চম্লবা পুন্সি অমসুং নুংশিরবা খোঙচৎ অমগী চেংজেল পুদুনা লাকখিবা কবি রঘু লৈশাংথেমগী শৈরেং লাইরিক “খুঙ্গংগী চিঠি”-মীৎয়েং অমা

Homeআর্টসশৈরেং

চম্লবা পুন্সি অমসুং নুংশিরবা খোঙচৎ অমগী চেংজেল পুদুনা লাকখিবা কবি রঘু লৈশাংথেমগী শৈরেং লাইরিক “খুঙ্গংগী চিঠি”-মীৎয়েং অমা

  নোঙ্গাখ্রে হায়বসি পাউ তারবসু থাজবদি সুকঙম ঙমদে। মরমদি মহাকনা মনিপুরী খোরিলোলদা তৌরম্লিবা খুদোলশিংদি হীংদুনা অদুম লৈরি। নুংশিবা পাউজেল কয়া পুদু

 

নোঙ্গাখ্রে হায়বসি পাউ তারবসু থাজবদি সুকঙম ঙমদে। মরমদি মহাকনা মনিপুরী খোরিলোলদা তৌরম্লিবা খুদোলশিংদি হীংদুনা অদুম লৈরি। নুংশিবা পাউজেল কয়া পুদুনা অদুম চৎলি। শিবা অমসুং হিংবগী ৱারীদা খেন্নরিবসি তেল্লবা পুন্সি খোঙচত্তা তৌরম্লিবা থবক অদুনা পথাপ ওইবদুনি হায়বসি কবি রঘুনা উৎলম্লি। পুন্সি চেংজেল পুদুনা নোংমা লাকখি হরাও তরাম্বা মীনোক কয়াগী মরক্তা। কৌরৌনা মতম লোয়দুনা নোংচুপ চীংদোল ৱাংমদা নোংমা তপ্না তপ্না তাখিবদা পুন্সিসু মাগী মতুং ইন্দুনা চৎখিবা ঙাক্তনি। করম্নদি থিংলুগনি নোংদম্বা মাগী খোঙচৎপু তাইবঙনা।

অইবাঃ রঘু লৈশাংথেম
লাইরিক্কী মমিং- খুঙ্গংগী চিঠি
লাইরিক্কী মখলঃ শৈরেং
অফোঙবাঃ কিং পব্লিকেসন, থাংমৈবন্দ, ইম্ফাল
লাইরিক্কী মখুমঃ ঈশ্বর লৈশাংথেম

“ইরকই/খুঙ্গংগী চিঠি/ কনা হন্না য়েংবীদ্রবা তোর্ব্বানশিংদা/ উপালশিংনা ঙাইদুনা লৈ ঊচেকশিং।/ সনা খোংনাং পাম্বীদুদি/ ঙরাং অহীং তুরেলগী তোর্ব্বান নীখায়বদা/ ঈচেলগী ঈরোন্নুংদা লুপশিনখ্রে খুনসিদদি লাউরক্লি/ পেন্দ্রবা পামদ্রবা থৌদোকশিং…” খুঙ্গংগী চিঠি (লাঃ৩৭)
খুঙ্গংগী মপাউ, তোল্ল তারবা পুন্সি কয়াগী তেংথাখোলদি ঙসিসু নীংথিনা তাবীনবা লৈঙাক্কী লুচিংবশিং মশিং য়াম্না লিক্লি। ইরক্লিবা থম্মোয়গী নুংহিকনরবা চিঠিদি নুংশিবা পাউখুম অমত্তসু চাদৎনরবা পুন্সিশিংনা মপুং ফানা ফংখিবা লৈত্রি। ইনাকখুনবা অমদি লায়রবা অনীদি শম্বলদি মীওইবনা চাওখৎ লম্বেলদা মাংদা চংশিনবা হেল্লকলিবমখৈ হেণ্ণা হেন্না ৱাংবা হেল্লক্লি। চম্লবা খুঙ্গংগী পুন্সিদি ঙসিসু চোংবা ঙমজদ্রি য়েন্নিং। কবিনা নুংশিরবা উচেকশিং অমদি উপালশিংবু ইমেজরি ওইনা শিজিন্নদুনা পুন্সি কয়ানা উপায় লৈতনা থেংনরিবা লানফমশিংদু শৈথারি। শৈরেং অসিনা মিংথোল ওইদুনা কবি রঘু লৈশাংথেম্না ফোঙখিবা লাইরিক অসিদা পুন্না শৈরেং ৬৫ য়াওরি। লাইরিক অসিদা কবি রঘু লৈশাংথেমদা লেমজনিংঙাই ওইরবা সাহিত্য একাদেমি এৱার্দ ২০০৯ পীদুনা ইকায়খুম্নবা উৎখি।

                                       রঘু লৈশাংথেম

মনিপুরী খোরিলোলগী তাইবঙদা কবি রঘু লৈশাংথেমগী খুদোল য়াম্না পাক চাওই। ইং ১৯৯১দগী হৌনা পুন্সি তেলঙ্গা; লানবু লৈ ওইনা শান্নরিবা(১৯৯৫); নুং অসি লাইনি লৈ অসি ঈনি (১৯৯৫); হনুবীগী ঈশিং পুন(২০০২) অসিনচিংবা শৈরেং লাইরিকশিং মথং ফোঙলমখি। অঙাংশিংগী খোরিলোলদসু পুকনিং চংনা ইরমখি। অতিথি উচেক (অঙাংগী ৱারী, ২০০৩); পাৎপানগী থোইবী (অঙাংগী ৱারী) লাইরিক অসিদা অমুক লেমজনিংঙাই ওইরবা সাহিত্য একাদেমি বাল পুরুস্কার এৱার্দ, ২০১৩ পীদুনা ইকায়খুম্নবা উৎখি মনিপুর লৈরিবা সাহিত্যগী লূপ কয়া, দি কলচরেল ফোরম মনিপুর, নহারোল সাহিত্য প্রেমি সমিতি, ৱাইটর্স ফোরম, পেত্রিওতিক ৱাইতর্স ফোরম, অশৈলূপ মনিপুর অসিনচিংবা লূপ কয়াগী মরু ওইবা থৌদাং কয়া লৌদুনা মনিপুরী খোরিলোল চাওখৎনবা থৱায় য়াওনা চেন চোংলমখি। চোকথবা লৈতনা নহা অহল খেন্নবা থমদনা মীপুম খুদিংমক্কা লোয়না তিন্নদুনা মনিপুরী খোরিলোলদা পুন্সি কত্থোকলমখিবা অইবা অমনি রঘু লৈশাংথেম। কবি অসি ১৯৫৪দা থৌবাল লৈশাংথেমদা তাইবঙ খোঙদারকখি। এক্সাইজ দিপার্টমেন্টতা দিপ্যুতি সুপরিন্টেন্দেন্ট ওফ এক্সাইজ ওইনা থবক তৌরমখি। হৌজীকনা থাংমৈবন্দ মৈস্নাম লৈকাইদা য়ুম হোংলক্তুনা লৈবনি। হন্দক ইখঙ খঙহৌদনা নুংশিরবা ইমুং মনুং মরুপ মপাং অমদি মহাক্কী নুংশিরবা খোরিলোলগী ঈংলবা তাইবঙ অসিবু থাদোক্লমদুনা হৌখিবা সেপ্তেম্বর ১০, ২০২১ইংদা মপুগী লৈকোলদা পুন্সি চেংজেল লোয়দুনা অরোইবা খোঙচৎ অদু চৎখি। নোঙ্গাখ্রে হায়বসি পাউ তারবসু থাজবদি সুকঙম ঙমদে। মরমদি মহাকনা মনিপুরী খোরিলোলদা তৌরম্লিবা খুদোলশিংদি হীংদুনা অদুম লৈরি। নুংশিবা পাউজেল কয়া পুদুনা অদুম চৎলি। শিবা অমসুং হিংবগী ৱারীদা খেন্নরিবসি তেল্লবা পুন্সি খোঙচত্তা তৌরম্লিবা থবক অদুনা পথাপ ওইবদুনি হায়বসি কবি রঘুনা উৎলম্লি। পুন্সি চেংজেল পুদুনা নোংমা লাকখি হরাও তরাম্বা মীনোক কয়াগী মরক্তা। কৌরৌনা মতম লোয়দুনা নোংচুপ চীংদোল ৱাংমদা নোংমা তপ্না তপ্না তাখিবদা পুন্সিসু মাগী মতুং ইন্দুনা চৎখিবা ঙাক্তনি। করম্নদি থিংলুগনি নোংদম্বা মাগী খোঙচৎপু তাইবঙনা।
“অঙাংগী ঈশৈ” (লাঃ ৩৬) শৈরেং অসিদা তেংথারিবসি হৌজীক্কী মতমসিনি। নে তাদ্রবা মালেম, হিং অমদি শান্তি হায়বসি তুরেল্গী তোর্ব্বান ৱাংমগুম্না চৎলিবা খোঙচৎ অদুনি মহাকনা য়েক্লিবসি। কবিনা থিরি শান্তি হায়বদু করম্না ফংগনি হায়দুনা। অদুনা নীংশিংলক্লি ৱাহৈশিং, ঐগী ইমানা হায়/ নঙ পোক্লমদাইদা বুধ নিংই মঙাল ফংনবা/ ঐগী ইপানা হায়/ নঙ পোক্লমদাইদা যীশু অল্লা কৃষ্ণ নিংই শান্তি ফংনবা।/ শান্তি ইখৌ লাংজরিবা কবিনা তাইবঙনা নিংনা-লাৎনরিবা লাইয়ামশিং অসিবু তুলি পায়দুনা য়েক্লুই অদুবু থোকলক্লিবা শক্তমদি মতমগী মুর্তি ওইনা থোক্লকলি হায়রি। মসিদা মতমগী মুর্তি হায়রিবসি তোঙাণ তোঙানবা শকলোন্দা উরিবা হিংশাগী শক্তমশিং অমদি মসিবু থৌওইনা থোকনবা হোৎণরিবা কাংলুপশিং অদুনি।
মশিং য়ামজদনা ইংনা লৈরম্বা লৈবাক অমনা খঙহৌদনা থৌশিল থৌরাং শোয়বা অমদি মিৎয়েং শান্না উরুদবদগী ঙসি খুদোংচাদবা কয়া, ৱাথোক লান্থোক কয়া অমদি মীশি মীনা ফাওবা লাক্তুনা ঙসিদি লৈবাক্কি ওইনা চাওরবা পোৎলূম অমা ওইরি মাইগ্রেন্ট ইসুনা। কবিদি মসি হান্না উদুনা মসিগীদমক ৱাদবা ঙমদে অদুনা ইরম্লি, “ ঐগী সহরগী ৱারী” অদুনা হায়, “ ঐগী সহরদি/ বত্তর্ন ফংদনা লাকপা অতিথিশিংনা/ কৃক কৃক ঈন্নরি/ মশা মশাগী মখূৎ তিংথোক্লদু…লম্বীশিং/ অপীক অপীকপা গলিশিং/ ঐগী সহর…নুংগী মূর্ত্তি/ তুমীন লৈরি মোৎলবা হণথি হঙাই মরক্তা” (লাঃ ৩৪) পেন্দবদি কয়ানি ইম্ফালনা অসুম্না মহৌশাগা মান্নদনা হোংলকপদা। শৈরেং অসিনা খুদোম্বি থিন্দুনা তাক্লি তুমিন্না লৈরিবা নুংগী মূর্ত্তিশিংদা। মখোয়দা তানবা নাকোং পান্দে অমদি মীনুংশি লৈতে হায়বদু শৈরেং অরোইবা পরেং অসিনা ফোঙদোক্লি। থৌশিল শোয়রে, থৌরাংশিং কদায়দনো অমা লাল্লে হায়বদুনি কবিনা ফোঙদোকনিংলিবসিসু।
নীংতম্বা অমসুং লৈবাক নীংবা হায়বসি মতম খুদিংদা মুকনদুনা লাক্লিবা লমদম অমা ওইরিবা মনিপুরদা কবি রঘুগী ফিরাল হায়না মিংথোনবা শৈরেং অসিসু য়াম্না ৱাহন্থোক লৈ। কবিনা উরিবা মিৎয়েং অমদি য়েক্লিবা শক্তম অসিমকসু তশেংনা থোক্লিবা লোয়নাইদ্রবা চেন্থরিবা পুৱারী অদুনি। অদুনা কবিনা হায়, “ফিরাল।/ মোংফমসিদা চিংখৎলক্লি/ মঙ মঙলিবা উচেক মচাশিংগী/ মঙফাওনদ্রিবা অমম্বা অহীংদা।” (লাঃ ২৭)শৈরেং অসিগী তেল্লবা পরেং খরসিদা মনিপুরগী নীংতম ইহৌ, স্তেত অমসুং নন স্তেত অনীগী মূকনরিবা ফিভম অমম্বা অহীংগুম্না নোংঙানবা ঙাইরিবা খুনাই অসিগী নে তাদ্রিবা পুন্সি অদু ময়েক লানা ফোঙদোক্লি। মসিদা কবিনা শিজিন্নরিবা উচেক, অহীং, শুক্লবা উমং, মোংফমগী ইমেজরি অসি য়াম্না চংখোল্লি।

খুনাই অমদা নুপী ওইবীশিংনা লৌরিবা থৌদাংশিং অসি অসুক্কী মতিক চাওখ্রে অদুবু নুপানা খুল্লিংদুনা পাল্লকপা খুনাইশিংদা নুপীশিংনা ফংগদবা ফংফম থোকপা হকশিং অদু ফংদনা মতম কয়া লাকখি। গনতন্ত্রা চৎপা লৈবাকশিংদা ফাওবা অঙনবা মতমদা নুপীনা মীখল থেংনবা অমদি মীখলদা মীহুৎ খনবা ফাওবা শরুক য়াদনা লাকখিবা ৱারীশিং পুৱারীগী লমায়শিংদা থেংনদুনা লাকখি। নুপীশিংবু লাইরিক লাইশু তম্বা ফাওবা নীংথিজনা পুকনিং থৌগৎলমদবা কয়াগী ৱারী তাদবা নত্তে। অদুবু নুপী খুনাই অসি য়াওদনা খুনাই অমা মাংলোমদা চৎপা ঙম্লোই হায়বসি কবিনা খঙই অদুননি মহাকনা নুপী হায়না মিংথোনবা শৈরেং অসিদা নুপী ওইবীশিংবু পুকনিং থৌগৎতুনা ইরিবা, নুপী/ নঙদি মৈ ওইগদবনি/ নঙদি লৈ ওইগদবনি/ ওইগদবনি নুঙ/ মৈরা/ মমা…করিগীনো? তুশোন মানশোন্নরিবা/ নশা অনী ফন্দোকপা ঙমজদ্রিবা…থাঙ্গৎলু/ নখূৎ/ মঙালনি নঙদি নুমিৎ থা থৱানমিচাক/ মমানি নাউশুম হাইরিবী মৈরা পায়রীবীনি/ নঙ য়াওদনা কনানা তাইবং শেম্বগে” (লাঃ ২৫)
হৌজীক হৌজীক্কী লৈঙাক্তা থোক্লিবা চৎনবী অমা ওইদুনা মরু মারা তাখ্রে হায়না লৌনরবা শেঞ্জা থুমজা অদি অশেংবা অচুম্বা হায়বদু থিবা ৱারবা মতম অসিগী শক্তম য়েক্লিবা শৈরেংনি “উপাল অমগী উশা অনী” কবিনা হায়রক্লি, “নোংমা নেতা অমনা পব্লিক মীটিং অমদা/ ঙাঙখিবা ৱাহৈ খরা/ পুরকই য়ুমদা/ থাজিল্লি উপাল ওইনা ঐনা/ অসুম চাওখৎলকই/ ঙসি ফাওবদি উহৈ অমত্তা পাল্লকত্রে/ থিন্দোরকই ঊশা অনীখক্তি/ অসুম থিন্দোরকই…উপালদুনা নোক্লদুনা খোঞ্জেল থোকনা লাউরকই…পৈশা পীয়ু লুপা পীয়ু” (লাঃ ৩) য়াম্না ফজবা শৈরেংনি।
কবি অসি মতম পুম্নমক্তা শান্তিবু ইখৌ লাংজবা অইবনি হায়বসি মহাক্কী শৈরেং মন্দেলা হায়বসিনসু অদুমক ফোঙদোক্লি। মীওইবগী পুৱারীদি অৱা-অনা অমদি মীওৎ মীনৈগী ৱারীতনা পীক থল্লি। শক্তি পায়বা লৈবাকশিংনা পাঙ্গল শোনবা মিচং লৈজদবা লৈবাকশিংবু খুদুম চন্দুনা অমদি লোয় চন্দুনা মীনাই নাইথাং ওইহন্দুনা চহী চা ক্য়া পাল্লকপগী ৱারী লোয়বা নাইবা নত্তে। অদুনা অফ্রিকা নীংশিংলক্লি কবিনা। “কৈশুমশঙগী/ থোঙ হাংদোকরকই মন্দেলা/অফ্রিকাগী ঊনাগী খাংপোকশঙশিং/ অমম্বদু ঙসিদি/ কিদুনা লোৎখ্রে/ মঙালগী থৌরবা থাঙশাংদা/ মীনায় নাইথাং/কিশি থোকখ্রে বন্দিগী থৌরি কোঙ্গোই/ কৌরক্লে ঙসিদি অফ্রিকাগী অতিয়াদা/ নীংতম্না পাইরক্লিবা উচেকশিংনা/ (মন্দেলা” লাঃ ৯) শান্তি হায়বদুগী সীম্বল মন্দেলানা ওইরে ঙসিদি। মীওইবগী হকপু খোঙগাওনরিবা মখোয় মায়থিখিবনি। অচুম্বা হায়বসিদি মতম খুদিংমক্তা চুমদুনা লৈ হায়বদু শৈরেংদসু হেন্না ময়েক লানা তাহল্লি কবিনা। মীওইবনা চৎকদবা লীচৎ হায়বা অমা লৈ মসি করিগুম্বদা হেক হেক নাথৈদুনা চৎপা মিকুপশিংদা নাপল কারক্তুনা তৌরোইদবা কয়া পাঙথোক্লী মীওইবনা মসিনা অমুক অমুক লৈখা তারকনবগী মরম অমদি ওইহল্লি হায়বসিসু মহাক্কি শৈরেংশিংনা পিবা পাউজেলনি।
লান তৌরগা পেঞ্জরিবা মখোয়গী মফমদা নীংশিংহল্লি শৈরেংনি “লান লেপ্তে লান লোইদে”। হৌজীক হৌজীক ফোং ফোং শারিবা লানফম কবুল মিৎমাংদা চোংথোক্লকলি। লন থুম শক্তি মুন্নবগী অমদি লৈবাক মশেল মরক্তা থোক্লিবা লানফমশিংদা “মন্দিরগী কাংশি মখোলসু/ ওল্লক্লে লাণগী খোল্লাউ/ চম্লবা খুঞ্জাশিংগী খাংপোকশঙগী ফক্লাংদা/ তারিবা দাকফমশিং/ নোংমৈ মখূল ঙাক্তনি…লানফম…”(লাঃ৬৮)
শকনাইরবা ক্রিতিক ওজা এল জয়চন্দ্রনা কবি রঘুগী শৈরেংবু অসুম্নসু হায়রি, “The poetry of Raghu Leishangthem impress a reader by their sheer quality of brevity of thought and expression, which he does not by design but instinctively, and when one goes through his lines, it is difficult to decide whether one reads a poem or sees a painting. The images he constructs, the symbols he employs, and above all, the words he places in a well-framed poem, transport a reader to the hazy land of art and poetry, which he expresses in delineating a pastoral scene, a moving social situation, a human experience, and an indigenous motif”
চম্লবা খুঙ্গংগী পুন্সি য়েক্লম্বা কবি রঘুগী কলমদগী নুংশিবা ৱাহৈ কয়া, পাঊজেল কয়া পুরবা শৈরেংশিংদি অপাবশিংগী থম্মোয়দা খোন্থাং য়ৈদুনা লৈহৌরি। মহাক্কি শৈরেংশিং অহিংবা ওইদুনা মনিপুরী খোরিলোলগী লৈকোলদা লৈহৌরে। চৎখ্রে মহাক্তি পুন্সি চেংজেল লোয়দুনা মপুগী লৈকোলদা অমুক। মনিপুরী খোরিলোলনা তেংথারি কবি নহাকনা চৎখিবদা তুমিন্না। ইংনা চিকনা লৈরুবা ওইসনু তাইবঙ মপুগী লৈকোলদা।

COMMENTS

WORDPRESS: 0
DISQUS: