ডাঃ শান্তিবালা শামুরাইলাৎপমগী শৈরেং অনী

Homeআর্টসশৈরেং

ডাঃ শান্তিবালা শামুরাইলাৎপমগী শৈরেং অনী

কোঙ্গোলনা তাকখ্রবদা লৈ অমগী মমিংনি নুংশিবা হায়বশে চেদা য়েকপা ফজরবা লৈ অমা। লৈনম য়াওদবা লৈহি চেন্দবা ওনখ্রবদ

কোঙ্গোলনা তাকখ্রবদা
লৈ অমগী মমিংনি
নুংশিবা হায়বশে
চেদা য়েকপা ফজরবা লৈ অমা।
লৈনম য়াওদবা লৈহি চেন্দবা
ওনখ্রবদা থাজবা হায়বশিনা কোঙ্গোল
তনিক্লিবা ইপাক ইরেলথক্কী কোঙ্গোল।
অমা কায়খি
অনি লুপখি
অহুম মাংখি
অশুম তাকখি পুমতাক।
শাগৎলম্বা সনাগী মীতম্দুনা
কাইথরকপদু মচেৎ মচেৎ
য়েংদুনা লেপহৌই পুন্সিনা।

 

শুপ্নতগী

শুপ্নতগী ৱাহৈ অমত্তং
“নঙ লৈরিশিদি”।
অতিয়ানা ইন্থোকখি লৈচীল নোংফাই পুম্নমক
মহাক্কী তাম্ল’ চীদাই অমদা।
থাজ থৱান খোংজোম্নুবী তরুক
য়েংথনরকই মাগী মাগী লৈফমদগী
মমিৎ মনা তথক তথক
থাঙ্গৎনরকই লৈরিক তৈরবা মঙক
খোইমুশিংনা পোমশাৎনবা লৈগী লৈয়োন্নুংদৈ।
লেপখি কাইদ’ হুম্লম্বা মালংশু
হৌনদুনা ইপান্থাগী ঈচেল পুম্নমক্কা
শাইজিন ঈচুমগী তপ তপ খোঞ্জেল
লেপখি খঙহৌদ’ তঙক তঙক।
নোং নোংথাং অমশুং নোংখোং
মথৌ লেপ্নখি ঈচীক হুনখি
চপ লেপখিবদা ঘরিগী কাতানা।
তিনখি সনামচু মীনোক্কী মশেক্লক্তা
মচু লৈতবা পীরাংগী ঈরিকশিং
শাৎকাইরকই কুম পুরবা লৈরাং মালিকা
তুম্দুনা লৈরম্বদু লৈনাগী কাঙ্খলনুং
শুপ্নতগী নঙগী ৱাহৈ অমদা
“নঙ লৈরিসিদি”।

COMMENTS

WORDPRESS: 0
DISQUS: