কোন্থৌজম সুরঞ্জিতগী শৈরেং অনী

Homeআর্টসশৈরেং

কোন্থৌজম সুরঞ্জিতগী শৈরেং অনী

নিংশিংবা অমা. কাউথোকপগি তাইধিং মরকতা নিংশিংবগি ৱানাদি মচেৎ মচেৎ... মকুপ ওন্না পাই অনি. নুংথাংলেন্না তূময়াদ্রবা চরুখোককি তেংথা খোনজেলবু অমম

নিংশিংবা

অমা.
কাউথোকপগি তাইধিং মরকতা
নিংশিংবগি ৱানাদি
মচেৎ মচেৎ… মকুপ ওন্না পাই

অনি.
নুংথাংলেন্না তূময়াদ্রবা
চরুখোককি তেংথা খোনজেলবু
অমম্বনা নুংশিনা নাউশুমবি

অহুম.
আলুলাইনা নিংশিংববু শঙবদা
মুথৎহৈবা শেন্দ্রাংশিংগি
ৱাখলবুদি চোই

হিঙকখিবগী লারৈ লাথুপ

অমা.
নুংথাং অমসে কয়াতা ওয়ানা
মীতৈগি মৌ অনৌবিগুম চৎলিদো
তূময়াদ্রবি কৌবি লাইরেম্বিগা লোয়ননা

কোনশিনদুনা খাঙলিবা
ইকায়থিবিগুম নাগল্লবা হকচাংগি মচিমদা তোংদুনা
তৎতনা মচিন ফেংলি
তনোয়রবা লঙজামা

ঐনা য়েলহৌঙৈদগি শঙজরিবা
উতিংঙাগি নুংশিজরবা হা মান্বি নুঙদুমদো
তপনা তপনা মুন্বা হৌরগদ্রা খল্লি খল্লিঙৈ
খঙহৌদনা
তূমখুন মনুংদা ওনথদুনা অদুম
ঙসি কৌবা উরোককা
অমুক্কমুক
চিলোকনবা ঙমখিদো!

 

অনি.
অদুদগিদি লৈখামান ওইনা অতৈ লমদমমদা
মরা চেৎনা তারুরগে খনদুনা মাঙদত্তা চেনখিবদা
হৈপাল লৈপাল ফগনবা মফমমদা তাউজদুনা
য়ামনা পেন্না কাউথোকতুনা লৈজরে।

লমদমদুগি মীওইশিংনা চহি অনৌবা ওকশিনবি
লৌউ শিংউবগি মতমদা
লৌমীশিংনা হয়েংগি লৌচরোংবু
মমিৎতা তশেং তশেং য়োকচদুনা অৱা খঙদনা থবক শূই।

লৌ খাউবগি মতমদি
য়ুমথোঙখুদিং নুঙাইবগি মখে লাঙবা মতমনি!

অসুম তৌনা শিঙ্গারৈ শাৎপা মতমফাও ঙাওজদুনা তিনজরুই।

নোংমা নুমিৎ কৈতৌরি–
লমদমদুগি মীয়ামনা লমকোনবি লাইরেম্বিবু
ইনাৎ থৌনিবগি পংচেনতা চেন্নখি।

ঐসু পনথুংদা য়ৌরগদি
য়েলহৌঙৈদৈ লমদমবু
নাউকোনবিবা লাইরেম্বিগি অঙকপা শায়োন্না
নোকমি নোকমি তৌদুনা
মীয়ামদগি খনদোকতুনা ঐবুতা কৌশিনবি।

অদুদগি–
ইবানিতা খঙনবা
মখোল য়াওদবা লোনগৈনা
ঐবু অমুক হন্না য়ুমদা
হনজিন্নবা হায়বিরে; হায়দ্রবা?

[ “নোং অমদি উপাম্বি” (২০১৫) কৌবা লাইরিকতগী শৈরেং অনিসি লৌখৎচবনি ]

COMMENTS

WORDPRESS: 0
DISQUS: