ত্রিপুরাগী মণিপুরী খুন্নাইনা নাৎকী থৌরম পাঙথোকপদা কোভিদকী গাইডলাইন ঙাক্না চৎতবা য়াদে

Homeস্ক্রলবার

ত্রিপুরাগী মণিপুরী খুন্নাইনা নাৎকী থৌরম পাঙথোকপদা কোভিদকী গাইডলাইন ঙাক্না চৎতবা য়াদে

আগরতলা, জুন ০৩ : মণিপুর মপান্দা মৈতৈশিংনা খুন্নাইগী চৎনবী ঙাকপগা লোয়ননা মালেমগী তমথিরবা কোভিদ লাইচৎতগী মশা মশাবু কন্ননবা কোভিদ টেষ্ট তৌদুনা সরকারগী গা

আগরতলা, জুন ০৩ : মণিপুর মপান্দা মৈতৈশিংনা খুন্নাইগী চৎনবী ঙাকপগা লোয়ননা মালেমগী তমথিরবা কোভিদ লাইচৎতগী মশা মশাবু কন্ননবা কোভিদ টেষ্ট তৌদুনা সরকারগী গাইডলাইন ঙাক্না চৎপীয়ু। মসিনা খুন্নাইগী তৎনা থানদ্রবা কালচারসু ঙাক্লে ইশাসু কনবা ঙমলে। লাইনিং লাইশোল, ধর্ম-কর্ম অমদি শোরাৎ-কর্মনচিংবসি খুন্নাই অসিগী তঙাইফদবা থৌরমনি, পাঙথোক্তবা য়াদে। অদুবু কোভিদ লাইচৎ অসিনা মরম ওইদুনা ত্রিপুরাদা চোইজাইননা মশীংসু লিক্না তারিবা মৈতৈ খুন্নাই অসিনা লাইনিং লাইশোলগা মরী লৈননা পোকপা, শিবা, লুহোং খোংদোক অমদি উৎসব নচিংবা খুন্নাইগী অতৈ থবক থৌরমশিং কয়া পাঙথোকপদা চৎনবী কয়া ঙাক্না চৎপা হোৎনবদা খুন্নাইনা অৱাবা কয়াসু থেংনরি। মরু ওইনা ঈশৈ শক্লিবা পালাশিং, পুং য়ৈবা অমসুং অরাংফম থবক তৌরিবশিংনা মাঙজৌননা কোভিদ টেষ্ট তৌথোক্তুনা মখোয় কনামত্তা পোজিটিব ওইদে হায়বা চেজেৎ অমা পায়শিনবগী মথৌনি হায়রি। অদুনা য়ুম্বু নত্রগা ভাবোকশিংগী চেকশিনবা ওইগনি। মরমদি খুন্নাইদা শোরাৎ-কর্ম, লুহোং খোংদোংবা অমদি খুন্নাইগী তৎন থানদ্রবা থৌরম কয়া পাঙথোকপদা হায়রিবা ঈশৈ শকপা পালা দোহার, পুংয়ৈবা, অরাংফমগী থৌদাংসি য়াম্না চাওই। খুন্নাইগী চৎনবী মতুং ইন্না লৈ-চন্দন লৌবা হায়বসি খুৎকা খুৎকা শোক্নরগা লৌবা, মান্ডপ পালা মনুংদা চঙলগা খুরুম্বা, পালা বোরিবা, শেল থাবা, বিদায় ফি কৎপা অসিনচিংবা অমসুং অরাংফমগী থৌদাং লোইপুম্বসি অমগা অমগা খুৎশোক্নবা নত্তনা য়াদে। অমরোমদা লুহোং খোংদোংবগী থৌরমদা বর অমসুং কন্যা শেন্নবা, মখোয়বু কোইশিন্না লৈবা বরযাত্রী, মরীমতা, মরূপ মপীজা অমদি ভাবোকশিং অমগা অমগা নকশিন্ননা লৈবা হায়বসি লাইচৎ অসিদগী খুদোংথিনিঙাই ওইবা ঙাক্তনি। মখোয় মরক্তগী অমনা কোভিড পোজিটিভ ওইবা তারবদি লুহোংফমবু ওইরে শোরাৎফমবু ওইরে পাক্তক্ননা কোভিড লাইচৎ শন্দোকপা ওইরকপা য়াবগী অকিবা অদু লৈতবা নত্তে। অদুবু অঙকপদি হৌজিকসু ত্রিপুরাগী মণিপুরী খুঙ্গং কয়াদা খুন্নাইগী চৎনবী ঙাকপা হোৎনবদা লৈঙাক্কী গাইডলাইন ঙাক্না চৎপা ঙমদ্রিবদুনি। খুন্নাইগী থবক থৌরমশিং চত্থবদা খুঞ্জা অয়াম্বনা মাস্ক উপ্তে ডিষ্টেন্সিংসু ঙাক্না চৎতে হায়না মাইকৈ কয়ারোমদগী ৱাকৎনরকপা কয়াসু য়াওনরে। খরনি মমাংদা আগরতলা থংনবা খুঙ্গংদা কোভিদ লাইচৎ অসিবু মীরাইবগুম্না মী য়াম্না তিনবা হরাও কুম্মৈ পাঙথোকপদসু খুন্নাইগী অহল নহা অঙাং মাস্ক উপ্তনা শরুক য়াখিবগী থৌদোকসু থেংনখ্রে। কোভিড গাইডলাইন ঙাক্না চৎতবসি ময়ামগী য়াইফবদি নত্তে। অসু্ম্না তোঙান তোঙনবা জিলা তরুক্তা চোইজাইননা তারিবা মৈতৈ খুঙ্গং অয়াম্বদা কোভিদকী গাইডলাইন ঙাক্না চৎতবসি এৱারনেস চত্থবা ৱাৎনা তৌরিবরা নত্রগা লাইচৎ অসিগী শাথিবদু তশেংনা খঙদনা তৌরিবরা?
অসুম্না সরকারগী গাইডলাইন ঙাক্তবা অসিগুম্বা থৌওং কয়া অসিগী মরমনা মৈতৈ আগরতলা অমসুং মৈতৈ খুঙ্গং কয়াদসু ঙসিদি কোভিদ লাইচৎ শন্দোরকপা হৌখ্রে। জি.বি কোভিদ সেন্টারদা লাইচৎ অসিনা য়াম্না কন্না নারবা মৈতৈ মচা কয়া লায়েংনবা পুরকপুস য়াওরে। আগরতলা শহর মবুক্তা লৈবা মৈতৈ লৈকাই কয়াদসু লাইচৎ অসিনা মরম ওইদুনা অৱাবা কয়া থেংনরি। লাইচৎ অসিনা নারবা মৈতৈ মচা কয়া হোম আইসোলেশনদা লৈরি। অদুমকপু খুন্নাইগী তৎনা থানদ্রবা থৌরমশিং খুন্নাইগী নাৎ কালচার নচিংবা লৈঙাক্কী গাইডলাইননা মতুং ইন্না পাঙথোকপগা লোয়ননা লাইচৎ অসিনা মরম ওইদুনা মতম খরনি অতৈ অতৈ মী য়াম্না তিনবা হরাও কুম্মৈ, লুপ সংস্থাগী থৌরমশিং লেপ্পগী অসি মৈতৈ খুঙ্গংদসু শন্দোরকপা হৌখ্রে। মৈতৈ মচা শিবসু য়াওনরে। অসিগুম্বা থৌদোক অসি খুন্নাই না নুংনাঙদবা ঙমদে।
সোর্স: মরূপ

COMMENTS

WORDPRESS: 0
DISQUS: