চৎনবী ওইনা চত্থরক্লিবা শেল থাবা

Homeৱাখল্লোন

চৎনবী ওইনা চত্থরক্লিবা শেল থাবা

ঈশৈ শকপী মমায় নানবীশিংদুগী শৈহেক-শৈদা অমদি শাথেক্তা শেল চাইনবগী লমজেল অমদা চৎখিদুনা লুহোংলিবা পীবা (বর) অদু খোঙ শজিং কয়াম হৌরমগদগে হায়বদু কনামত্তন

লোংজম সমরেন্দ্র (অরুন)

ঈশৈ শকপী মমায় নানবীশিংদুগী শৈহেক-শৈদা অমদি শাথেক্তা শেল চাইনবগী লমজেল অমদা চৎখিদুনা লুহোংলিবা পীবা (বর) অদু খোঙ শজিং কয়াম হৌরমগদগে হায়বদু কনামত্তনা নীংশিংনরুবা নত্তে। লান্ন-থৌরমদা শিরিবা মীদুগী ফোটোদা লৈ কৎপগা লোয়ননা পৈশা কৎনরিবদুদি অৱাবা তারিবা য়ুম্বুদুদা মতেং হেন্না পাংশিনবনি হায়না লৌরসি। লাইশোনগী অমাই পীবা নৎত্রগা বামোন অদুগীদি তোঙান্না অৱামল ওইনা লৈবাক মীয়াম্না লেপ্নরবা শেলগী চাং অমা পীরগা লোইরে।লাইথৌদু কুইনা মতম চংহনবদা নত্তনা লাইগী কাংলোন্দসু য়াম্না কাইবা থৌওং অমনি হায়বসি কনামত্তনা হায়জবা ঙমদ্রিবসি করিগীনো? অরাংফমগী অৱামল ওইননবা লৈপাক্কী ওইবা শেলগী চাং অমা লৈবা অদুগুম্না পুং-ঈশৈ তৌরিবা, ৱারী-লাইরিক তৌরিবা থৌগল্লোয়শিংগীসু চাং অমা শেমদ্রবসি ঐখোয়গী কয়াদা চাওখৎপা ৱাৎলিবনো?

খুন্নাই অসিদা হৌজিক চত্থরক্লিবা শেল থাবগী মচৎ অসিদি ঐখোয়গী খুন্নাই অসিবু মাঙনবগী মচাক্নি। মসিনা অসূম চত্থরক্লবদি খুন্নাই অসি মুৎনবা মাঙনবগী হৌরকফম ওইহনগুমসি হায়না অহানবদা থমজগে।

মীতৈ ঐখোয়গী থৌরম অমা তৌবা মতমদা লাইথৌনা মাঙ থাদুনা লাকই। মীতৈশিংগী পোকপদগী শিবা ফাওবগী থৌরমশিংদা পাঙথোক্লিবা লাইগী থৌরম্না অয়াম্বনি। মসিদা ঙাইহাক্কী নুংঙাইনবা পঙতৌ তৌশিনবনা তুং কোয়বা য়ারোই। হৌজিক চত্থরক্লিবা শেল থাবগী চৎনবী অসিসু তুং কোয়াব য়াখিগদ্রা? মতমগী ঈচেলদা যাওরক্লবসু খুন্নাইগী ওইবা মাঙনবগী ওইরবদি তৌহঞ্জনীংদে। মতমগী ঈচেলগা তুরেলগী ঈচেলগা চপ মান্নৈ হায়না হায়নরিবনি। অনী অসি হৌখ্রবদা হল্লক্তে, চেন্থখ্রবদা হনগৎলক্তে। খেন্নবা অমদি লৈ তুরেলনা চেনবা মফমদুদি লৈহাও চেলহল্লি। ঐখোয়দা কান্নাব পী। মতম্না হৌখ্রবদি নীংঙমদবগী অৱাবা কয়া অমা থম্বীরম্মী। মসিদা লোয়নমক মাঙখিগনি, চেন্থখিগনি, হৌখিগনি মতমগী ৱাদনি লৈহৌগদবদি তৌরুরিবা থৌদোক অমসুং মিংচৎতনি। তুরেলগী ঈচেলনা লৈরায় অশোনবা পুথোকই, মতম্না মীনম্বা, তৌহৈদবা পুথোকই।

খৃষ্টগী ১৮শুবা চহীচা মতমদগীহৌনা লমদম অসিদা হিন্দু লাইনীং চংলকপগা লোয়ননা চাওখৎলকপা মতমসিদগী হৌনা হিন্দু লাইনীং লম্বীগা লৈনবা থৌরম কয়া পাঙথোরকখি। মতুং তারকপদা হিন্দু লাইনীংবু পামজদবা কাঙবুঙশিংনা কুমজা ১৯৩০ দগী নোংচুপ লম কাছাড়গী নাওরিয়া ফুলোনা অপোকপা মরূপ অমদি লমদমসিদগী পোইরৈ অপোকপা মরূপ (ইথৌ ইকানশিদবা) হৌদোরকখি। হৌদোরকখিবগা লোয়ননা মীতৈ থৌরম পাঙথোক্নরক্লি। হিন্দুগী থৌরমশিং নট সংকীর্ত্তনচিংবদা শেল থাবগী চৎনবী করম্বা মতমদা চপ চানা হৌদোকখিবগে হায়বা ঙমজদ্রি।মতাং অসিদা মতমগী ঈচেলনা চেন্থরকপা ঈচেলদা য়াওরকপা অমত্তং পঞ্জবা তারবদা ঙসি হিন্দু লাইনীংগী ওইরবসু মীতৈ লাইনীংগী ওইরবসু শেল থাবগী চৎনবী অসিসু মতমগী ঈচেলদা চেন্থরক্লিবা অমনি। মতম অমদা সংকীর্ত্তন শৈফমদা ঈশৈ তৌফমদা মমাঙ ফম্বীনবা অহল লৈনরমদে। ঈশৈ হৌরমদাইদা মমাঙ ফম্বীনবা লৈতদনা ঈশৈ হৌবা থেঙথনরম্মী। ফম্লিবা খরদুসু মায়কৈ ঙাকপা লাইগী মশক ওইনা খুনাই অসিনা লৌনরম্মী। ফম্বীনবা লৈতদনসু নেক্লবসু য়াওদবা নত্তে। অদুবু হৌজিক্তি মমাঙ ফম্বীনবা অহল শাবা নহা ঙাক্তা থোরক্লে। মসিগী মরু ওইবদি মমাঙ ফম্বশিংদা মমায় তাবা (ভাবোক মমায় তাবা) হায়না শেল থাবা চৎনরক্লি অমদি হিদান্নরক্লি। শেল য়াম্না থায় হায়বগী মমাঙ ফম্লবা হৌজিক হেনগৎলক্লি। শেল য়াম্না থায় হায়বগী মমাঙ ফম্নবা হৌজিক য়াম্ন হেনগৎলক্লি। অমারোমদা অমুক মপান লমদা হৌজিক হৌজিক ম্যাম্মারগী মন্ডলে অমসুং মন্ডলেগী অকোয়বদা খুন্দারিবা মীতৈ/মৈতৈ বামোনশিং (কতে অমসুং কতে পাউনাশিং) না সংকীর্ত্তনগী শৈফম অমদা শেল থাবগী চৎনবী লৈত্রি। সংকীর্ত্তন ময়ায়দা চংবা তারবসু মচুগী ফি মফম অমদা পৈদুনা থম্নৈ। থম্নরিবা ফিশিংদু লৌরগা পালাশিংদা থাবা অমদি খুরুম্বা চংনৈ। শিল্লি লাংলিবশিংনা সংকীর্ত্তনদা থাখ্রবা ফিশিংদু অমুক খোমজিনবসু চংনৈ। শিল্লি লাংলিবশিংনা সংকীর্ত্তনদা থাখ্রবা ফিশিংদু অমুক খোমজিনবসু চৎনৈ। বাংলাদেশতা লৈরিবশিংসু অদুমঙায় সংকীর্ত্তনদা শেল থাবগী চৎনবী মপূং ফানা লৈত্রি। হৌজিক ফাওবা মখোয়না ঙাক্তুনা চৎলিবা অসি ঙল্লিঙৈ মতমদুগী চৎনরকপা মচৎ অদু ঙাক্তুনা থম্বনি। মীতৈনা তাব নোংপোক্লম, নোংচুপলমদসু চৎনদবা পুমতোপ তোপ্পা চৎনবী অমা চৎনরক্লিবা অসিদি ঐখোয় মাঙনবগী মচাক্নি।

লাইদা লৈ মনা অমত্তং কৎহৌননবা লাইগী থৌরমদু ঙন্তা চৎলু হায়বদি হায়নৈ। লাইদা পৈশা কৎপগী চৎনবীসিদি করম্বা মতমদগী কনানা হৌদোকখিবনো হায়বসিগী ৱারী ৱাথোংদি তাবা ফংজদ্রি। লাই তিনগী থৌরম পাঙথোকপদা ইমুং খরদি, ‘শেল থাবীগনু নৎত্রগা শেল কৎপীগনু, থমজরিবা লৈসি কৎপীয়ু’ হায়না ইরগা চে থেৎপসু থেংনজৈ। মসিদগী ঐনা খঙজবদি লৈগী মহুৎসি পৈশানা পুরা শিন্দোকপসি য়াখিরোই হায়বসিনি। সনাগী মহুৎ য়াইঙংনা শিনবা য়ারিসিনা ঐখোয় মীতৈগী চৎনবীনি। মতৌ অসুম্না ঐখোয়গী চৎনবীদা মরিং-মরাংবা থোকহল্লিবা কয়াসি ঐখোয়না মতম চানা খন্নহৌদবা য়ারোই। শোমদনা শেৎন-খায়নখিবগী অৱা-মৈশা লাংদুনা কপ্লিঙৈদুদা লান্ন-থৌরম/মথৌ য়াংগেনবা (মীরোন্দনা ‘শ্রাদ্ধ’, ঐখোয়না শোরাৎ) পাঙথোকফম্বু ঈশৈ-নোংমাই তৌদুনা শেল তানবগী হিদান্নফম অমগী মনুং চন্না ওন্থোকপসিদি তশেংনা য়েংজনীংদে। মসিদগী থোরক্লিবা ৱাথোক্নি। পুং-ঈশৈগীদমক অয়াবা হান্না পীথোক্লুরগা হেন্না ইনাক খুনবা ইমুং অমগীদা চথোকখিদুনা শোমদনা মচা-মনাই অমা থাজিল্লক্তুনা খৎন-লাওনরিবা কয়াসি। মাইবা, মাইবী, পেনা অশৈবশিংনসু লাই হরাওবুং অনী নৎত্রগা অহুম/মরিগী অয়াবা লৌশিন্দুনা লাপ্না থাবনা মচা মনাই (সেবক) ওইনা থাজিল্লুবদগী লাউন্নরিবা কয়া অমদি নংনবা চেন্নবদা লম্বীদা খুদোংথীবা (এক্সিডেন্ট) থোক্লরিবা কয়ানি। তশেংবদি, লান্ন-থৌরম হায়বসি মী অমা শিখিবগী অৱা-অনাগী মৈচাক নংলবা ইমুং-মনুংগী মীওইশিংবু লাইনীং লম্বীগা মরী লৈনবা পোকপা-শিবগী নুংগী ওইবা ৱাউলোন য়াওবা ৱারী/লাইরিক/ঈশৈ তাহন্দুনা অৱা মৈশাদু খরদং ওইরবসু হন্থহন্নবগী লাইথৌনি। মদুদা ময়ামসু লাইদা লৈ মনা অমমমদং কৎতুনা অৱাবদু শরুক য়াবনি। য়ুম্বুদুদা মতেং পাংবা ওইনা পোৎয়েং খরা পীবদুনা ৱাফম অমনি। শেল থাবগী/চাইবগী থৌওংশিংদুনা লাইথৌদুগী মশক থিহনবদা নত্তনা লাইথৌ পাঙলিবা অমাইবা/বামোন, পুং-ঈশৈ তৌবশিং অদু শেলদা ঙাওহন্ননবগী ইথিল অমা পীশিন্দুনা লাইথৌদা পুক্নিং চংবা হন্থহল্লি অমদি মরম চাদনা লাইথৌদু মতম শাংনা চত্থহল্লি। শেল থাবগী লমজেল অসিদা য়াওবা ঙমজদবশিং অমদি য়াওজনীংদবশিংদি মীগী থৌরমগা অমত্তা চৎনীংদবা ফাওনরে। ভোটকী লাং থাকপদগী অয়াম্বা ওইখিবা ভাবক মমাঙ ফম্বশিংদা শেল থাবগী চৎনবী অসিনা মখুউ-মখুউশিংদু থাঙ্গৎতুনা কৃক-কৃক ইন্নবনা লৈতানা ফম্বা ফংজদ্রবা অহল শাবা নহা ময়াম অমসু ঙসিদি ঐখোয় পুম্নমক্না উবা ফংনরে। লাই কৎননবা হায়দুনা য়ুম্বুদুনা লুপা চৎপী চান্দি ওইনা কায়থোক্লগা তেঙ্গোৎ অমদা হাপ্লিবদু শীজিন্নখ্রগনি খন্দুনা অমাইবা/বামোন্দুনা হান্না তরা চৎপী থাদনবগী থৌওং কয়াসু ময়াম্না তোয়না থেংনরবা ৱাফমনি।

ঈশৈ শকপী মমায় নানবীশিংদুগী শৈহেক-শৈদা অমদি শাথেক্তা শেল চাইনবগী লমজেল অমদা চৎখিদুনা লুহোংলিবা পীবা (বর) অদু খোঙ শজিং কয়াম হৌরমগদগে হায়বদু কনামত্তনা নীংশিংনরুবা নত্তে। লান্ন-থৌরমদা শিরিবা মীদুগী ফোটোদা লৈ কৎপগা লোয়ননা পৈশা কৎনরিবদুদি অৱাবা তারিবা য়ুম্বুদুদা মতেং হেন্না পাংশিনবনি হায়না লৌরসি। লাইশোনগী অমাই পীবা নৎত্রগা বামোন অদুগীদি তোঙান্না অৱামল ওইনা লৈবাক মীয়াম্না লেপ্নরবা শেলগী চাং অমা পীরগা লোইরে।লাইথৌদু কুইনা মতম চংহনবদা নত্তনা লাইগী কাংলোন্দসু য়াম্না কাইবা থৌওং অমনি হায়বসি কনামত্তনা হায়জবা ঙমদ্রিবসি করিগীনো? অরাংফমগী অৱামল ওইননবা লৈপাক্কী ওইবা শেলগী চাং অমা লৈবা অদুগুম্না পুং-ঈশৈ তৌরিবা, ৱারী-লাইরিক তৌরিবা থৌগল্লোয়শিংগীসু চাং অমা শেমদ্রবসি ঐখোয়গী কয়াদা চাওখৎপা ৱাৎলিবনো? শেল থাবসি কয়ামুক পাম্নরবগে হায়ববু খুনগী শরোই খাঙবদসু ইমা-ইবেনশিংনা লম্বী অচৎ-অওকশিংবু থত্তুনা শেল থাহনবা অসিসু অনৌবা মথেল অমা ওইরক্লি। মশাগী ওইবা চপ-চাবা কাংলোন অমা লৈজরিবনি। মদুগী শরুক অমা ওইনা লাইশোন ঈশৈ হৌগৎলকপা শৈহৌ (মীরোন্দা ‘রাগ’) তাদ্রিঙৈদা উমংলাই হরাউবুংদসু লাইবৌলা থাগদৌরে অমদি হোইরৌ হোয়া শক্কদৌরে নখোঙ-নখূৎ লেঙগনো হায়না লাউথোক্লিবসিনি। মদু থুগায়রুবা অদুবুনি ঐখোয়না লাই লম্লানবা হায়না খঙনরিবসি। চিংঙু খোইয়ুম অশীবা শন্থোং নিংথৌ পানবা লাইয়িংথৌ সনামহিনা শোন্নপুঙ শঙলেনগী মপূং ওইনা লেঙশিনবিরিবা মফমদুদা লাইথৌ পাঙলিঙৈদা চংদুনা শেল থাবগী থবক চত্থনবসি ফগদ্র ফরোইদ্র হায়বসি খন্থনবগী মতম ওইরে। শোন্নপুং হায়বসি কয়ামুক লুবা মফম্নো হায়ববু শুমাঙ কুহ্মৈ পাঙথোক্লমদাইদা ঙসি ফাওবা থৌগলগী শৈহৌ ঈশৈ শক্তুনা লাই খুরুম্বগী চৎনবী অমা লৈরিবসিনি। মতম অমদা হায়রিবা কাঙলোন অসি গৌড়লীলা অসি অমদি রাস লীলা শান্নবদা ফজনা ঙাকপগী চৎনবী অমা লৈরম্মী। কনামত্তনা গৌড়লীলা অমদি রাস লীলা কৎলিবা লাইগী শান্নবুংদা চংদুনা শেল থানদে। উমংলাই হরাওবুংদসু অদুমঙাই কুঞ্জা জগোইদা নত্তনা লাইবৌলা হেক থাখিবদগীদি লাইগী থৌরমগী মতাং অমত্তদা চংদুনা শেল থাবা য়াদে হায়না কাঙলোন্না হায়রি। লাইগী য়ু ওইরিবা ‘পুকয়ু’ অশেংবদি কৎত্রবনিনা অমাং-অশেংসু খঙদ্রবা কালৈ য়ুমাংদা চপ-চানা হাওব (তাঙ্খুল শাবা) না থকচিল্লুবদগী ঙাওখৎলক্তুনা মতমগী ঈশৈগা মখল-মথেল ঙাওশক শক্কৎলক্তুনা অমদি তাঙ্খুল শাবনা নুরাবী তান্নবদা কা হেন্না য়েংহৈদবা তৌহৈদবা কয়া তৌদুনা ঙাওশিন্নরকপা অদুদা তৌহৈবা-তৌহৈদবগা অমত্তা খঙদ্রবা য়ুঙাওবা খুঞ্জাশিংনা চংশিন্দুনা মওং তাদবা মীৎ নাবা (ফীভম) দা শেল থাবগী কুহ্মৈ অমা অমুক হাপচিল্লিবা অসি উরবদা মীতৈগী চৎনবী অসি কদাই ফাওবা লৈখা তরবগে হায়বদু খঙবা ঙম্মী।

চৎনবী ওইনা চত্থরকপনা ঙসি ফাওবদা নুপীনা ঈশৈ শকপা, চোলোম তৌবা মতমদা শেলদি থানৈ অদুবু পাকথদুনা খুরুম্বদি চৎনদে। মসি লৈবাক নিংথৌ পাল্লিঙৈদা খন্নবা য়ারবা মতুংদা তরেৎ তরা থোক্না মসিদগী কোক্লসি, মসিমখৈদি য়ারসি হায়না লেপ্নরম্বা লৈবাক খঙনা পথাং-পুথাং নাইনা শমথরকপা মচৎ অদু লৈবননি। অদুবু লুরিবদি লাইরিক্না মীরমদা মীরোলদা তম্লুরগা মীতৈগী চৎনবীদি করিমত্তা খঙনীংদবা তমহৌদবনা মীমাঙ থোক্লগা অচোপ-অরেম খঙলক্তবা অসিনি। পীশক পীকপা ঈরৈবাক অসিগীসু অচৌবা ইপাক কুম্লবা তম্বগী লোইবা খম্বা নাইদবা তোপ-তোপ্পা মচৎ অমা লৈজরি হায়বসিনি। ঙসিগী মীপূম তিংনা থিমিন্নবা খঙমিন্নবা চইং। নৎত্রবদি মীতৈৗদা তম্বদা মশাগী মমি ফাওবা উবা ফংলরোই। ফনা নুংশিনবা নুপা নুপীদো, লৈবাক্কী নিংথৌদো, লৈমদো মীমাঙ থোরকপা মতমদদি খক লেঙ্গোন্নদুনা খুজেং পায়নদুনা লেপখিদবনি। মতু ফূবদা মৱাদুনা মীয়াম মমাঙদা খুবাক্না থাবা য়াদবনি। থাবল চোংবা নত্তনা লৈশা পাখং অমত্তনা খুজেং পায়নদবনি। মকুবোক অমত্তনা মচা-মমৌগা লোয়ননা পুখুম অপাকপা অদা চাক চামিন্নদবা মীতৈ ফুরুপনি। অদুনা অমনা অমগী ফিজি ফিনা নেৎলুবদা লৈবাক্না মীয়াম্না করম্বা মীখোঙদা নেৎশিল্লগা ৱারক্তবা মচাগুম মীমাঙ থোরক্তুনা পঙতৌ তৌবসি ৱারকপীবা লৈতবা মাল্লক্কনি। লুহোংবদা লৈ চাইবগী মহুৎ শেল ওইনা চাইথরকপা, কুন্ডো পরেংনা লৈ হুকপগী মহুৎ লিশিং চৎপী পরেং শারগা হুক্নবা লুহোংবদুবু মীতৈগী লুহোংবা কৌবা য়ারিব্রা। লুহোংবদা বম্বুলা থাগৎলকই, পেন্দদুনা নিংঙোল পিবা অনীগী কাঙবু ওনশিন্নদুনা শুমাঙদা ইমুংদা জগোই শাগৎলকপা অদুসু ঐখোয় অদুম য়েংখিসিরা করিনো অমদি খন্নবিবা মতম ওইরে। শেল (পৈশা) হায়বসি তাইবং মীওইবনা খ্বাইদগী পাম্বা পোৎ ওইবনিনা লাইথৌগা শেলগা কা হেন্না মরী লৈনহল্লক্লবদি লাইথৌদা অকায়বা কয়া শোয়দনা লাক্কনি। ভাগ্যচন্দ্র অপেন এয়ার থিয়েটার (বোট) কী ঈশৈদা অমদি বাশক্তা ইনীং তৌবগুম্না লাইথৌদদি তৌদনবা লৈবাক্কী মরী লৈনবশিংনা তুং কোয়গদবা কাঙলোনশিং শেমহৌবা য়াম্না তঙাইফদে হায়জনীংই। তৌরিবা থৌদোক পুম্নমক মতমগী খোঙলৈ মতুংইন্না হোংলক্লবসু মওং-মরিন তানা হোংহন্নিংই।

COMMENTS

WORDPRESS: 0
DISQUS: