কাইরো ইন্টারনেশনেল বেষ্ট এক্ট্রেস, পদ্মশ্রী, সঙ্গীত নাটক এৱার্দি হৈস্নাম সাবিত্রিগী নৌহৌনবা ৱারী — বুধ চিংথাম

Homeআর্টসসংস্কৃতি

কাইরো ইন্টারনেশনেল বেষ্ট এক্ট্রেস, পদ্মশ্রী, সঙ্গীত নাটক এৱার্দি হৈস্নাম সাবিত্রিগী নৌহৌনবা ৱারী — বুধ চিংথাম

আর্টিষ্ট অমগী পুন্সিদা ইজিপকী কাইরো ইন্টারনেশনেল ফেষ্টিবেল ফোর এক্সপ্রিমেন্ট থিয়েটার বেষ্ট এক্ট্রেস ফংবা ঙম্লবা, পদ্মশ্রী এৱার্দসু লৈতেংলবা, অমুকস

           বুধ চিংথাম

আর্টিষ্ট অমগী পুন্সিদা ইজিপকী কাইরো ইন্টারনেশনেল ফেষ্টিবেল ফোর এক্সপ্রিমেন্ট থিয়েটার বেষ্ট এক্ট্রেস ফংবা ঙম্লবা, পদ্মশ্রী এৱার্দসু লৈতেংলবা, অমুকসু সেন্ট্রেল সঙ্গীত নাটক একাডেমী এৱার্দসু লৈতেংলবা, অতৈ মগুন লৈখ্র-লৈক্রবা এৱার্দ মিংথোয় ময়ামদি পঞ্জররোই অদুগম্বা ওন্থোক্না মপুং ফাখ্রবা এক্ট্রেস অমনি প্রোফেশনেল থিয়েটার কোম্পানি অমা ওইনা মালেমদা খঙনরবা কলাক্ষেত্র মণিপুরগী গুরুসু ওইরিবী হৈস্নাম সাবিত্রি। থিয়েটারগী পুৱারীদা মীওইলক্তগী মরক্তা লাইপোক কলাকার অমনি মহাক্তী।

             গুরু হৈস্নাম সাবিত্রি

হায়রিবা লাইপোক গ্রেড এক্ট্রেস অসিগী মশাগী চহী ৭৫ রোম শুরবা মতম অসিদা মহাক্কী শাংলবা থিয়েটারগী খোঙচৎকী নৌহৌনবা পুন্সী ৱারী হন্দক্তা দি কালচারেল ৱার্কাস এন্ড এক্টিভিষ্ট ফোরাম মণিপুর অশম্বীদা ক্বাফ মণিপুর হায়নসু খঙনবা অসিনা শিনবা লাইভ ভার্চুয়েল ইভেন্ট ‘ক্বফ-এক্সপ্রেসন’ সিরিজ অহুমশুবা জুন ২৭, ২০২১ লাইভ ভার্চুয়েল টোক অদুদা ৱারী-ৱাতাই শাবা ফংখি। ওন্থোক্না নুংঙাই। খঙনিংবগী ৱাহংনা পিক থনখি। অঙকপা সাবিত্রিগী পাউখুম কয়ানা শাংলবা পুঙ অনীগী মতমদু লোইবা খঙহৌদে।

চহীন নম্বো পোজরবসু ওন্থোক্না সিরিয়াস ওইবা মায়থোঙ, ওন্থোক্না এক্সপ্রেসিভ ওইবা মায়থোঙ অদুগী ইমোসন অদুদগী কনাসু নান্থোকপা ঙমখিদে। অসুক চাওবা কলাকার অমা মালেমদা থিবদা কয়া শুনা ফংগদগে? তাবিরেদনা ময়াম মণিপুরি থিয়েটারগী পুৱারীদা ইন্দিয়ান থিয়েটারগী পুৱারীদা ১৯৯১ দা লৈবাক পুঙজাও থিনখিবদো থার্ড কাইরো ইন্টারনেশনেল ফেষ্টিবেল অব এক্সপ্রিমেন্টেল থিয়েটারদা কলাক্ষেত্র মণিপুরগী ‘মীগী শারঙ’ দা হৈস্নাম সাবিত্রিনা বেষ্ট এক্ট্রেস ফংলকখিবদো। লোয়ননা প্লে অসিমক খ্বাইদগী ফবা প্লে তরুক খনগৎপদা য়াওরকখিবনি। হায়রিবা ইং ১৯৯০ গী তাঙ্কক অসিৱাইসি মণিপুর থিয়েটারগী খোঙচৎতা সনা, চহী তরা লিশাং কোনবী হায়না ফাওবা খঙনবা য়াই।


নিংশিংবা য়াবদি কাইরো ইন্টারনেশনেল ফেষ্টিবেল ফোর এক্সপ্রিমেন্টেল থিয়েটার অসি ইং ১৯৮৮ দা ইহান হান্না হৌদোকখিবনি। লোয়ননা মালেমগী থাক্কী এক্সপ্রিমেন্টল থিয়েটারদা চাংদম্নবা অসি মখোয়না অহনাবনি হায়নসু লাওথোকখি। মদুগী মতুং তারকপা অহুমশুবা মশিংদনি কলাক্ষেত্রগী সাবিত্রিদা ফেষ্টিবেল অসিগী পেনেল অব ক্রিটিক্সনা কুপ্না য়েংলগা খনগৎতুনা বেষ্ট এক্ট্রসকী মনা অদু লানথোক্নকখিবনি। লোয়ননা এক্টিংগী জগৎতা সাবিত্রিগী খুদোল ২০২০ দা ফার্ষ্ট এশিয়ান কন্টেম্পররি থিয়েটার ফেষ্টিবেল সিঙ্গাপুরদা ‘নুপী’ লোয়ননা ইন্দিয়াগী সঙ্গীত নাটক একাডেমী লিংখৎখিবা চহী ৫০ শুরকপদা ইন্টারনেশনেল থিয়েটার সেমিনার, ফেষ্টিবেল পাঙথোকপদা ‘এক্টর এট প্লে’ হায়দুনা এক্টর অমখক্তগী থোইদোক হেন্দোকপা উৎপদা হৈস্নাম সাবিত্রিসু য়াওখি।
হায়রিবা গোল্ডেন জুবিলি ইন্টারনেশনেল থিয়েটার ইভেন্ট অসিমক্তী ইশামকসু সঙ্গীত নাটকনা বার্ত্তন তৌরকপদগী লোইনা য়াওবা ফংখি। হায়রিবা এক্টর এট প্লে অসিদা ইন্দিয়াগী শক্নাইরবা এক্টরশিং ডাক্টর শ্রীরাম লগ্গু, অমরেশ পুরী, নাশিরুদিন শাহ অমসুং মণিপুরগী হৈস্নাম সাবিত্রিনচিংবগী পার্ফোমেন্স উবা ফংখি।

সাবিত্রিগী শাংলবা এক্টিংগী পুৱারী মহাক্কী লীলা ময়াম অমা মাগী এক্টিংগী শক্তমশিংনা থম্মোয় কয়াদা কাওবা লৈতনা তুংশিন্দুনা লৈনরি। মসিদনি করিগীনো মহাক্কী এক্টিংনা থম্মোয়দা কাওবা লৈতনা নিংশিংলিবা? সাবিত্রিদি এক্টিংগী লাইরেম্বীনি, কয়ারক হায়বা-য়াবা অমনি। মহাক্কী এক্টিংদা ঙাওরবী নিউ ইয়র্কতা লৈবী শক্নাইরবী ক্রিটিক, ডিরেক্টর এরিন বি মীনা সাবিত্রিগী এক্টিংদা পেল্লদুনা হায়খিবা ৱাফম অমদি, “Sabitri, I was so moved by your performance: Particularly by the lullaby you sang, and by the moment it turned into a mourning lament (reminding me of a terrible moment several years ago when I thought my own daughter was dying) you are an extraordinarily powerful and evocative performer. I continue to be `hauted’ (in the best sense) by your performance, and will never forget it”- Erin B. Mec
সাবিত্রিগী তোপ-তোপ্পা এক্টিংগী মরমদা খরদং নিংশিংবদা মহাক্কী মপুরোইবা নোঙ্গাখ্রবা পদ্মভুষন হৈস্নাম কাহ্ণাইলাল চিত্থবা য়াবা নত্তে। মখোয় অনীগী পুঙবা অসি কায়বা য়াদবা অমনি। লমদম অসিদা অনৌবা এক্সপরিমেন্টেল এক্টিং অমা শাগৎলকপদা কাহ্ণাইলালনা সাবিত্রিগী হকচাং শিজিন্নদুনা লময়ানলকখি। সাবিত্রিগী তোপ-তোপ্পা এক্টিংদা ওন্থোক্না লুখ্রবা মী অমনা হেক্তা, পাক ঙমদবা অমুকসু রিয়েলিস্টিক, ষ্টাইলাইজ ডাইলোগ ঈশৈগুম্বা, মীৎয়েং, শাজৎ, শাথেক ময়াম অসি পুল্লপ তোৎশিন্নরগা শেম্লকপা এক্টিংগী মচৎ মা মশাখক্তনা ঙম্বা আউন এন্টর্প্রিটেসন অসিদি অঙকপনি। মসি ওজা কাহ্ণাইলালনা পাম্লীবা পোলিটিকেল ভিয়ু অপাম্বা ইফেক্ট অদু চপচানা য়ৌনবা সাবিত্রিনা থাদোক্লকপনি।
সাবিত্রিগী কাওঙমদ্রবা এক্টিং ময়াম অমদি ‘তম্ন লাইদা’ মমা, ‘পোবেত’ তা পেবেত মমা ‘মীগী শারংদা’ থম্বাল, দৌপদি, নুপী, ডাকঘরদা অমল অতৈ লীলা ময়াম অমসু লৈরি। মপুং ওইনা সাবিত্রিগী অরানবগী মায়োক্তা মহাক্কী অকনবা এক্টিংগী প্রোটেষ্ট য়াম্না এজিটেশনেল ওইবা মফোঙদোক কয়া অসি এক্টর অমত্তনা মনুং য়ৌনা চংশিনবদা ওন্থোক্না ৱাগদবা মশক ঙাক্তনি।
তশেংনা সাবিত্রিবু খঙনবা হোৎনবা মহাক্কী এক্টিংবু শিংথাবা হায়বসি তরাইবা অমদা নত্তে। মশাগী চহী ৬/৭ তা ঙাইরিঙৈদগী এক্টিংগী লম্বীসিদা খোঙদারকখ্রবনি। মৈতৈ য়ুমজাওগী মাঙ্গোলদা বাশোক শকপী কয়া শান্নবা, মতৌ তম্বা উরগা মহাক্কী মনে গৌরমনি মতম অমগী থিয়েটারগী শক্নাইরবী এক্ট্রেস অসিনা মহাকপু থিয়েটার কলাগী লম্বীদা খুজেং পায়দুনা পুশিনবিরকখি। শাংলবা খোঙচৎকী ৱারীনি।

    ওজা হৈস্নাম কাহ্ণাইলাল

 

ঙসিদি ওজা কাহ্ণাইলালনা নোঙ্গাখ্রবা মতুংদা চহী য়ামশিল্লক্লবা ভেটরিয়ান এক্টর মণিপুরী থিয়েটারগী আইকোন অসে ক্বাফনা চিংথোক্তুনা নৌহৌননা নিংশিং ৱারীনরকপা ওন্থোক্না মমল য়ামখ্রবা অমনি। মহাক্না লমদম অসিগী এক্ট্রেস অমা ওইনা হৌখ্রবা থৌদোক কয়া মণিপুরদা লীলা য়াওরিবশিংনা (এক্ট্রেস) থেংনরকখিবা সমস্যা কয়াগী ৱারীশিং পাউদমখিবা ওন্থোক্না থম্মোয় শোকপা ঙাক্তনি।
ঙসিদি সাবিত্রি কলাক্ষেত্রগী এক্টর গুরু অমা ওইনা ওজা কাহ্ণাইলালনা থম্বীরম্বা লমদম অসিগী ভিক্টিম অমা ওইনা, পুন্সীগী অকিবনা থল্লবা, সিকিউরিটি লৈতবা, টেন্সন অমদা লৈনরবা মতমসিদা ভাবকশিংদা চৈনা অমা পীবা পাম্বা, এলার্ট ওইহনবা, অনৌবা লীলাগী মশক অমা শেশ্বা, মহৌশাগী লীলা ৱারী হোংদোক্তুনা ইন্দ্রিগী লেভেলদা, ভাবক্কী ইন্দ্রিনে অদুগা পার্ফোমারগী সেন্স, ইন্দ্রি অনীদুগী লেভেলদা মরি লৈনহল্লগা ইন্দ্রিগা ডাইলোগ তৌনহনবদুনি, ঐনা পাম্লীবা থিয়েটার হায়বদুদা ঙসি সাবিত্রিনা খুদুং ইন্দুনা লীলা মখা চত্থরক্লী। ওজা কাহ্ণাইলালনা পামজরম্বা থিয়েটারগী মশক অদু হেন্না মশেক মঙাল থোক্না চংশিনবা ঙম্বা ওইসনু।

সোর্স: সঙাই এক্সপ্রেস

COMMENTS

WORDPRESS: 0
DISQUS: