফাল তম্না পুখৎলকখ্রে। খোংজোম লানদা লৈখিদ্রবা থৌনা ফবা মণিপুরগী লান্মীশিংগী শরূশিং অদু হৌজিক্না এশিয়ান হায়ওয়ে হায়না খঙনরক্লবা নেশনেল হায়ওয়ে (ইম্ফাল-মোরে) লম্বী পরিংদগী খোংজোমগী নীংতম লানফম রোমদা শুপ্নতগী কিলোমিটার মখায় অমরোমদমক চঙশিল্লগা লৈবা ‘তেঙ্গোল লম্পাক’ তা চহী কয়া থম্লকখিবনি। লাইওইখ্রবা অথৌবা লাম্মীশিংদুগী শরূশিং থম্লক্লিবা মফম অদু হৌখিবা কুমজা ২০০৪ গী ফেব্রুয়ারী ২১ দা মণিপুর ষ্টেট আর্কিওলোজিগী মায়কৈদগী হেরিটেজ সাইট অমা ওইনা প্রোটেক্সন তৌদুনা লাকখিবনি। লাইওইখ্রবা অথৌবশিংগী শরু থম্লকখিবা মফম অদু য়াম্নমক চাওদ্রবসু ফুট ৬০ শাংলগা ৫১ পাকপা মফমনি। হায়রিবা মফম অসিদা ইপা-ইপুশিংগী শরূশিং অদু চেকশিন্না শেম শারবা গ্লাস পানবা উপু অমগী মনুংদা হাপ্তুনা থম্লকখিবনি।

            দ্য বেটল ওফ খোংজোম @RKCS

মফম অদুদা শরূশিং অদুবু ঙাক শেন্নবগীদমক লৈঙাক্কী মায়কৈদগী তোঙানবা মীওই অমা নৎত্রগা খরা থমদ্রবসু তেঙ্গোল লম্পাক্কা হেক থংননা লৈরিবা ফাদারলেন্ড প্রেত্রিওটস মেমোরিয়েল ক্লাব (খোংজোম) না অচৌবা থৌদাং লৌদুনা ঙাক শেনবদা মতেং পাংলকখিবনি। মখা তানসু শরূশিং অদুবু ঙাক শেনবগী থবক্তা ক্লাব অসিনা পাংবা য়াবা মতেং পাংগনি হায়বগী থাজবা পীরক্লিবনি। অদুম ওইনমক লাইওইখ্রবা ইপা-ইপুশিং অদুগী শরূশিং অদু ষ্টেট আর্কিওলোজিগী মায়কৈদগীদি উপু অমদা হাপচিন্দুনা থম্বা খক নত্তনা তোঙাননা মদুগীদমক শংননবা মী থমদবনা মরম ওইরদুনা চহী য়ামশিল্লকপা অমসুং নোংজু নুংশা কয়া মায়োক্নরকপদগী শরূশিং অদুগী ফীভম শোকচিনবা হৌরকপগী মমি তারকপনি হায়রি।
ওইরক্লিবা ফীভমশিং অসিদগী শরূশিং অদুবু কলহৌনবগীদমক ষ্টেট আর্কিওলোজি দিপার্টমেন্টকী অফিসিয়েলশিংনা লৌখৎলুদুনা কংলা মনুংদা লৈবা লোয়শঙ অসিগী অফিস তম্না পুরকখ্রে। শরূশিং অদুবু থম্লিবা তেঙ্গোল লম্পাক্কী শঙ মচা অদুসু নৌহৌননা শেমজিন শাজিনবগা লোয়ননা মফম অদুদা শরূশিং অসিবু অমুক থম্বা মতমদা মসিগীদমক ঙাক শেন্নবা তোঙানবা মীওই অমা থম্নবা থৌরাং লৌখৎলগনি হায়রি।
শরূশিং অসি খোংজোম লান নুমিৎকী মফম অসিগী খেব চীংদা পাঙথোকপা চহীগী থৌরমশিংদা শরুক য়াবা লাকপা মীওইশিং খক্তা নত্তনা মরক্তসু টুরিষ্টশিং অমসুং খোংজোম লানফমবু য়েংনীংবা মীওইশিংনা লাক্তুনা য়েংলরিবনি। অদুম ওইনমক তেঙ্গোল লম্পাক্তা শঙ মচা অমা শাদুনা য়োক্তুনা থম্লকপা শরূশিং অসিগী ফীভমদা য়েংবা নুংঙাইতবা য়াওশিল্লকপদগী তঙাইফদনা মসিবু থম্লিবা শঙ অমসুং মদুগী অকোয়বগী ফীভম শেমগৎ শাগৎনবগীদমক ইম্ফালদা পুরকপনি হায়রি।
মফম অদুদগী লাইওইখ্রবা অথৌবা ইপা-ইপুশিংগী লানদা লৈখিদ্রবা হকচাংশিংগী শরূশিং অদু পুখৎলকপগী মতাংদা আর্কিওলোজিগী সুপারিন্টেন্ডেন্ট কে শশিকান্তনা পাউচে অসিদা হায়, তেঙ্গোল লম্পাক হায়দুনা খঙনমলিবা খোংজোম লানফমগী মনুং চল্লিবা মফম অসিদা থম্লক্লিবা মীগী শরূশিং অসি অয়াম্বনা নোঙ্খাং চাইবগী মওংগুম্না তৌরকপদগী শোকচিনবা হৌরক্তুনা শরূশিং অসিবু মাঙখ্রগদরা হায়বগী মীপাইবা পোক্লকপদগী ঙরাং মফম অদু তান্না চৎতুনা য়েংশিল্লূবনি অদুগা শরূশিং অদুদা ওইরম্লবা ফীভমশিং অদুদগী তঙাইফদনা ইম্ফাল তম্না পুখৎলক্তবা য়াদবগী ফীভমদা লৈরম্বদগী পুখৎলকখিবনি হায়রি।

য়্যুকিপিডিয়াদা য়াওবা ফোটো – (Lieutenant CJW Grant, during the action at Thoubal, on 1 April 1891)

শরূশিং অসি খোংজোম লান হায়রগসু পূন্না খঙনরক্লিবা মণিপুরগী নীংতম লানফম অদুদা তেঙ্গোল লম্পাক্তা শোক্নখিবা লানদা লৈখিদ্রবা মণিপুরগী অথৌবা লাম্মীশিংগী শরূ ঙাক্তনি। হায়রিবা শরূশিং অসি খোমজিন্দুনা অমত্তা মাঙহন্দনা ঙসি ফাওবা থম্লকখিবনি। হৌজিক্তি শরূশিং অসিগী থম্ফম মতিক চানা শেমগৎনবা থৌরাং লৌখৎপগা লোয়ননা শরূশিং অসিগী ফীভমসু শোকচিল্লক্তনবা মথৌ তাবা থবকশিং পায়খৎলগনি হায়রি। তেঙ্গোল লম্পাক্তা শোক্নখিবা মণিপুরগী নীংতম লানফম অদু মেজর চোংথা মিয়াগী কমান্ড মখা মণিপুরগী লান্মীশিংনা বৃটিশ লান্মীশিংগা লম্বা পাদুনা শোক্নখিবা লানফমনি।
কর্টেসি: হুইয়েন লানপাউ

COMMENTS

WORDPRESS: 0
DISQUS: