কৌব্রুগী ৱাথোক লোইশিনসি

Homeৱাখল্লোন

কৌব্রুগী ৱাথোক লোইশিনসি

'' ... পূম্নমক ওইদুনসু মীতৈগী শেংলবা লাইফম কৌব্রুগুম্বগা মৈশা লাংলক্লবা মতমদ তম্পাক্তা নুংশি চান্ননা লৈমিন্নরিবা ফুরুপ কয়াগী পুন্সিদা করি ওইরকপা য়

ওইনাম চনা লুখোই

” … পূম্নমক ওইদুনসু মীতৈগী শেংলবা লাইফম কৌব্রুগুম্বগা মৈশা লাংলক্লবা মতমদ তম্পাক্তা নুংশি চান্ননা লৈমিন্নরিবা ফুরুপ কয়াগী পুন্সিদা করি ওইরকপা য়াই হায়বসি খন্থনীঙাই ওই। মরম অসিনা তূংগী পোরম য়েংদনা কৌব্রু লাইফম অমদি চীংদা লৈবা মীতৈগী লাইফমশিংদা অকায়বা পীনবা শিনবসি ইশানা ইশাগী খোঙদা শিংজংনা য়ানশিঞ্জবগা চপ মান্নগনি। তশেংবা য়েলহৌমীগী হৌরকফম য়েলহৌ ৱারী থিজিনবা মতমদা কৌব্রু লাইফমলেন ঙসি য়ৈথায় থীনগায়বা পীরিবা নহাক্কীসু নখোয়গীসু হৌরক্লোনগা মরী লৈনবা চীংঙু খোইয়ুমগী লাইফম ওইরমগনি তুমিৎ য়ুরালগুম খাংঙুথক্তা পাইশিল্লকপা ওইরগদি খঙদ্রে। কৌব্রু লাইফমলেন থুগায়গনি হায়না খল্লিবা মীওই পূম্নমক তুং অমদি মাঙগী য়েংলগা খোঙফম হন্দোকপা ফৈ। … ”

য়াম্না তোয়না লমদমসিগী য়েলহৌঙৈগা মরী লৈরক্লবা লৈশেম নোংশেমঙৈদগী লোয়নরক্লিবা লাইফমশিংদা মীতৈ নত্তবা অতোপ্পা ফুরপচাগী মীওই খুজোক খরনা য়াম্না তোয়না লাইশঙ মৈ থাবা, লাইফম থুগায়বা অসি থোক্লি। মদু করম্বা ফুরুপচাগী মীওইশিংনা থোকহনবা থৌদোক্নো হায়বসি লোয়না ইখং খংনবা ঙাক্তনি। অদুবু লৈমিন্নরিবা ঐখোয়গী মরক্তা ইমু-নাইমু তানদুনা লৈবাক্কী অচৌবা ঈরাং থোক্লক্কনি খনবদগী খঙনা খঙনা খঙশিন্নদনা, উনা-উনা উশিন্দনা লমদমসিগী য়েলহৌমীশিংগী খ্বাইদগী মীশিং য়াম্বা ফুরুপচা অমা ওইরিবা মীতৈশিং খঙদুনা লৈরকপনি। অদুবু ঙসিদি খাংবা ঙম্বগী মৈশা অদু মখোক লোইরক্লে। লোইনা খঙঙি। শেংলবা হৈঙাং চীংগী লাইফমলেন্দা করম্বা ফুরুপচাগী মীওইনা অমাং-অতা থোকহনখিবনো? অমাং-অতা থোকহল্লিবা মীথিঙ্গাইশিং অদুনা কংলৈপাক মণিপুরদা চংলক্তুনা লৈরকপা চহী কয়া শুরে? লৈঙাক্কী চৎন-কাঙলোন, হায়বদি আইনগী অয়াবা য়াওরগা চংলকপ্রা? নৎত্রগা হুরান লান্নাদা মীমৎ-মমায় খুমজিল্লগা মনীংথোংলোমদগী লোন্না চংলকপ্র হায়বসি ইখং খঙনবা ঙাক্তনি। ইন্দিয়াগী ওইনা য়েংবদা পীকখ্রবা স্টেট মণিপুরনা অঙকপা মওংদা চহী অমদা মীশিং চাদা ৩৭.৫৩ য়ৌনা হেনগৎলক্লিবা অসি মহৌশাগী য়ূম্বাল্লোন্না য়ামখৎলকপা মীশিং নত্তে। ফৌমানবীশিংনা নাকল চাবোক্তা পোকপা তুমিৎ য়ূম্বালশিংনা থোকহনবনি। মখোয়দা লৈঙাক্না লাউরিবা ফেমিলি প্লানিংগী ৱাফমসু লৈতে। মীশিং য়াম্বা পুথোকপা ঙম্বা লাবা অমোমশিংদা অখন্নবা মনা-মথুম পীদুনা ইকাই খুম্নবা ফুরুপচানি। মীতৈদি লৈঙাক্কী য়াথং ফিগাও শাদুনা চহী খরগী মমাঙদগী হকশেন লোয়শঙগী অখং অহৈশিংগা তান্নদুনা মীশিং য়ামদনবা মাঙ থাখ্রে। অঙাং য়ৈথনবা হোৎনখ্রে। মসি ঙসিদি মীতৈ মচাশিংসু খঙবা হৌরক্লে। মপান্দগী নারোলদা চংলকপা মীওইশিংনা য়েলহৌঙৈদগী লৈরক্লবা ইনাৎকা শাগোন্নবা লাইফমশিং মাঙহন তাকহন্নবা য়াম্না কন্না হোৎনরি। মসি পূম্নমক মণিপুরগী লৈঙাক্না খঙঙি। অদুবু য়াম্না থৌশাদনা লৈথোক্তুনা লাক্লি। হীরম অসিদা থোয়দোক্না পূক্নিং থীংজিন্দ্রি। অদুবু মীশি মীনা থোক্লক্লবা মতমদদি লৈঙাক্কী লুচিংবশিং নাখোক্তুনা লৈবা য়ারক্লোই। মরম অসিনা মৈরীকপিনা মৈজাও ওল্লক্ত্রিঙৈ মমাঙদা মায়কৈ খূদিংমক্কী য়েংলগা পায়খৎফম থোকপা থবক পায়খৎপা ফৈ। মালেমগী পুৱারীদা থোকখিবা থৌদোক ৱাথোক্কী লাতমশিং হাইগৎলদা নৈনবা ফৈ।

মীতৈশিংগী শেংলবা লাইফমলেন কৌব্রুগী মতাংদা কুকিগী লুপ খরা অমদি লন্নাই ইন্টারেস্টতা লৈবা মীওই খরনা অতম্ননা হৌজিক মণিপুরদা লৈরিবা কুকিগী অচৌবা লূপশিং, লাইনীংগী অমদি পেলিটিক্সকী লুচিংবাশিংনা খামজিনবিয়ু অমদি কাঙলূপ অনীগী মরক্তা ইরাং থোক্নবা শিল্লিবা কুকি খুজোক খরগী মথক্তা খুদক্তা চুনবা থবক পায়খৎলু হায়বা মণিপুর পন্ডিত লোয়শঙনা চেরোল অমদা আপিল তৌরি। মদুদি, “…হৌজিক তুমিন্না লৈথোকপগী মতম নৎত্রে। অদুনা মখল মখা কয়াগী খোঙজং চংশিন্নবা শেম শাবা লোইরে। সনামহি লাইনীংগা মরী লৈনবা থৌরম পূম্নমক লেপ্লগা কৌব্রুদা মীৎয়েং থম্লগনি। মসিদা বাংলাদেশ, ত্রিপুরা, মায়ানমার, আসামনচিংবা মফমশিংদা খুন্দা লৈতাদুনা লৈখ্রবা মীতৈশিংদসু পাউ পীদুনা ঐখোয়গী য়েলহৌঙৈদগী লৈরক্লবা লাইফমশিং অসি কন্ননবা হোৎনরগনি। য়াম্লবা মীওই চা কয়ানা কৌব্রুদা খোমজিন্নবা থৌরাং লৈরে’’ হায়রি। লৈসু লৈরগনি। উকল লমদমসিগী ওইনদি অরায়বা লূপ অমা নত্তে।

উকলনা মওং-মরিল নাইদনা লাই হরাওরম্বা লাইবুং কয়া চুমথোক্তুনা উমংলাই হরাওবগী পরমলোল চুমথোকখ্রে। স্টেট অসিগী ৱাংমদা খুন্দা লৈতাদুনা লৈখ্রবা মীতৈগী খুঙ্গং কয়াদা লাই হরাওবগী থৌরম পাঙথোক্তুনা লাক্লি। উমংলাই হরাওবগী ৱাংউলোন মীতৈ খক্তগী নত্তে। মালেমদা লৈরিবা মীওইচাশিংগী পুন্সিরোল য়ূম্নানলোন অমদি লাইনীং লীচৎপু অচুম্বা মায়কৈদা পুরক্তুনা পুন্সিনা পুন্সিবু খঙনবনি। অৱাং কৌব্রুগী লাইফম কনবদা ঐখোয় পূম্নমক্না থৌদাং য়াফম থোকই। খাংঙুথক্তা লিৎশিল্লকপা ফুরুপচা খরগা কৌব্রু লাইফম মুত্থৎনবা হোৎনরকপা হায়বসি লমদমসিদা লৈরিবা য়েলহৌমী পুম্নমক্কী মায়োক্তানি। মপান্দগী খাংঙুথক্তা হুমজিল্লকপা লাইনীংগী পুরেল কয়ানা থেঙ্খাং কয়ারক্তা ঐখোয়গী লাইফমশিং অমদি য়েক সলাই হৌরক্লোল মুত্থৎনবা হোৎনদুনা লাকখি। মদুগী মায়োক্তা লেপ্তুনা ইরমদমগী থৌনা ফবা লিংজেন পানবা ইপা-ইপু, ইমা-ইবেনশিংনা মশাগী ঈ কৎখি। ঙসিসু মীয়ানচাশিংনা থমায়দুনা ঐখোয়গী লাইফম কয়া কুপশিন্দুন থম্লি। কয়া অমনা মীয়ানচাগী লাইনি হায়জিন্দুনা হৈকৎ-লৈকৎ তমহল্লি।য়ূমদাংলবনা ফম্মেন ফমদুনা লাইগী মিংদা শেল তাল্লি। হন্দক কৌব্রুগী লাইফমলেনদা মৈহৈৗ লাংপোক থোকল্লিবসি ফুরুপ অমনা মীয়াম্না লৌবা ৱারেপ্তি ওইরমগদবা মান্দে। ওইরম্বা তারবদি ফুরুপচা অদু মীওইবা খুন্নাইগী মনুং চনফম থোক্তে। হৌজিক হৌজিক্কী ৱাফমদা নত্তনা চহী খরগী মমাঙদা থোকখিবা থৌদোক নীংশিংবা ফৈ। নাগা কুকিগী অকনবা ঈহৌদা কাঙলূপ অনীমক্কী মীওই কয়া পুন্সি লোমখ্রবনি। শা-ঙা হাৎপগুম শাগৈ অমগী মীওইশিংনা শাগৈ অমগী মীওই কয়া নুপী-অঙাং, নহা-অহল খাক্তনা মতুপ-মতুপ কক্লগা হাৎখ্রবনি। মীৎকপ-মীরওখোলনা চীংশাং নাপোম নীনখিবনি। খুঙ্গং কয়া তাঙ্গোয় ওনখিবনি। মতম অদুদা য়াম্লবা মীতৈশিংনা লান খামখিবনি। ফুরুপ অমগী মীচং চংবা লৈতনা লাঞ্জেল্লকপা কয়াদা মীনুংশি উৎতুনা চংজফম পীখিবনি। মসিমক চুড়াচান্দপুরগী কাঙলূপকী ঈহৌদসু লৈমিন্নরিবা ফুরুপ অমত্তদা য়েংথনিবগী মীৎয়েং থমখিদে। ময়ূম মকৈ থাদোক্তুনা লাঞ্জেনখ্রবা ইমুং কয়াগী শা-ষন মীতৈশিংনা নীংথিনা শেন্নদুনা থমখিবনি। হৌখিবা থৌদোক পূম্নমক কাউথোক্লগা মীতৈগী লাইফম থুগায়নবা হোৎনরকপা হায়বসি মীলমচৎকী ৱাখল ৱাংমদনি। স্টেট অসিগী পাক চাউবসি শরুক ১০গী মনুংদা শরুক ৯দি চীংনি। চীংদদি মীতৈনা লৌরি য়ূম্ফম লীংদুনা মশাগী মমিংদা নুপী নুপাথোক্না লৈবা নত্তে। লৈরিবা খরসি চীংগী নিংথৌ অমদি খুল্লাকপদা হায়জরগা লৈবনি। শরুক ১০গী মনুংদা শুপ্নগী অমখক ওইবা তম্পাক্কী লমদমসিদা স্টেট অসিদা লৈরিবা ফুরুপচা পূম্নমক শাইজিনগা শাইজিনগা লোন্নদুনা লৈমিন্নরি। তম্পাক্কী পীক্লবা মফমসিদা লাইনীং-লীচৎ কয়াগী লাইশিং, লাইশঙশিং লৈরি। মসিদা কনানা কনাদসু অথীংবা পীদে। পূম্নমক ওইদুনসু মীতৈগী শেংলবা লাইফম কৌব্রুগুম্বগা মৈশা লাংলক্লবা মতমদ তম্পাক্তা নুংশি চান্ননা লৈমিন্নরিবা ফুরুপ কয়াগী পুন্সিদা করি ওইরকপা য়াই হায়বসি খন্থনীঙাই ওই। মরম অসিনা তূংগী পোরম য়েংদনা কৌব্রু লাইফম অমদি চীংদা লৈবা মীতৈগী লাইফমশিংদা অকায়বা পীনবা শিনবসি ইশানা ইশাগী খোঙদা শিংজংনা য়ানশিঞ্জবগা চপ মান্নগনি। তশেংবা য়েলহৌমীগী হৌরকফম য়েলহৌ ৱারী থিজিনবা মতমদা কৌব্রু লাইফমলেন ঙসি য়ৈথায় থীনগায়বা পীরিবা নহাক্কীসু নখোয়গীসু হৌরক্লোনগা মরী লৈনবা চীংঙু খোইয়ুমগী লাইফম ওইরমগনি তুমিৎ য়ুরালগুম খাংঙুথক্তা পাইশিল্লকপা ওইরগদি খঙদ্রে। কৌব্রু লাইফমলেন থুগায়গনি হায়না খল্লিবা মীওই পূম্নমক তুং অমদি মাঙগী য়েংলগা খোঙফম হন্দোকপা ফৈ।

ঈরাংসিগী মতাংদা মণিপুর লৈঙাক্কী পুলিস ডিপার্টমেন্টকী থৌপুরোইশিংনা মীয়ামগী পূক্নিংগী ইহুল খঙনা মতম চানা লৌখৎখিবা থবক অসিমক্তি থোইদোক্না থাগৎনীংঙাইনি। থোকখিবা থৌদোক অদুগ মরী লৈননা ফারবা মীওইশিংনা খুমখিবা পাউখুম অদুমক্তি থাগৎনিংঙাই ওইদে খল্লি। মতাংসিদা হংনীংবা ৱাহংদি ইমু্ং মনুংগী ওইবা নীংঙাই শংদান্নবদা মশা মশাগী লন-থুমদদি তায়নদনা ফুরুপ অমগী লাইফমদা তায়নরিবা অদুনা করিগীনো হায়বা ৱাহংসিগী পাউখুম মীয়াম্না পাম্মী। হন্দক থোকখিবা থৌদোকসি মখা তানা অমুক হন্না থোক্লক্তবা ওইসনু। কাঙলূপ নাইবগী ৱাখল থোদোক্লগা ঐখোয় তংদু লৈতানা নুংশি চান্ননা লৈমিন্নবা ফৈ। কৌব্রুগী ৱাথোক লোইশিনসি।

COMMENTS

WORDPRESS: 0
DISQUS: