“তুম্মিন লৈয়ু অচুম্বা” শৈরেং লাইরিক অসিদা মীৎয়েং অমা

Homeআর্টসৱারেং

“তুম্মিন লৈয়ু অচুম্বা” শৈরেং লাইরিক অসিদা মীৎয়েং অমা

লাইরিক মমিংঃ তুম্মিন লৈয়ু অচুম্বা অইবীঃ ওক্রম মেমা অফোংবাঃ সনথোঙ, ২০২১ লাইরিক লমায় মশিংঃ ১৪৫ লাইরিক্কী মমলঃ ২০০ লাইরিক মখলঃ শৈরেং মখুমঃ বিরেন্

তোংব্রম অমরজিৎ

লাইরিক মমিংঃ তুম্মিন লৈয়ু অচুম্বা
অইবীঃ ওক্রম মেমা
অফোংবাঃ সনথোঙ, ২০২১
লাইরিক লমায় মশিংঃ ১৪৫
লাইরিক্কী মমলঃ ২০০
লাইরিক মখলঃ শৈরেং
মখুমঃ বিরেন্দ্রজিৎ নাওরেম

“… শৈরেংদসু রিভোল্যুসনরি কবি কয়া থোক্লক্তুনা মালেমসিদা লৈরিবা মীওই কয়াবু ৱাখল খন্থহল্লি। অকনবনা অশোনববু তুহৎপীবা, ইনাকখুনবনা লায়রববু উশিৎতবা, নুংঙাইবনা অৱাবা য়েংবীদবা, নুপানা খুল্লিংবা খুনাইদা নুপীশিংনা থেংনরিবা অৱাবা, খুদোংচাদবা কয়াবু খঙবীদবা, লৈঙাক্কা মীয়ামগা মুকনবা, অশোয়বা অরানবা কয়াবু অসুম ফুমদুনা য়ান-য়ানবা চৎলিবা লিচৎ পুম্নমক অসিদা ৱাহং হংনিংলোইদবা কনাসু লৈরমলোই। অচুম্বা পাম্লিবনি হায়দুনা থৌনা উৎপসু য়াদবা মতম, অশেংবা চৎলিবনি হায়দুনা চুম্না চৎপসু য়াদবা মতম। অসিগুম্বা মতমসিদা কবিশিং, অইবশিংদি তুমিন্না লৈথোকপা শুকঙম ঙমদে। …”

অচুম্বদি অচুম্বা ওইনা থোক্লক্কনি অদুননি ইপা ইপুশিংনা হায়রম্লিবা মৈবু ফিনা কুপ্তুনা থম্বা য়াবা নত্তে। অদুবু অচুম্বা হায়বসিনা থৌনা মাংলকপা মতমদদি লাপ্না চেন্দুনা কদায়দনো লৈরুবনা ফরদরা হায়না খল্লকপা য়াওদবা নত্তে। য়ানিংদবা, পেন্দবা নুংঙাইতবা মসিদা ফহন্নিংবা, চুমথোকনিংবা, পুকনিং মরা তপ্না লৈহঞ্জনিংবা হায়বসি লোয়নদুনতা চৎলি। অফবা লৈবনা ফত্তবা লৈবগুম্না পোৎশক খুদিংমক্কি, হীরম খুদিংমক্কী কান্নদবা, অথিবা, ফত্তবা মায়কৈ অমদি মশক লোয়না থেংনগনি। ফত্তবা মশকনা হেঞ্জিনলকপা মতমদদি মদুবু লোৎশিন্দুনা য়োকখৎতুনা থমজিনবা পাম্লক্তে। অদুনা ফোংনা হেক হেক লানশিংনরক্লিবনি অফবা অচুম্বা খরদং পুথোক্তুনা মীওইবা খুনাই অসিবু কনদবা য়াদে হায়দুনা ৱারবা মতমশিংদা, মালেমগী ফাওরবা রিভোল্যুসনরিশিং হেক হেক শাইওন তৌরক্লিবসি। শৈরেংদসু রিভোল্যুসনরি কবি কয়া থোক্লক্তুনা মালেমসিদা লৈরিবা মীওই কয়াবু ৱাখল খন্থহল্লি। অকনবনা অশোনববু তুহৎপীবা, ইনাকখুনবনা লায়রববু উশিৎতবা, নুংঙাইবনা অৱাবা য়েংবীদবা, নুপানা খুল্লিংবা খুনাইদা নুপীশিংনা থেংনরিবা অৱাবা, খুদোংচাদবা কয়াবু খঙবীদবা, লৈঙাক্কা মীয়ামগা মুকনবা, অশোয়বা অরানবা কয়াবু অসুম ফুমদুনা য়ান-য়ানবা চৎলিবা লিচৎ পুম্নমক অসিদা ৱাহং হংনিংলোইদবা কনাসু লৈরমলোই। অচুম্বা পাম্লিবনি হায়দুনা থৌনা উৎপসু য়াদবা মতম, অশেংবা চৎলিবনি হায়দুনা চুম্না চৎপসু য়াদবা মতম। অসিগুম্বা মতমসিদা কবিশিং, অইবশিংদি তুমিন্না লৈথোকপা শুকঙম ঙমদে। খোরিলোলদা অসিগুম্বা খুনাইগী মমি অসি তাদনা খক তোক্তে অদুনা মমিং লৈরবা চার্লস দিকেন্সনা মতমদুগী ফ্রেন্স রিভোলসন্দা য়ুম্ফম ওইবা মহাক্কী নোভেল ‘দি তেলস ওফ তু সিতিস’কি অহানবা লমায়দা ইরি, It was the best of times, the worst of times, it was the age of wisdom, it was the age of foolishness, it was the epoch of belief, it was the epoch of incredulity, it was the season of light, it was the season of Darkness, it was the spring of hope…” নোবেলসি অসিগী ৱাহৈশিং য়াম্না মচিন থৌই। ঙসি ফাওবা লাইরিক অসি মালেমগী য়ুনিভর্সিতি কয়াদা তম্নরি লাইরিক ওইনা। মান্নবা খুনাই অমা লাকনবা হোৎনবদা অইবশিংগী থৌদাং য়াম্না চাওই। অদুগীনি অইবশিং, কবিশিং, লাই য়েকপশিংবু মালেমগী লৈবাক কয়াদা অৱাংবা থাক্তা ইকায়খুম্নরিবা। মখোয়দি ফিলোসোফরনি, থিংকরনি, ভিজন্নরিশিংনি। ওজা এলাংবম দীনমনিনা হায়বীরম্মি, ‘অইবা হায়বসিদি ত্রিকাল উবা ঙম্বা অদুগুম্বা মীওইশিংদুনি। হৌখিবা মতম, হৌজীক অমসুং লাক্কদবা মতম্বু চিংশিন্দুনা উবা ঙমগদবনি’ মসি মতম খুদিং চুমদুনতা লৈরগদবা লাইৱানি হায়না লৌবা য়ারবনি।

অইবী ওক্রম মেমা

অইবী ওক্রম মেমা ২০১৪দা আসাম য়ুনিভর্সিতিদগী কম্প্যুটর সাইন্সতা পিঐচ দি ফংদুনা হৌজীক হৌজীক গুরুচরন কলেজ, শিলচরদা কম্প্যুটর সাইন্স দিপার্টমেন্টকি হেড ওইনা পুরি। মহাক্কী শৈরেং লাইরিক অসিদা পুন্না শৈরেং হুম্ফুতরুক য়াওরি। তোঙান তোঙানবা থিমদা ইদুনা পুন্সিগী মশক, খুনাইগী চৎনবী, নুপী ওইবীশিংগী মপোক, লৈবাক্কী ইসুশিং, নুংশিবা, থজবা, অশা, পোকপা শিবা হিংবা কয়াগী শক্তমশিং, অচুম অরান, য়ানিংবা য়ানিংদবা পুম্নমক মমি তারি অইবী অসিগী অহানবা ফোংবা খোমজিনবা শৈরেং লাইরিক অসিদা।
লাইরিক অসি অইবীগী পোকমিন্নবী মচে, মনিপুরী খোরিলোলদা থৱায় লুপচরম্বী, মনুং মতম চাদনা লাইরম্লেন্দা তাইবঙ মপুগী লৈকোলদা তিনখ্রবী ওক্রম মিনাগী মফমদা কৎচরি। অসিগুম্বা শৈরেং লাইরিক অমা মপাল মনিপুরদা খুন্দা লৈতাদুনা লৈরিবা মনিপুরী অইবশিংগী মরক্তা নুপী অইবী অমনা অসুম্না ইদুনা ফোংলকপা হায়বসি য়াম্না পুকনিং থৌগৎনিংঙাই ওই। ঐখোয় খুদিংনা তরাম্না ওকচরি।

‘ৱাখল চোইরোল’ হায়না মিংথোনবা শৈরেং পরেং মরিনা শাবা অসিনা হৌরগা ‘অমসুং’ হায়না মিংথোনবা শৈরেং অসিনা লোয়শিল্লি। মসি অইবীনা থৌওইনা হাপলমদবসু য়াই অদুবু শৈহৌ অমসুং শৈরোই অসিদা লোয়নরিবসি ৱাহংনি, পাউখুম থিরি পুন্সিনা। তশেংবসু পুন্সি হায়বসি ৱাহং কয়ানা নাউয়োম শাদুনা পোকলক্লবনি হায়বদা হায়মনবা থোকলোই। অদুনা অইবী মেমানা মদোম ৱাখল তৌরি, ‘পুন্সিসে ফাগি ওইরম্লে/ৱাহংনা কোয়শিনবা পাউখুমদি খঙদবা,/ অদুনা/ নোক্লমগে ঙসিসু হায়রমগে নুংঙাইরি/’ ইকোন কোনবগী শৈরোই শৈরেংনা কঞ্জংসন ওইরিবা ‘অমসুং’ অসিদা য়াম্না ফিলোসোফিকেল ওইবা তোন্দা ফোংদোকলি খুনাই, নুপীগী পুন্সি, চৎনবী, হিংবা শিবা পুম্নমক মতৎ মতৎ ওইবা ৱাহৈশিংনা, ‘ঐ অমসুং নঙ/ ঐ অমসুং য়ুম/ ঐ অমসুং ওফিস/ ঐ অমসুং চৎনবী/ ঐ অমসুং মীয়াম/ ঐ অমসুং/ পুন্দুনা থম্লিবা মরী/ হিংবা শিবা/ ঙরাংগা ঙসিগা মান্নদে । ’

শৈরেং অনীসিদা লোয়নরিবা পুকনিংগী মরেপ অমদি থম্মোয়গী মপাউ অদুদি ফনা ফজনা অপাবশিংগী পুকনিং চিংশিনবা ঙম্লে হায়না লৌদবা ঙমদে। শৈরেং অনীসি পাবদা মনুংদা য়াওরমগদবা শৈরেংশিংগী চাওরাকপা মশক মওং খরদি ৱাখল অতিয়াদা চিংশিন্দুনা উবা ফংগনি। লাইরিক অসিগী লমায়শিং হাংদোকনিংবা লমায় অমা হেক্তা হায়দোকপদা থেংনগনি ৱাহৈ চরোং চুম্লবা ৱাহন্থোক লৈরবা মিংথোলগা লোয়ননা শৈরেং মথং মথং ‘পালহল্লবনি তিংখঙ ৱাখল লৈরাং’ ‘নিঙোলগী শক্তমদা নুপী’ ‘নূংদা ময়োন চোংলক্লে’ ঈশিং গ্লাস অমদি নুপী’ ৱাহন্থোক কয়ানা পিক থল্লবা শৈরেং কয়ানি য়াওরিবসি।

খোরিলোলদা অসুম্না মৈতৈ চনুরা অমনা মহাক্কী ওইবা মিৎয়েংদগী পাকনা চাওনা কোনশিন্দুনা হীরম কয়াবু মচা তানা য়াম্না স্যিম্বোলিক ওইবা ৱাহৈশিং, ইমেজরিশিং অমদি ইবগী স্তাইল অমসুং খুৎলান্থোক হৈনা অহানবা খুৎথাদা পাউজেল কয়া লোয়নদুনা পুথোক্লকপসি থাগৎচরি। হেন্না নুংঙাইবা ৱাফমদি, অইবীসি কম্প্যুটর সাইন্সকী ওজানি। মহাকনা সাইন্সকি ফেক কয়াদা প্রাক্তিকেল এক্সপরিয়েন্স কয়া অমদি হৌজীক লাক্লিবা এ আইগী রিভোল্যুসনগী অঙকপা ফংলবা অহোংবা অওনবা কয়া মরক্তা উরিবা মহাক্কী মীৎয়েং ৱাখলসি লৈবাক্কীনি, খুনাইগীনি ৱাজরিবসি মনিপুর ইমাগীনি অমদি ঈগী মরি ইপা ইপুশিংগী খোইরি নাওফম তাফম চীংলোন মাপলনা কোইশিনবা নুংশি লমদম অসিগীনি। ইতৎ তত্তনা তারি মনিপুরগী পাঊ মপাল লমদা চাওরক্লবসু মফমদুদা লৈরবসু। মহাক্কী শৈরেং ‘নিংথৌ, প্রজা অমদি থাজবা’ অসিদা য়েক্লি নকশিন্নবা য়াদ্রিবা লৈবাক নিংথৌ অমসুং প্রজাশিংগী মরক্তা লৈরিবা ৱাংলবা পল অদুবু পুথোক্তুনা। অদুনা হায়রক্লি, তত্তনা তারি নাকোংসিদা অহৌবা খোঞ্জেল/ খোল্লাউ খোঙচৎ…/ অপুনবগী অমত্তা ওইবগী/ লাউরিবা খোল্লাউ তারীবা খোঞ্জেল…/ অশেংবরা? নুংশিনা শৈথাদুনা শক্লিবা ঈশৈ চূম্লবরা! চাওখৎ লমজেল মরক্তা চেক্কি দলান্দ মরক্তা মৈতৈ পোকপী পালেম ইমাবু নুংঙাইনা লৈয়ু হায়না পাউমেঞ্জরি।

মচে মচল ওইবীশিংনা, চনু নিঙোলশিংনা মমা মপা মবুং মৌপ্বাশিংবু কয়াম নুংশিবা কয়াম ফহন্নিংবা পুম্নমক অদু অইবীগী শৈরেংশিংদা মমি তারি। কবিশিংদি নেস্নেলিজমগী ইনোৎ হাপ্লীবা, মমা লৈবাকপু নুংশিবগী ইচেল চেনহল্লিবা খুনাইসিদা য়াইফনবা ৱাখল খল্লিবা মীওই কাংলুপশিংগী মরক্তা মখোয়সু অমনি হায়বসি লাইরিক অসিনা লেংদ্রবা খুদম্নি। পুন্সি হায়বসি খোঙচৎ অমনি। মসিগী অহৌবা নাইবগুম্না অরোইবসু লৈতবা নত্তে। তেল্লবা মতমসিদা করিগুম্বা খরদি খুদোল তম্নিংই। মদুমক অইবীগী ৱাহৈশিংদা য়াওরি। খুনাইগী অশোয়বশিং উবদা তুমিন্না ওজা ওইদুনা লৈথোকপা ঙমজদে অদুনা হায়রক্লি, চুমথোকনিংবা খরা লৈ/ চুমথোক্লিবা খরা অসিনদি/মিৎলু পিরাং খকহনবা ঙমদ্রি…/ শেংদোকনিংবা খরা লৈ/ অমোৎপা পূম্বা কোকহনবা ঙমদ্রি…। ’
মহৌশা অমসুং শৈরেংগী লাইরেম্বী মহাকপুসু মতম খুদিং থম্মোয়দা লাৎচদুনা লৈরি অইবীনা। মসিমক কবি অমা ওইবগী থোইদোক হেন্দোকনা হেক পোকপদগী য়াওরক্লবা মগুন অমনি। শৈরেং ইগদবা মীদি পোক্লকই হায়বদু চুমদুনতা লৈবগুমই। মতাং মতম চারবা মতমদা থিংলুবা ঙমদনা হেক্তা শাফোংলকই। মসিনা লমজিং ওইদুনা অইবীসু ইম্ফালদা লাক্তুনা লাইরিক অসি হন্দক্তা ফোংখিবনি। অইবী অসি লাইরিক য়াম্না পাবা অদুগা মনিপুরী লোনগৈ অসিদা লৈরিবা মচং ওইরবা ফজবা ৱাহৈশিং মতাং চানা চানা হাপ্পা হৈবগী মমি তারি। মিংথোল ওইরিবা ‘তুম্মিন লৈয়ু অচুম্বা’ মসিদা অইবীনা অচুম্বা হায়বসি পার্সিনিফাইদ তৌদুনা অচুম্ববু গ্লোরিফাইদ তৌরি। তশেংবসু অচুম্বা হায়বসি নুমিৎনি, লেংদবা মশকনি, অদুনা মৈগা চাংদম্নরি, লাইগা চাংদম্নরি। অচুম্বা হায়বসিনা মতম পুম্নমক্তা মায় পাকই। অচুম্বা হায়বসি শিবা নাইদে। অচুম্বা হায়বসি ফিদম্নি। তাইবঙপান অসিবু চিংদুনা পুরিবসি অচুম্বনি। অদুবু মসিনা অনৈবা অমোৎপা ঈচেলদা হেক কুমখিবা মিকুপতদি চামথোকপা য়াম্না ৱানা থোকই। লাল্লে খঙলবা, ফত্রে হায়না উরবা খুনাইগী মশকশিং, চৎথরিবা সিস্তেমশিং লৈঙাক্লোন্দা, পুম্নমক খঙনৈ হায়নৈ ফত্রে য়াদ্রে য়ানিংদে অদুবু ফোংনা হায়বা ঙমদে। ওজা ওইরবসু মহৈরোইশিংদা তাকপী তম্বীবগুম্না তাক্লুবা ঙম্বগী পাঙ্গল লৈতে অদুনা শৈরেংদা লাচল্লক্লি শেমদোকনিংবা অনৌবা পুৱারী। অদুনা পন্দুপ অহুমগী শৈরেংদা হায়রক্লি অইবীনা, …লৈতে কনাসু খঙদবা নঙগী থৌনা/ লৈতে নঙগী অতৈ ৱাহন্থোক,/ খঙখ্রবদি নঙবু লৈবাক্কী অঙম্বশিংনা/ থম্বীগনি নঙবু ৱাহৈগী লৈতেং ওইনা/ হায়নহনখিনি নঙবু অরানবনি, …অদুনা নঙদি; তুম্মিন লৈয়ু অচুম্বা’।

চিল্লবা ওজা ওইবগী শিনফমদা লৈনা লৈনা লেপ্তনা শৈরেং লাইরিক কয়া মথং মথং ইবীরক্তুনা মনিপুরী খোরিলোলবু হেন্না চাওখৎনবা হোৎনবদা চাওরবা থৌদাং কয়া লৌবীরক্কনি হায়বগী থাজবা থমজরি।

COMMENTS

WORDPRESS: 0
DISQUS: