খোমজিনবা পাও

Homeঅতৈ অতৈ

খোমজিনবা পাও

ঢাকাবাড়ীদা নিপা রাসলীলা চহী ৫০গী মতুংদা ত্রিপুরাদা অনীশুবা ওইনা নিপা রাসলীলা পাঙথোক্কদৌরি। সিপাহীজলা ডিষ্ট্রিক্ট মনুংদা লৈবা মৈতৈ খুঞ্জাও ঢাকাবাড়ীদ

ঢাকাবাড়ীদা নিপা রাসলীলা
চহী ৫০গী মতুংদা ত্রিপুরাদা অনীশুবা ওইনা নিপা রাসলীলা পাঙথোক্কদৌরি। সিপাহীজলা ডিষ্ট্রিক্ট মনুংদা লৈবা মৈতৈ খুঞ্জাও ঢাকাবাড়ীদা হন্দক চহী নিপা রাসলীলা ডিসেম্বর তাং ৪, ঢাকাবাড়ী লম্পাক্তা পাঙথোক্কদৌরি। শকনাইরবা ওজা ইরোম গোবিন্দনা রাসধারী ওইরগা পুংদা মায়থাম ক্ষীরমনি, বিনয় অদুগা সূত্রধারী ওইনা এন সুধন্যা। নিপা রাসলীলাদা বিক্রমনা গোপী মকোক চিংলগা প্রিতম, শান্ত, বিনোদ, কান্তি, রাকেশ, প্রতাপ, দীপক, পঙ্কজ, প্রসেন, রিদম, রজত অমসুং রাজদ্বীপ, নেহা শরুক য়াগনি হায়রি।

তোরোপোকপী খুঙ্গংদা মেরা থাগী লাইরিক তাবা
মৈতৈগী নাৎ ওইবা চৎনবী থা অমা চুপ্না মেরা থাগী লাইরিক তাবা থৌরম ঙসিসু ত্রিপুরাগী মৈতৈ খুঙ্গংদা পাঙথোক্লি। মৈতৈনা তাবা খুঙ্গং খুদিংদা থৌরম অসি য়ুমকোক অমমমনা পালি তৌদুনা মহাভারত পাঠ তৌবগী চৎনবী ঙসিসু লেপ্তনা চৎথরি। চৎখিবা নভেম্বর ১০ কামালঘাট তোরোপোকপী মৈতৈ খুঙ্গংদা ঐজ্ঞা ফুরাইলাৎপম দীনমনি শর্ম্মানা শীল্লাংদুনা যুগলকিশোর মান্ডপতা তখেলচংবম কৃষ্ণমণি দত্তনা মহাভারত পাঠ তৌদুনা লাইরিক তাবা থৌরম অসি পাঙথোকখি। আগরতলা অৱাং ধলেস্বরদসু নোংমাইজিং নুমিৎ গৌরনগরগী ওজা এন বীর সিংহনা লাইরিক তাবা থৌরমদা শরুক য়াগনি।

মণিপুরী অটোনোমাস কাউন্সিলগী দাবীদা দিল্লীগী যন্তর-মন্তরদা ৱাকৎ মীফম
আসামদা মণিপুরীশিংগী মরাইবক লেপকদৌরিবা ‘মণিপুরী অটোনোমাস কাউন্সিল’গী দাবীদা দিল্লীগী যন্তর-মন্তর মণিপুরীশিংগী ৱাকৎ মীফম চত্থদুনা ময়ামগী মীৎয়েং চঙশিনখ্রে। আসামদ লিশিং কয়ামরোম মমাংদগী খুন্দা লৈতারিবা অরিবা ফুরুপ কাঙলুপ অমা ওইনা মণিপুরীশিংনা হিংনবগী লানফমদা অব্াবা কয়াসু থেংনদুনা লাক্লি। আসামদা তোঙান তোঙানবা ফুরুপ ৯বু অটোনোমাস কাউন্সিল পীবা য়ারগা মণিপুরীবু পীবা য়ারোইদবা মরম লৈতে হায়বা ঈহৌ শাগৎপা লোয়ননা চৎখিবা নভেম্বর তাং ১ দিল্লীগী যন্তর-মন্তরদা ৱাকৎ মীফম অসি চত্থখিবনি। নোংমগী ওইবা ৱাকৎ মীফম অদুদা ওল আসাম মণিপুরী য়ুথ এসোসিয়েশন অমসুং মণিপুরী নেশনেল কাউন্সিলগী ভলোন্টিয়ার ৭০ রোম শরুক য়াখি। ভারতকী প্রেসিডেন্ট অমসুং প্রাইম মিনিষ্টরদা দাবী অসিগী মেমোরেন্ডাম অমমমসু পীশিনখ্রে। মণিপুরী য়ুথ এসোসিয়েশনগী চীফ এডভাইজার ক্ষেত্রিময়ুম কুন্দনা হায়খি, করিগুম্বা দাবী অসি ফংদ্রবদি খোঙজংগী মখা তাবা শরুক অমা ওইনা আসামদা রেলৱয়ে অমসুং এয়ারপোর্ট ফাওবা ব্লোকেড তৌগনি। পনবা য়াবদি চহী কয়ামরোম দাবী অসি তৌদুনা লাক্লবনি। হৌখিবা ইং ২০১৫, ইং ২০১৭ দা আসাম মুখ্যমন্ত্রিদসু মেমোরেন্ডাম পীশিনখিবা য়াওখ্রবনি।

আসাম মণিপুরী সাহিত্য পরিষদকী প্রেসিডেন্ট ড. কারাম ইবুঙোহলনা লৈখিদবদা
আসাম মণিপুরী সাহিত্য পরিষদকী সভাপতি ড. কারাম ইবুঙোহলনা মনুং মতম চাদনা লৈখিদবদা তোঙান তোঙানবা লুপ সংস্থা কয়ানা অৱাবা অমদি নুঙাইতবা ফোঙদোরক্লি। লুপ অসিগী সেন্ট্রাল কমিটি অমসুং তোঙান তোঙানবা ব্রাঞ্চ জেলা কমিটি য়াওনা মণিপুরদগী পেট্রিওটিক রাইটার্স ফোরমগী সেক্রেটারী রাকেশ নাওরেম, য়ুনিওন অব এসোসিয়েশন অব মণিপুর রাইটার্সকী প্রেসিডেন্ট যোদ্ধা সি সনসম, ত্রিপুরাদগী মণিপুরী সাহিত্য পরিষদ অমসুং মরূপ পাউচেগী জয়েন্ট ইডিটর আরকে তরুনজিৎনা থম্মোয় শোকনা অৱাবা ফোঙদোকখি। মশাগী চহী ৬৭ তা শুখ্রবা ড. কারাম ইবুঙোহল চৎখিবা ওক্টোবরগী তাং ২৫ মশাগী ময়ুমদা লৈখিদবনি।
ড. কারাম ইবুঙোহল ইং ১৯৫৩ এপ্রিল ২৪ নগাঁও জিলাগী হোজাই বিষ্ণুপর কামরাকতা খুঙ্গংদা পোকখি। মচিল মনাও ১২নি। ইং ১৯৭৭ নগাঁও কলেজদগী বিএ, ইং ১৯৮২ গুৱাহাটি য়ুনিভার্সিটিদগী পোষ্ট গ্রেজুয়েট অমসুং ২০০২দা পিএইচডি ফংখি। শিক্ষা দপ্তর মখাদা কামপুর কলেজ নগাঁওগী এসোসিয়েট প্রোফেসর ওইনা ইং ২০১৪দা থবক্তগী পোত্থাখি। মহাক হোজাই প্রেস ক্লাবকী প্রেসিডেন্টসু ওইবিরম্মি। ত্রিপুরাদগী মণিপুরী লোলদা ফোঙবা মরূপ পাউচেগী কোরোষ্পন্ডেন্ট ওইরম্মি। ‘মীতৈগী নাৎ অমসুং পুৱারীগী ৱারেং খরা’ হায়বা লাইরিক অমা ফোঙখি অমসুং ‘মণিপুর পাস এন্ড প্রেজেন্ট’ হায়বা নাওরেম সনাজাওবগী খোমজিনবা লাইরিক্তা “Meiteis in Nagaon Distrct of Assam” হায়বা ড. কারাম ইবুঙোহলনা ইবা মমল লৈরবা পুৱারীগী ৱারেং য়াওরি। মণিপুরী লোন সাহিত্যদা নত্তনা নাৎ অমদি খুন্নাই চাওখৎ থৌরম কয়াদা পুন্সিগী অচৌবা শরুক অমা কত্থোক্লদুনা লাকখিবা মহাক আসাম মণিপুরী সাহিত্য পরিষদকী জেনারেল সেক্রেটারীসু ওইরম্মি। মহাক্কী থৌদাং কয়াবু শক খঙবা ওইনা ইং ২০১৪দা সাহিত্য থৌপাং লূপ, মণিপুরনা ‘থিয়াম ইবোচৌবী নেশনেল এৱার্ড’ পীদুনা ইকাইখুম্নখি। লোয়ননা চহী অদুমক্তদা ‘ডেকাগিরি এৱার্ড’সু ফংখি।

রাধানগরগী রাধামাধব মান্ডবতা নভেম্বর ২৯ ঐতিহাসিক তখেনগী মাহারাস জগোই
ঐতিহাসিক ওইরবা তখেনগী মহারাস জগোই লাক্লিবা নভেম্বর ২৯ রাধামাধব শ্রীশ্রী রাধামাধব দেবতা বাড়ী মান্ডপতা পাঙথোক্লগনি। হন্দক্কীসি ২২২ শুবা মহারাস ওইগনি। শিলচরগী শকনাইরবা ওজা রাজকুমার সত্যব্রত সিংহনা রাসধারী ওইরগা ধলাই জিলাগী কমলপুরদগী থোঙাম ওংবী কবিতা দেবীনা গোপী লুচিংগনি। অদুগা রাধানগরগী সঞ্জেংবম ওংবী আনন্দি দেবীনা তুং ইল্লগা পুন্না গোপী ১৮ শরুক য়াগনি হায়রি। সূত্রধারী ওইনা জলাবাসাগী সুচিত্রা দেবী, অভয়নগরগী রুহিনী দেবী অমসুং খোয়াই দুর্গানগরগী অলোকা দেবী শরুক য়াগনি। চৎখিবা ওক্টোবর তাং ২৯ ক্বাক যাত্রা নুমিৎতা গুরু বরণ তৌরগা মহারাস জগোই অসিগী খুৎথেক্কী রিহার্সেল অদু হৌখিবনি। পনবা য়াবদি মণিপুরগী মহারাজ রাজর্ষি ভাগ্যচন্দ্রনা ইং ১৭৯৮দা মচা নুপী রাজকুমারী হরিশেশ্বরী দেবীবু তখেনগী মহারাজ অনীশুবা রাজধর মানিক্যদা থাজহনবগা লোয়ননা শ্রীশ্রী রাধামাধব যুগল মূর্ত্তি খুদোল তমদুনা তখেন অমসুং মণিপুর লৈবাক অনিগী মরক্তা অচেৎপা নুংশি মরি অমা শাগৎখি। চহী অদুমক্তদা মহারাণী হরিশেশ্বরী দেবী মশামক শরুক য়াদুনা ঐতিহাসিক ওইরবা তখেনগী মহারাস অসি হৌদোকপীখি। তখেনগী পুৱারীদা মসিনা অহানবা অমদি খাইদগী অরিবা রাস লীলানি হায়না ময়াম্না শীংথানৈ। অসুম্না ঙসি ফাওবা যুগল মূর্ত্তি লেঙথোক্লগা তখেন পুৱারীগী লীরবা মহারাস জগোই অসি শ্রদ্ধা ভক্তিগা লোয়ননা চহী খুদিং পাঙথোকই।

COMMENTS

WORDPRESS: 0
DISQUS: