ঙসিগী মীরোলশিংনা মৈতৈলোন ঙাঙনরক্তবা –মাখোনমনি মোংসাবা

Homeস্ক্রলবার

ঙসিগী মীরোলশিংনা মৈতৈলোন ঙাঙনরক্তবা –মাখোনমনি মোংসাবা

ইশাগী আইদেন্টিটি ঙাক্নবা হোৎনরিঙৈসিদা অসিগুম্বা ৱাখল খন্থদবা মী য়াওরকপসিনা খুরৌ থাংহল্লি,চাউখৎপা থিন্থহল্লি। লুরবা মতম অসিদা ঐখোয়না মিঙ্গৌ লাল্লি হা

ইশাগী আইদেন্টিটি ঙাক্নবা হোৎনরিঙৈসিদা অসিগুম্বা ৱাখল খন্থদবা মী য়াওরকপসিনা খুরৌ থাংহল্লি,চাউখৎপা থিন্থহল্লি। লুরবা মতম অসিদা ঐখোয়না মিঙ্গৌ লাল্লি হায়দুনা নৈনগদবা মতমসু ওইদে। লাইরিক লাইশুগী অমদি নাৎকী মশক চাউখৎনবা হোৎনমিন্নগদবা মতমসিদা অরেম্বদা মতম মাঙহল্লি। তৌগে ঙাঙনগে হায়দুনা থৌওইনা ঙাঙনবনি হায়না লৌগনি অদুগা ঙসিগী অঙাংশিংনা ঐখোয়গী পোৎশকশিং মমিং খঙনরক্তবসিদি ঐখোয়গী পোৎচৈ খরা শীজিন্নরক্তবা ঐখোয়গী মরক্তা উখিদবদগী অয়াম্বসু ওইরি। উখিদবা পোৎশকী মমিং খঙদবদি খর ফৈ। ঙাইহাক লৈতনা শীজিন্নরিবা লোয়নরিবা পোৎ-চৈশিংদা মীরোল ওন্থোক্তুনা ঙাঙহনবা হৈনবী ওইহনবসি চাউখৎলকপনি হায়না লৌবা চুমলোই।

ঐখোয়গী ঙাঙনরম্বা লোলশিং অমদি শীজিন্নরিবা পোৎলম খরগী মমিং ঙসিগী হৌরক্লিবা নহারোলশিংনা খঙনদ্রে, হায়বসি হেজিক কন্না হায়নরে। খঙনরক্তবগী মরমসি থিরুবদা অরুবা ওইদে ঙাঙনরক্তবগীনি। করিগী ঙাঙনরক্তবনো হায়রগদি মরম য়াম্মী। অহানবদা অহল লমন ইমুং মনুংগী মীওইশিংগীসু অশোয়বা চাউনা লৈ হায়দবা ঙমলোই। তাকপীগদবসি ইমুং মনুংগী মথক থোংবা অহল লমনশিংননি। মতম অমদি অহল লমনশিংনা মচা মশুশিংদা তৌহৈদে, হায়হৈদে, মদুয়াদেকো হায়বসি য়াম্না তোয়না মচা মশুশিংদা হায়নখিবা ৱাহৈনি। তৌহৈদে, হায়হৈদে হায়দুনা তাকলী তম্বীগদবা মমা মপা অহল লমনশিংনা হায়বীদবদগী লান্না লান্না ঙাঙনরকপা অদুম য়াহনখিবদগী অচুম্বা ওইরবোই নীংদুনা ঙাঙনখিবসু কয়া অমা য়াওনরি। হান্না শীজিন্নরম্বা নাৎকী পোৎলম, পোৎচৈ খরা মতমগী অহোংবা লাকপদগী শীজিন্নখিদবনা পোৎশক্কী মমিং অমদি পোৎশক খঙলক্তবা অসি ৱাহৈ লোল মাঙলক্নবগী মরম অমা ওইরি। মসিনা ৱাহৌ ওইরগা ঐখোয়না খঙমিন্নবা য়াবা ৱাফম খরা লৈরে। |
হৌজিক লোল অমদি ৱাহৈদা মাঙলক্লিবসি মরুওইনা অয়ুক নুংথিল নুমিদাংদা ঙাঙনরিবা লোল, ৱাহৈ অমদি মিঙ্গৌশিংদনি। খঙজদবা নহারোল অঙাংশিংনা লান্না ঙাঙবদগী হেন্দোক্লদনা লৌশিং জ্ঞান মপুং।ফারবা চহী নিফু তানখৎক্লবশিং ফাওবদা ঙাঙনবা য়াওরি। মপান্দা লাইরিক লাইশু তম্লুবদগী ইংরেজি, হিন্দি কাবক খঙলকপদগী কেথোক্তুনা নৎত্রগা মৈতৈগী ৱাহৈদা মরৈ কোনবদগী হায়বা তায়, তৈনা ওন্ননা, ৱাহৈ, মিঙ্গৌ লান্না ঙাঙনবসু য়াম্না কন্না তারি। মসি নুপীমচাশিংনা খরসু হেল্লি। কন্না ঙাঙনরিবা লোলশিংগী মনুংদা খ্বাইদগী চাউনা শোয়রিবসি মচে লৌবা নুপাদা ইতৈ হায়না কৌগদবদা ইবাই হায়না নুপীমচাশিংনা অয়াম্বনা কৌরিবসি করিগীনো ? কেরিব্রা নৎত্রগা ষ্টাইল তৌরিবা হায়বদুরা? ইমা ইপা, ইচে ইচল, ইবুং, ইয়াম্বা, ইতৈ, ইবাই মশক খঙদবা লোল মিঙ্গৌ খঙদবসি মসি খুদক্তগী ইমুং মনুংগী অহল লমনশিংনা ঙাঙলিবা মীওইশিং মচা মশুশিং অদু অঙাঙসু নত্তবনিনা শেমদোকপীগদবনি। ফজবোই নীংদুনা মী অমসু অমসু মতৌ তম্নদুনা ঙসি মফম খূদিংদা ঙাঙনিরি, কৌনরি। মতৌ অসুম্না নুপা মচাশিংনসু মতৈমাদা ভাবি হায়না কৌনবা তারি। হিন্দি ঙাঙগে হায়রগনা মপূং ফাবা সেন্টেন্স ওইনা ঙাঙনখিবনা চুমলোইদ্রা? হিন্দি ঙাঙবা লমদমসিদা লৈরিবা মীয়াম্না ঐখোয়গী য়ূমশিংদা ঙাঙনরিবা য়ানশিনবা লোলশিং অসি তারগা মখোয়না করি খল্লমগদগে হায়বসি খন্থবা চুমগনি। ঐখোয়সি অরানবা ৱাখল্লোন শাজৎ অমদা ফজরবোই নীংদুনা পুল্লপ তাউথরি। অঙাংনা খঙদবদি মমা মপানা তাকপীদবগীনি শেমদোকপা য়াগনি। লৌশিং লৈরবা, মিৎতা লাইরিক উরবা নুপা নুপীশিংনফাওবা লান্না লান্না মিঙ্গৌ কৌনবসিমদি অফবদি নত্তে। মাঙোন্দগী ঐখোয়না তমগদৌরিবা ফজবা অসি করিনো? নুপী মশেল ইতাও কৌনবা য়াওরি, ভায় হায়নবসু তারি। নুপামচা মশেলদি ইতা, ইচে কৌনবা তাদ্রি। খরা কেশিন্নবা, লমকেৎপসি নুপীমচাশিংনা হেল্লি হায়বসি চুমগনি। মসিবু চুমহৌদবসি যুমগী অহল লমনশিংনি, মমা মপা, মবুং মচে ওইবশিংননি। কনাগুম্বা হায়নবা তান্নবা য়াদবা খরা লৈরম্বদি য়াই মখোয়গী মতৌদি তমগনুসি হায়নিংঙি।
হৌজিক য়াম্না লুবা মতম্নি। ইশাগী আইদেন্টিটি ঙাক্নবা হোৎনরিঙৈসিদা অসিগুম্বা ৱাখল খন্থদবা মী য়াওরকপসিনা খুরৌ থাংহল্লি,চাউখৎপা থিন্থহল্লি। লুরবা মতম অসিদা ঐখোয়না মিঙ্গৌ লাল্লি হায়দুনা নৈনগদবা মতমসু ওইদে। লাইরিক লাইশুগী অমদি নাৎকী মশক চাউখৎনবা হোৎনমিন্নগদবা মতমসিদা অরেম্বদা মতম মাঙহল্লি। তৌগে ঙাঙনগে হায়দুনা থৌওইনা ঙাঙনবনি হায়না লৌগনি অদুগা ঙসিগী অঙাংশিংনা ঐখোয়গী পোৎশকশিং মমিং খঙনরক্তবসিদি ঐখোয়গী পোৎচৈ খরা শীজিন্নরক্তবা ঐখোয়গী মরক্তা উখিদবদগী অয়াম্বসু ওইরি। উখিদবা পোৎশকী মমিং খঙদবদি খর ফৈ। ঙাইহাক লৈতনা শীজিন্নরিবা লোয়নরিবা পোৎ-চৈশিংদা মীরোল ওন্থোক্তুনা ঙাঙহনবা হৈনবী ওইহনবসি চাউখৎলকপনি হায়না লৌবা চুমলোই। চাউখৎলবা লৈপাক জাপান অমদি চিনাদদি মখোয়গী লোন অমদি ৱাহৈ অসি অসুক্কী মতীক মরুওইনা লৌই। ঐখোয়দগী হেন্না ৱাহৈ মশীং লোল ঙাঙনরিবা লৈপাক্নি। ঐখোয়গা শাজৎ, ৱাঙাঙ, শক্তা মান্নরিবা জাপান অমদি চিনানা মীতোপকী মমাংদা অমুক্কা হেন্না মখোয়গী লোল ৱাহৈশিং ঙাঙনবা, তাহন্নবা খঙহন্নবা হোৎনৈ। মখোয়না অতোপ্পা লোল খঙলগসু মশাগী লোল ঙাঙনবা হোৎনরিবসি তমজনিংঙাইনি। ঐখোয় মণিপুরী মৈতৈশিংগীদি হান্না ঙাঙনরম্বা লোল, ৱাহৈসি খরতনি। হেজিক্কী মপান্দগী পুশিল্লকপা পোৎচৈশিং, অনৌবা থোকলকপা পোৎলমশিং ঐখোয়গী মণিপুরী মৈতৈলোন্দা ৱাহৈ য়াম্না লৈত্রি। মতমগী চাউখৎলকপসিদা লৈতবা লোলনা অয়াম্বসু ওইরি। লৈতবা লোলশিং মখোয়গী হান্নদগী খঙনরকপা ঙাঙনরকপা হিন্দি অমদি ইংলিস মীরোল অদুদা অদুম ঙাঙবদা কাইদে। ঐখোয়গী হান্নদগী ঙাঙনদুনা লাক্লিবা অশেঙবা ইরোলবু ঙাঙদনবা মুৎথৎলগা মীগী মরোল শীজিন্নবসিনদি চাউনা লাল্লি। ঐখোয়না ঐখোয়গী লোল ৱাহৈ ঙাঙনদ্রে হায়না নুংনাংলিবসু মতাংসিনি।
ঙসিগী অঙাংশিংদা ঐখোয়না লোল অমদি ৱাহৈ খঙহনবা তন্বী য়াবসি মাইকৈ অনীদনি। অহানবা মাইকৈদি ইমুংদা লোইনরিবা মীওইশিংনা ঙাঙনবা-তাহনবা, অনীশুবা মাইকৈনা মহৈ শঙশিংদা তমহন্দুনা খঙনবা হোৎনবীগদবনি। নেশনেল এদুকেসন পোলিসি মথংগী চহীদগী চৎননবা পান্দম থম্লিবা অসিদগী য়াওহৌনবা ঐখোয়না হোৎনবা তাই। ঐখোয়না শীজিন্নরিবা পোৎশকশিংগী মমিংশিং লোয়ার ক্লাসকী অঙাংশিংদা লাই য়েক্লগা হাপ্তুনা উহনবা তাই, মীরমগী পোৎ ওইরগনা ঐখোয়গী লোলদনা অসি হায় হায়না খঙনবা তাকপীবা তারি। ঐখোয়গী পোৎচৈশিং ইংরাজিগী মমিং থোঞ্জিন্দুনা অশেংবা মমিং মাঙহনবসি ঐখোয়দা হেন্না মাঙজৈ। খুদম ওইনা মরু ওইবা ‘শগোল কাঙজৈ কাংহুবু’ হোর্স হোকিষ্টিক অদুগা ‘কাঙদ্রুম’ অসিবুনা ‘বোল’ হায়না অয়াম্বা ঙাঙনবা তারি। ৱাহৈসিনা অরানবা কয়া ওইরকই। কাঙজৈ কাংহুবু হোর্স হোকিষ্টিক হায়না হনবসি অরানবা ওইগনি। হায়ফেৎ মান্নৈ হায়না খঙননবা তাকপা, হায়বদি য়াই। ঐখোয়না খঙজিনগদবদি ‘কাঙজৈ’ খক্তা হায়দে ‘কাংহু’হায়বা ৱাহৈ অমসু লোয়নরি। ৱাহৈ অনীসি থাদোক্নবা য়াদে। পোৎশক অহুম্না পূল্লগা ‘কাঙজৈ কাংহু’ শারিবনি। লাইনিংথৌ মার্জিংগী খুৎশুনি, সোরারেলনা মচাইবুংঙো খোরিফাবদা শিন্নরকখিনি। মতাংসি শন্দোক্না তাকপা য়াবা কয়া লৈরি। পোৎশকী নাক য়েৎ, তু মাঙ খঙবা চংঙি। মতৌ অসুম্না উমং লাইবুসু ‘ফোরেষ্ট গোদ’ হায়না য়াংনা হন্দোকপা থেংনরি। উমং লাইদি উমং লাই হায়না অদুম থমগদবনি, মীঙোন্দা খঙনবা তাকপদি ফ্রি ইংলিস ত্রান্সলেসন তৌরগা খঙহন্নবা হোৎনবা কায়দে । য়ারিখৈ মীরমদা ঐখোয়গী মমিংশিং মশাগী লৈজরিবশিং খঙহন্নবা হোৎনবনা লোল হেন্না শন্দোক্তুনা ঙাঙহন্নবা হোৎনবা চুম্মী। ঐখোয়গী ঙসিগী অঙাংশিং হৈজ্রাং, খাবৈ, চেগপ করি হায়রিনো খঙনরকত্রে। পাম্ন চান্নরিবা হৱাইচার অঙাংনা মমিংগা পোৎশক্কা কোন্ননা খঙদ্রে, চম্ফুৎ খঙদ্রে মসিগী মহুৎতা মেগি,চৌ চৌ, সুপ না শিনখ্রবনি। ঙসিগী মৌশিং “অঙাংগী নিংথা’ খঙদ্রে ‘হারগিসনা’ শিনখ্রে, নাওহোং খঙদ্রে। অনৌবা ৱাহৈসু মপান্দগী চঙলকপা খঙবদি কায়দে অহেনবা খঙবনি। ঐখোয়গী লোলগী ৱাহৈদা লৈনা লৈনা খঙদবসি খরখত্তা নৎত্রে য়াম্না য়াম্মী। খঙনরকত্রিবসি অঙাংশিংগী মরাল নত্তে তাকপীদবগীনি। থৌওইনা ঙাঙদবা খঙজিন্নদবা মীসু য়াওরকপদগী ঐখোয় লোল ৱাহৈ শিথরকপনি।
কনাগুম্বা লাইরিক হৈবী মৌ নহা খরদি মপান্দা কুইনা লৈরুবদগী মণিপুরদা লাক্লবা ফাওবা হৈনখিবা মীরোলদা থৌওইনা মচাদা ইংরেজি, হিন্দি ঙাঙবা য়াওরি। মখোয়না জপান্নিজ, চাইনিজ, ফ্রেন্স লোল ঙাঙবদি তাদ্রি। য়াম্না মেত্রোপোলিটান সিটিগী ইচু খঙবা, মৈতৈলোন কাউখ্রবা নৎত্রগা মরোল হৈনরকখ্রবগী মতৌসু মালহল্লি। ইংরাজি হিন্দি ঙাঙবা ঙম্লগদি লাইরিক হৈবনি, চাউখৎলবনি হায়না লৌবসু মাল্লি। করিসু কাইদে মীগী অপাম্বনি, মহাক্কী হৌরকফম কাওখিবননি, হৌরকফম নীংশিংদবগীনি। গুসি মালেমগী চাউখৎপা লৈপাকশিংনা পাম্লরক্লিবা, থিনরক্লিবসিদি য়েলহৌমীনি, অরীবা মতম অমগী চৎনরম্বা য়োকখৎপনি। জাপান্না ইংরাজি ঙাঙদে, চিনাসু অদু মাঙাই অদুবু মখোয় ইংরাজি খঙদবা নত্তে। চাউখৎপদি মখোয়না হেল্লি। মশাগী মমালোন হান্না ঙাঙনবা হোৎনৈ। মমালোনবু ইকায় খুম্নৈ। মখোয়না চাউখৎখিবসি উবদা অতৈ লৈপাকশিংনসু মখোয়গী মতৌ তাম্নরক্লি। হান্নগী নাৎকী চৎনরকপা অরীবা লোমচৎ শাজৎ, ৱাহৈ, লোল, ঙাক শেন্না থম্বা মহাক অদুদা চাউখৎপনি হায়না লৌনরক্লিবা মতমসিদা ঐখোয়গী চীংনুং অসিদনা মীনা লংথোক্নরবা পোৎ খুল্লগা চৎলি। বৃটিশনা লংথোকলম্বা ফুরিৎ অচোনবা ওভারকোট লিৎলগা নীংথম থাগী অঈংবা খাঙনরি। ইপা ইপুগী ঙবোং ফিনা তূবা কান্থাগী অরুম্বদগী মীরমগী কম্বলনা লুম্বা করিসু হেনবা নত্তে হায়বসি কাওনরে। লোল অমা ঙাঙলকপগী নুংশিবা অথোৎপা ঐখোয়গী লোলদা ৱাহৈদা গুল্লিঙৈদগী লৈজরকই। থৌগল্লোন য়াওনা ঙাঙবা ঐখোয়গী য়েক সল্লাইশিংগী তোঙানবা ৱাহৈ খোন্থোক লোল লৈজরিবসি হুন্দোক্লগা মীগী মরোলনা ফজবনি, লাইরিক হৈবনি, চাউখৎপনি খল্লিবা ৱাখলসি থাদোক্লসি। ঐখোয়গী লোলশিং, ৱাহৈশিং, পোৎশকশিং হৌরক্লিবা মীরোলদা তন্বীদুনা খঙহন্নবা হোৎনদ্রগদি হৌরক্লিবা নহারোলশিংনা কোন্না খঙজরক্তুনা মিৎত্তগী পি তানা কপলকখিগনি। ঐখোয়গী অহল লমনশিংদা মখোয়না তন্বীরমদবনি হায়না ওনখৎতুনা চৈরকখিগনি।

COMMENTS

WORDPRESS: 0
DISQUS: