কৌব্রু লাইফমলেনগী শরুক অমা ওইরিবা ‘ইমা-ইপা’ খুভম অকায়-অতোং থোকহল্লম্লেকৌব্রু চীং

Homeকমিউনিটি

কৌব্রু লাইফমলেনগী শরুক অমা ওইরিবা ‘ইমা-ইপা’ খুভম অকায়-অতোং থোকহল্লম্লে

কৌব্রু চীংথক্কী ‘ঈকোম পুখ্রি’ নৎত্রগা ‘অঞ্জি পুখ্রি’ হায়না খঙনবা মফম অদুগা নক্ননা কৌব্রু লাইফমলেনগী শরুক অমা ওইনা মৈতৈশিংনা থাজনবা অমগী মতুংইন্না ঈরাৎ

কৌব্রু চীংথক্কী ‘ঈকোম পুখ্রি’ নৎত্রগা ‘অঞ্জি পুখ্রি’ হায়না খঙনবা মফম অদুগা নক্ননা কৌব্রু লাইফমলেনগী শরুক অমা ওইনা মৈতৈশিংনা থাজনবা অমগী মতুংইন্না ঈরাৎ-থৌনি তৌদুনা লাকপা ঐখোয় তাইবং মীওইববু শেমখিবনি হায়না থাজনরিবা ‘ইমা-ইপা’গী খুভমনি হায়না লৈরিবা নুঙপাক্কী অকোয়বদা লাইশোন-তীনশোন তৌনবা চেক্না চল্লগা থম্লিবা মফম অদুগী শরুক খরা থুগায়রম্বা থেংনরে।

মরকসিদা, হৌখিবা ইং ২০২০ গী ডিসেম্বর ৩দা মণিপুরগী নিংথৌসু ওইরিবা রাজ্য সভাগী এমপি মহারাজ সনাজাওবা লৈশেম্বগী মিংদা মহাক্না লাইশঙ অমসুং মীথুংশঙ শাননবা উরেপ-উয়ুং তম্লম্বগী নুঙগী প্লেট অদুসু হৌজিক মফম খঙদনা মাঙহনখ্রে হায়রি।

হৌখিবা ২৬ এপ্রিল কৌব্রু চীংদোন্দা থুংলখিবা স্টেত প্লানিং বোর্ডকী ডিপুটি চেয়ারমেন, এমএলএ লৌরেম্বম রামেশ্বর মীতৈ (কৈরাও) না লাইফমলেনশিং মথং মথং লাই খুরম্বগা লোয়ননা শেমগৎ-শাগৎনবগীদমক্তা য়েং শিনখিবা অদুদা লাইফমলেনশিং অদুবু চহী খুদীংগী ঈরাৎ-থৌনি তৌদুনা শেন্নরিবা মীশিংনা খুভমশিং অদু শকখঙদবশিংনা নুমিৎ খরনিগী মমাঙদা অকায় অতোই থোকহল্লম্বনি হায়না পাউদম্লকখিবনি।

লাইফম্লেনগী শরুক অকায়-অতোয় থোকহল্লম্লে হায়বা ৱাফম অদু তাবদা এমএলএ রামেশ্বরনা থম্মোয় শোক্না নুংঙাইতবগা লোয়ননা পেন্দবা ফোঙদোকখি। ইমা-ইপা হায়না খঙনবা খুভম অদুগী মনাক নক্না হৌবা অচৌবা উপাল কয়া অমসু মৈ থাদোক্লম্বা থেংনবদা এমএলএনা অঙকপা ফংনা অশাওবা ফোঙদোকখি। হৌজিক্তি কৌব্রুগী হান্না লৈরম্বা শক্তাম অদু হোং খিবগা লোয়ননা চীং অয়াম্বা পুমকোক কোক্লম্বসু থেংনখি।

এপ্রিল ২৭ অয়ুক মখা তানা এমএলএ রামেশ্বরনা কৌব্রু চীংদোন্দা লৈরিবা কোক্লেন ওইরিবা লাইনিংথৌগী খুভম অদু য়াওনা লাইফম কয়া খুরুম্লগা মতুংদা মখাদা কমথরক্লগা ইমা-ইপা লাইফম্লেন অদুগী অকোয়বা য়াওনা লাইফমলেন খরগী অকোয়বদা এমএলএগা খোঙবু ওইমিন্নরিবা মী ৩০০ লোম্না অমোৎ-অকায়শিং শেংদোকপগা লোয়ননা চীং কারকপা মীয়াম্না হুন্দোক্লম্বা প্লাস্তিক বোতল অমসুং চাইথোক্লম্বা পোৎলোমশিং অদু ঙসি শিৎ-শেংবা অদুদা লাইফম্লেনদগী থুগায়রম্বা চেক্কী শরুক খরসু ফংখি। মদু উবদা এমএলএনা য়াম্না নুংঙাইতবা ঊৎলদুনা, মীতৈশিংগী শেংলবা লাইফমনি হায়রিবা মফম অসিদা লৈরিবা খুভমশিংগী শরুকশিং থুগায়রিবা অসি য়াম্না লাইবক থীবনি। মসিদা থুগায়রিবা মী নৎত্রগা কাঙলূপ অদুগীসু থাজবা ঈশ্বর অমমম শোয়দনা লৈরমগনি। মখোয়না থাজনা নিংলিবা ঈশ্বর অদুনা অতোপ্পা কাঙলূপকী থাজনা লাৎচরিবা খুভমশিং থুগায়য়ু হায়বদি হায়রম্লোই হায়না ফোঙদোকখি।

লাইগী খুভমশিং থুগায়রম্বা অমসুং লাইশঙ অমসুং মীথুংশঙ শানবগী উরেপ উয়ুং তম্লম্বগী নুঙগী প্লেটশিং থুগায়রম্বা অদুগা মরী লৈননা মহৌশা কনবা লূপকী প্রেসিডেন্ট দোদো লুৱাংনা হায়, মীতৈশিংনা শেংলবা লাইফমনি হায়না থাজনরিবা মফম অসিদা কনাগুম্বা খরনা য়ৈখায়-থিনগায়া তৌদুনা অতেক-অকায় থোকহল্লম্বা অসি মীতৈশিংগী থম্মোয় শোকপা অমুসং নুংঙাইতবা থোকহন্নবা মরম অমা ওইগনি। মরম অদুনা অসিগুম্বা থৌওং অসি মতুংদা অমুক হন্না তৌবীগনু।

কৌব্রু লাইফমলেনগী অকোয়বদা হৌরম্বা উজাও, উপাল-ৱাপাল কয়া মৈ থাদোক্তুনা মাঙহনবগী থৌওং তোয়না চত্থবনা হৌজিক্তি চীংমায় অসি পূমকোক কোক্লে। মসিনা মহৌশাগী খলদা অকায়বা পীবতা নত্তনা হান্না উরক-ৱারক্তা লৈরম্বা শা-উচেক কয়া অমা উবা ফংদ্রে। অসিগুম্বা মহৌশাগী খল কায়হনবা লোয়ননা মহৌশাগী অশং-অমান্তনা থনবা চীং অমগী শক্তম অদু ওইদ্রে। মতুংদা লাম্মৈ থাবা, উমং-ৱামং কোকথোকপগী থবকসু তৌবীদনবা মহাক্না আপিল তৌখি।

সোর্সঃ পোক্নফম।

COMMENTS

WORDPRESS: 0
DISQUS: