ত্রিপুরাদা কোভিদ-১৯ গী স্ত্রেইন অহুম থেংনখিবদগী স্তেত গবর্নমেন্তনা চেকশিনখ্রে

Homeভারত

ত্রিপুরাদা কোভিদ-১৯ গী স্ত্রেইন অহুম থেংনখিবদগী স্তেত গবর্নমেন্তনা চেকশিনখ্রে

আগরতলা। ত্রিপুরাদা কোরোনাভাইরাসকী ডাবল মিউন্টেন্ত স্ত্রেইন অমসুং বৃটেন অমদি আফ্রিকান ভেরিয়েন্তশিং থেংনখিবদগী গবর্নমেন্তনা চেকশিন থৌরাং লৌখৎখ্রে হায়না

আগরতলা। ত্রিপুরাদা কোরোনাভাইরাসকী ডাবল মিউন্টেন্ত স্ত্রেইন অমসুং বৃটেন অমদি আফ্রিকান ভেরিয়েন্তশিং থেংনখিবদগী গবর্নমেন্তনা চেকশিন থৌরাং লৌখৎখ্রে হায়না অফিসিয়েল অমনা ঙসি ফোঙদোকখ্রে।

স্তেত গবর্নমেন্তনা এয়ারওয়ে, ট্রেন অমসুং রোডওয়েদা স্তেত অসিদা চঙশিল্লকপা মীশিং মপুং ফানা ভাইরাস অসিগী টেস্ট তৌথোক্নবা অমসুং মখোয়গী মরক্তা ইনফেকশন য়াওরক্লগনা কোয়ারেন্টিন তৌহন্নবা ৱারেপ লৌরে হায়না অফিসিয়েলশিং অদুনা হায়খি।

স্তেত গবর্নমেন্তনা মপান্দগী লাকপা মীশিংগী টেস্ত রেজাল্টতা স্ত্রেইনশিং অদু থেংনখিবদগী ত্রিপুরা হেলথ সেক্রেটারী জে. কে সিনহানা ঙরাং স্তেত অসিগী দিস্ত্রিক্ত নিপালগী দিস্ত্রিক্ত ম্যাজিস্ট্রেটশিং, সুপারিন্তেন্দেন্ত অব পুলিস অমসুং চীফ মেডিকেল অফিসারশিংগা ওনলাইন্দা মীতিং অমা পাঙথোক্তুনা খন্নখ্রে অমদি কোভিদ-১৯ গী নোর্মশিং চপ চানা ঙাক্না চৎনবা অমসুং লৌখৎনবা লেপ্নখ্রে।

হেলথকী ডিরেক্টর, রাধা দেববর্মা অমসুং আগরতলা গবর্নমেন্ত মেডিকেল কলেজগী মাইক্রোবাইওলোজিগী প্রোফেসর, তপন মজুমদারনা হায়, কোরোনা ভাইরাস ইনফেকশন তৌরবা মীশিংদগী লৌবা সেম্পল ১৯ ত্রিপুরাদগী মপান্দা এদভান্স ভাইরোলোজিকেল টেস্তকীদমক থাখি। মখোয়গী মনুংদা সেম্পল ১৭তি য়াম্না ইনফেকশন তৌগনবা অমসুং শিবগনা কোভিদ-১৯ গী স্ত্রেইন ওইরমখি।

য়াম্না ইনফেকশন তৌগনবা সেম্পল ১৭ অদুগী মনুংদা ১১ দি ডাবল মিউতেন্ট ভেরাইতিনা, মসি মহারাস্ত্রদা পাক শন্না শন্দোরক্লিবা মখল অদুনি, অদুগা মঙানা বৃটিশতা হৌরকখিবা স্ত্রেইন অদুনি অমসুং অমনা আফ্রিকাদগী হৌরকখিবা স্ত্রেইন অদুনি। মরম অদুনা অশোয় অঙাম থোক্তনবা অমসুং হকচাং ফনা লৈনবা মীয়াম্না কোভিদকী চৎন-কাংলোনশিং অদু চেকশিন্না ঙাকপীগদবনি হায়না ঙসি মজুমদারনা পাউমীশিংদা হায়খি।

স্টেট নেসনেল হেলথ মিশনগী ডিরেক্টর সিধার্থ শিব জাইসৱালনা হায়, সেকেন্ড ওয়েব অসিদা চহী ২০ অমসুং ৪০গী মরক্তা লৈবা মীশিংনা ত্রিপুরাদ কোরোনভাইরাসনা খ্বাইদগী শোকহল্লি। হন্দক এপ্রিল ২৩ ফাওবদা কোরোনাভাইরাসকী টেস্ট তৌবদা পজিটিভ ওইরবা মী ৬৬৫কী মনুংদা চাদা ৫০.৭৯ না চহী ২০ অমসুং ৪০গী মরক্তা লৈবা মীশিং ওই, মখোয় মী শিহনবা ঙম্বা লায়না অসিনা শোকহল্লে হায়না মহাক্না হায়খি।

জাইসৱালনা হায়, চহী ১০গী মখাদা লৈবা অঙাংশিংসু ভাইরাস অসিনা শোকহল্লি। স্টেত অসিদা মী লাখ ৮.৩৯ না কোভিদ-১৯ ভেক্সিনগী অহানবা ডোজ কাপখ্রে, মসি স্টেত অসিগী অপুনবা মীশিংগী চাদা ২৪নি অমদি নেসনেল এভারেজগী ওইনদি শুপ্নগী চাদা ৬ খক্তনি হায়খি।

অমরোমদা, ঙরাং ত্রিপুরাদা কোভিদ-১৯গী টেস্ট তৌবদা য়ামদ্রবদা মী ১৬৬ পজিটিভ ওইরে, মসিনা স্টেত অসিগী অপুনবা তেল্লিদা ৩৫,১৬৯ য়ৌহনখ্রে হায়না হেলথ ডিপার্টমেন্টকী অফিসিয়েল অমনা হায়খি।

ইনফেকশন অসিনা স্টেত অসিদা মী শিবগী চাংদি ৩৯৩ দা অদুমক লৈরি। ত্রিপুরাদা হৌজিক কোরোনা ভাইরাসকী এক্টিভ কেস ১০২০ লৈরি, অদুগা ৩৩৫৫৫ না লাইচৎ অসিদগী ফগৎখ্রে হায়না অফিসিয়েল অদুনা হায়খি।

সোর্সঃ পোক্নফম।

COMMENTS

WORDPRESS: 0
DISQUS: