কংলা শাগী ময়াদগী চৈঙাক লৌথোকখিবা অনিংবা অপাম্বশিং ফোঙদোক্নরক্লবসু কংলা ফোর্ট বোর্দতগীদি করিমত্তা ফংদে  – নোমিতা খোংবান্তাবম

Homeস্ক্রলবার

কংলা শাগী ময়াদগী চৈঙাক লৌথোকখিবা অনিংবা অপাম্বশিং ফোঙদোক্নরক্লবসু কংলা ফোর্ট বোর্দতগীদি করিমত্তা ফংদে – নোমিতা খোংবান্তাবম

  মণিপুরদা বৃটিশকী মখূৎতগী কুমজা ১৯৪৭তা মনীং তম্বা ফংখি। মসিগী মতুং মীখল পাঙথোক্তুনা মণিপুরগী চীফ মিনিষ্টার মহারাজকুমার প্রিয়োব্রতনা ওইরে।

 নোমিতা খোংবান্তাবম

 

মণিপুরদা বৃটিশকী মখূৎতগী কুমজা ১৯৪৭তা মনীং তম্বা ফংখি। মসিগী মতুং মীখল পাঙথোক্তুনা মণিপুরগী চীফ মিনিষ্টার মহারাজকুমার প্রিয়োব্রতনা ওইরে। মতমদুদা মণিপুরগী বেঙ্ককী চেক মনাদা কংলা শা অসি হাপ্তুনা শীজিন্নখিবদু মসিনা ষ্টেট এমব্লেম ওইবদগীনি। অদুনা চৈ লেংবা/চৈঙাক পীবা অসি পুঙজৈ লেংবা হায়না খঙনরকই। মরম অসিনা পুঙজৈ লেংবা য়াওবা হায়বসি কংলা শা অমগী অশেংবা শক্তম নত্তে হায়রি।

হৌজিক কংলা উত্রা শঙলেনগী সনথোঙদা মীয়াম্না উরিবা কংলা শাগী শক্তম অসি হৌখিবা কুমজা ২০১৭ তগী নৌহৌননা উবা ফংলকখিবনি। অদুবু জুন ১৮, ২০২১ দা কংলা শাগী ময়া মনুংগী নাকল অনীদা ময়া মথক মখা তুনা পীরম্বা চৈঙাকশিং লৌথোকখ্রবসু হায়রিবা চৈঙাকশিং অদু য়াওবা কংলা শাগী মশক অদু মতম অমদা বৃটিশনা নমখিবা কংলা শাগী ফোটোশিংদগী লৌবা রেকোর্ডকী মতুংইন্না মণিপুরগী আর্কিওলোজিকেলগী ওইবা পরিংদা চৈঙাক য়াওনা শাখিবনি হায়বগী ৱাফমসু ফোঙদোক্নবা লৈরি।
অদুম ওইনমক কংলা মনুংগী উত্রা শঙলেনগী সনথোঙদা খিল্লক্লিবা কংলা শাগী ময়াগী মনুং থংবা শরুক্তা পীরম্বা চৈঙাকশিং অদু লমদম অসিগী অতোপ্পা মফমশিংদা খিনবা কংলা শাগী শক্তমশিংদসু লোইনমক চৈঙাক য়াওব্রা হায়বদুমক্তি ওইদ্রি।
ইম্ফালগী ওল্ড সেক্রেটারিয়েটকী হোজংগী মখোঙ অনিগী মথক্তা খিল্লক্লিবা কংলা শাগী মশক অসিগা কংলা মনুংগী কংলা শাগা চাওবদা খেন্নজরবসু চপ মান্নবা অমত্তা ওইবা মশকনি। ওল্ড সেক্রেটারিয়েটকী গেটতা কংলা শাগী শক্তা শীজিন্নরক্লিবা অসিসু কংলা শানা মনিপুরগী ষ্টেট এমব্লেম ওইবদগীনি। মসিসু মীপূম খুদিংমক্না উনরিবনি। মসিগী মথক্তা বির টিকেন্দ্রজিৎ পার্ককী সহিদ মিনার মতোন্দা খিল্লিবা কংলা শাগী শক্তমদসু মসিগী ময়াদা চৈঙাক য়াওদে।
অদুম ওইনমক মণিপুরগী পুৱারীগা শাগোন্নরক্লিবা কংলা শাগী ময়াদা পীরম্বা চৈঙাকপু কবাক খনবনি হায়দুনা লৌথোকখ্রবা মতুংদা অমগা অমগগী মরক্তা মান্নদবা ৱাখল্লোনশিং ফোঙদোক্নরকপগা মরী লেননা পাউচে অসিনা তোঙান তোঙানবা মীওই খরদগী মখোয়গী অনীংবা-অপাম্বশিং খোমজিল্লকপগী মনুংদা ডিএম কোলেজগী এন্থ্রোপোলোজি দিপার্টমেন্টকী প্রিন্সিপাল ফাওবা ওইরমখিবা ওক্রম কুমারনা পাউচে অসিদা হায়, মণিপুর লৈঙাক্না মিউজিয়ামগীদমক এক্ট অমা থম্নবা হোৎনরকপদগী কুমজা ১৯৭৬ তা আর্কিওলোজি এক্ট, ১৯৭৬ হায়বা অমা শেম-শাদুনা মতম অদুগী মণিপুর লেজিসলেটিভ এসেমব্লিদা পুথোকখি। এক্ট অদুগী মতুংইন্না মণিপুরদা অহানবা ওইনা সুপারিন্টেন্ডেন্ট অমগী মখাদ আর্কিওলোজিগী ওইবা লোয়শঙ অমা কুমজা ১৯৭৮ দগী লিংখৎলি। হায়রিবা লোয়শঙ অদুদা দেপ্যুটেসন্দা মতম খরা লৈরুরবা মতুং মহাক মশামক ডি এম কোলেজদা অমুক হল্লক্তুনা প্রিন্সিপাল ফাওবা ওইরমখি হায়রি।
লোয়ননা কংলা শা হায়বসি চৈথারোল কুম্বাবনাচিংবা অরিবা লাইরিকশিংদা কংলা শা হায়না থেংনদে। নিংথৌ চৌরজিৎকী মতমদা নোংশাগী শক্তম/মীত্তম অদুসু নিংথৌ মার্জিৎকী মতমদা অৱানা থুগাইখি। নোংশাগী শক্তমদা শাবগী ৱাফমসি নিংথৌ নরসিংহগী মতম ফাওবদা য়াওই হায়রি। অদুবু মৈতৈ পুয়াদা য়াওরিবা কংলা শা মমাঙদা অঙৌবা মকোক কেনগনি হায়বা তুংগী পোরম উবা পুয়াদা য়াওবদু কুমজা ১৮৯১ দা বৃটিশকী সাহেবশিংগী মকোক কেনবগী থৌদোক থোকখি। মদুদা কংলা শা মমাঙ হায়বদুদা ‘গী’ হায়বদু লৌথোক্লগা কংলা শা হায়বসি ওইগনি। অদুবু কংলা শাগী ময়াদা চৈঙাক পীবা বৃটিশকী রেকোর্ডতা লৈরম্বা ফোটো অদুদগী য়েংলগা শাখিবা ওইগনি। অদুনা চৈঙাক লৌথোকপা হায়বসি ইভিডেন্স মাঙহনবগা চপ মান্নৈ হায়রি।
মহাক্না মখা তানা হায়, কংলা শাগা ইবুধৌ নোংশাবগসু খেন্নবা লৈ। ইবুধৌ নোংশাবদি লাইশঙদা লাৎপা, নিংথৌনা লাৎপা লাইনি। মরমদি চৈথারোল কুম্বাবদা য়াওবা য়ুহা হাবদা চিরাই থোং কিন্থৈ, লাই নোংশাবা লাইশঙ কিন্থৈ হায়না ইরম্বা অসিনা তাকপদি লাই নোংশাবা হায়বসিদি লাইশঙদা লাৎপা লাইনি। কংলা শা হায়বসিনা উত্রা মমাঙগী হোজংদা খিনবা শক্তম অমনি হায়রি।
অমরোমদা, কংলা শাগী ময়াদগী হন্দক্তা চৈঙাক লৌথোকখিবদগী লাক্লিবা ৱাফমশিংগা মরী লৈননা পাউচে অসিদা উত্রা শঙলেন সনা কোনুংগী মাইবা হনবা শমজেৎশাবম কোন্দুম্বনা হায়, কংলা শা শাবা হৌরকপদগী য়েৎনখিবা কয়াসু লৈখি। মদুদা মশাগী ওইন থমখিবা ৱাফম খরদা চৈঙাক পীবদু হাপ্তনবা কন্না হায়জখিবনি। হাপ্লিবা চৈঙাক অদু য়াম্না তৌহৈদবা অমনি হায়না হায়জখি। মতম অদু চৈ য়ুংবা কংলা শাগী ফোটোদু ঙাক্তা পুথোক্নরকখি। মহাক্নসু কোয়থি থিবদগী মোংশাঙ্গৈদা লৈবা অহল অমদা ফোটো অমা লৈরম্বদগী পুথোক্তুনা পীরুবদা হায়রিবা ফোটো অদুদি য়েকশিনবা ওইরমগনি হায়রকপদগী মহাক মশা মথন্তা তোঙান তাবদগী ইকায়দুনা মহাক্কী খোঙফমদু হন্দোকখিবনি হায়রি।
শারিবা কংলা শাগী শক্তম অসি মহারাজ চন্দ্রকৃত্তিগী মতমদা শাখিবনি। মসিগী ৱাফম চৈথারোল কুম্বাবাদা য়াওবনি। মসিগীদমক্তা নৈনবা সেমিনার ফাওবা পাঙথোকখি। সনা কোনুংদসু কয়ারক হন্না নৈনখি। অদুবু কংলা শাগী ময়াদা চৈঙাক পীবা হায়বসিদি হাপফম থোক্তবা অমনি হায়রি। সনা কোনুংগী মাইবা হনবা অসিনা মখা তানা হায়, হৌজিক লৈরিবা কংলা শাগী ফীভম অসিসু মখোঙদু কুন্থবগী মওংদা লৈরিবনি। শা অমনা শাওরগা খোংবদা মখোঙ খুদুংদু কুন্থগদবা নত্তে। হৌজিক লৈরিবা কংলা শাগী ফীভম অসিদি ময়া কাথোক্লগা লৈবনি। মসিদি য়াম্না শাওনা ঙংলগা লৈবগী ফীভমনি। মসিদা খুদুং কুন্থগদবা নত্তে। মহাক্না পুথোকখিবা কংলা শাগী শক্তম অদুদি বৃটিশনা কাপখায়দুনা থুগাইদ্রিঙৈগী কংলা শাগী ফীভমনি। মদুদদি মখোঙদু খুদুং কুন্থনা লৈখিদে। বৃটিশনা পানবা মতমদা কংলা শা কাপখায়দুনা থুগাইখিবনি। অদুগা অমুক হন্না শাখিবা অদুসু হান্না লৈরম্বা শক্তমদু মাঙহন্দনা শাবনি হায়রি।
লোয়ননা নোংশাবা লাইগা কংলা শাগদি য়াম্না লাপ্নৈ। অমনা লাইনি অদুগা অমনা শা ওইনা লৈজরকপনি। নোংশাবা লাই অসি কোনুংদা লাৎপা লাই অমা ওইদুনা লৈজরকপনি। নোংশাবা লাই অসি কোনুংদা লাৎপা লাই অমা ওইদুনা লাকই। পাখংবগী মতমদগী ইবুধৌ নোংশাবা লাৎলি। কোনুং অসি কংলাদা ওইরম্বা মরম্না নোংশাবা লাই অসি কংলাদা লাৎলম্বনি। নিংথৌ খাগেম্বগী মতমদা লাইনিংথৌ সনামহী অমুক লাৎলি। অদুনা ইবুধৌ পাখংবা, লাইনিংথৌ সনামহী অমসুং য়ূমজাও লাইরেম্বীসু লাৎতুনা লাকই। হায়রিবা লাই অহুম অসি বৃটিশকী মতমদসু নিংথৌ চুড়াচান্দ ফাওবনা লাৎখিবা লাইশিংনি।
কংলা শা অসিদি নিংথৌ চৌরজিৎকী মতমদা শাখিবগী রেকোর্ড খুদিংমক বৃটিশকী মিউজিয়াম লোইনা লৈবা ঙাক্তনি। অদুনা কংলা শাগী ময়াদগী চৈঙাক লৌথোকপা হায়বসি য়াম্না চুম্মী। মরমদি মালেমগী মফম অমত্তদা শা অমদা চৈঙাক পীদুনা খনজিল্লগা লৈবসি থিবদা ফংলোই। পেগোদাদা লৈরিবা শা অদুগসু মান্নবা খরদি লৈব্রা খল্লি। মখোয়গীদা লৈরিবা শা অদুসু মখোয়গী হোজংদা থম্বনি হায়রি।
অমরোমদা উমংলাই কনবা লূপ (উকল) গী কনভিনর মুতুম মনিতোন্না হায়, কংলা শাগী ময়াদা পীরিবা চৈঙাক অসি ঈনাৎ লাইনীং চৎপশিংনা লৌথোকপীনবা মণিপুর লৈঙাক্তা হায়খিবনি। মসিগী মতুংদা খন্ন-নৈনদুনা অখঙ অহৈ কয়া তানরবা মতুংদা লৌথোক্নবা লেপ্পদগী লৈঙাক্না থবক ওইনা পাঙথোকখিবনি। অদুবু হৌজিক লৌথোক্লবা মতুংদা লাক্লিবা ৱাফমশিং অসিদি য়াম্না ফজদবা, লৈবাক মচা তাদবগুম্না তৌই। হান্না লৌথোকত্রিঙৈদা খন্নবা মতমদা অখঙ অহৈশিংনা মতম চানা চানা পুথোকহৌগদবনি। হৌজিকসু কৌব্রুগী মতাংদা লাংলিবা অসিদা অখঙ অহৈ এক্সপার্টশিংনা পুথোক্তুনা মীয়ামদা হান্না খঙহনবীগদবনি হায়রি।
মহাক্না মখা তানা হায়, কাংলা শাগীসু ময়াদা পীরম্বা চৈঙাক লৌথোক্নবা হায়রকপসি শাংলবনি। মতমদুদা অখঙ অহৈ এক্সপার্টশিংদুনা আর্কিওলোজিগী ওইবা ৱাফমশিং লৈরবসু মীয়ামদা খঙহনবীরম্লগা ৱাখল তাহন্নবা হোৎনবীরমগদবনি। লোইখ্রবা মতুংদা মমৈ শমথবগী থবক অসি তৌহন্নীংদে। হৌজিক অখঙবা কয়া থোরক্লিবা অসি মতম অদুদা কদাইদা চৎপীরুবগে হায়রদুনা তুমদুনা লৈবিরুরব্রা হায়বা ৱাহংসু হংলকখি।
থৌওং অসি থরুম লৈবগী মওং মানবদৌনা উরি। অদুনা মতম চানা অখঙ অহৈশিংনা চোঙথোকপীদুনা মীয়ামদা খঙহনবীগদবনি। বোর্ডার পিল্লারগী মতাংদসু থাংদোক থাংজিন তৌবগী ৱাথোক লৈরিবা অসিবুসু অখঙবশিংনা ঙসি ফাওবদা মীয়ামদা অশেংবা শক্তমগী মতাংদা ৱাখল তাহনবা ঙমদ্রি। মরম অসিনা চাওখৎ লমজেলদা চঙশিনসি হায়রগদি মতম চানা চানা ফৈ নৎত্রগা ফত্তে হায়বদু পুথোকহন্নীংই। মমৈ খোম্লগা মীয়ামদা নুংঙাইতবা পীবদি চুমদে হায়খি। লোয়ননা থোরক্লিবা ৱাফমশিং অসিগা মরী লৈননা ইন্টারনেশনেল সলাই পুন্সিফমগী প্রেসিডেন্ট অমসুং উত্রা শঙলেন সনা কোনুংগী মায়চৌ পুরেল প্রোফেসর এন জি কাংজিয়ানা হায়, কংলা শাগী চৈঙাক পীরিবা কবাক খনবা হায়না ঙাঙনরিবা অসি কংলা শা অদুগী মশাগী পার্ট অমা নত্তে। শা অদুগী পার্ট অমা ওইনা চৈঙাকশিং অদু লৌবা য়াদে। অচুম্বা অশেংবা ৱাফমদা চৈঙাক পীবসি লানবদগী লৌথোক্লিবনি। ষ্টেট এমব্লেম ওইদুনা লাক্লবা কংলা শাদা চৈঙাক য়াওদবা অদুগী ফীভমদুদা লৈরম্লিবনি। কুমজা ১৮৬৬ তা জেমস জোনষ্টোন অমসুং মিষ্টার হোপসন অনীনা কংলা শাগী ফোটো নমখিবা অদুদা কংলা শাগী ময়াদা চৈঙাক য়াওদে। ফোটো অদু মখোয় অনীমক্না নম্বনি, অমখক্তনা নম্বা নত্তে। হায়রিবা ফোটো অদু পুথোক্তুনা পীবনি। মসিগী মতুং কুমজা ১৮৬৯ দা য়ুহা হারকপদগী কংলা শাগী মখয়াৎ শেমজিনদ্রিবা ফাওবগী ওইনা চৈঙাক পীখিবনি। মসিগী মতুংদা ফোটোদা য়ূম্ফম ওইবনি হায়বসি অরানবা থবকনি। হৌজিক অরিবা সেক্রেটারীয়েটকী গেটতা খিল্লিবা কংলা শা অসি চহী ১০০ শুরবা হিষ্টরিকেল মোন্যুমেন্টকী মনুং চল্লবনি। বৃটিশনা মণিপুরদা লৈরিঙৈদা শাখিবনি। মসিসু লায়না লৌবা য়াবা নত্তে। হায়রিবা কংলা শা অসি ষ্টেট এমব্লেমগী অশেংবা মশক অদু লৌদুনা শারম্লবনি। মসিদদি করিগী চৈঙাক হাপ্লমদ্রিবনো হায়বদুসু খন্থবা চঙই হায়রি।
মণিপুরদা বৃটিশকী মখূৎতগী কুমজা ১৯৪৭তা মনীং তম্বা ফংখি। মসিগী মতুং মীখল পাঙথোক্তুনা মণিপুরগী চীফ মিনিষ্টার মহারাজকুমার প্রিয়োব্রতনা ওইরে। মতমদুদা মণিপুরগী বেঙ্ককী চেক মনাদা কংলা শা অসি হাপ্তুনা শীজিন্নখিবদু মসিনা ষ্টেট এমব্লেম ওইবদগীনি। অদুনা চৈ লেংবা/চৈঙাক পীবা অসি পুঙজৈ লেংবা হায়না খঙনরকই। মরম অসিনা পুঙজৈ লেংবা য়াওবা হায়বসি কংলা শা অমগী অশেংবা শক্তম নত্তে হায়রি।
লোয়ননা চৈথারোল কুম্বাবদা কংলাদা নিংথৌ ওইনা পানখিবা নিংথৌশিংগী মতমদা শেমজিন শাজিনবা কয়াগী মরমদা ইরম্বশিং লৈরি। মদুদা চৈ লেংবা নৎত্রগা পুঙজৈ লেংবগি ৱাফম য়াওদে। ডকুমেন্ট হায়বসি ষ্টেট এমব্লেম ওইনা শীজিন্নরকপদগী চৈ লেংদবা কংলা শা অসিনা অশেংবা অচুম্বনি হায়বদু খন্থফম থোকই। হায়রিবা অসি হেক্তা য়েকশিনবা নৎত্রগা শাজিনবা নত্তে। লৈরম্লিবা অশেংবা মশক অদুদা য়ূম্ফম ওইদুনা ষ্টেট এমব্লেম ওইনা লৌরগা থম্লক্লিবনি। করিসু য়েৎননীংঙাই ওইদে।
হৌজিক কংলা শাগী ময়াদা পীরম্বা চৈঙাক লৌথোকপা হায়বসি অশেংবা অচুম্বগী মশক অদুদা থম্বনি। মতমদুদা শাখিবা কংলা শা অদুসু চেক্কুপ অমদি শগোলহৱাই অমুবা তিংথোক্লগা মকু খোক্তুনা তকখায়রগা গম শেম্লগা নপ্পী। মৈতৈ থুম মহী হাপ্তুনা সুরকি শেমদুনা শাখিবনি। অশেংবা অচুম্বা অদুদা তরেৎ-তরা থোক্না খন্নরগা লৈঙাক্না য়াদুনা ষ্টেট এমব্লেম ওইরক্লিবনি। ময়াদা চৈঙাক য়াওদবা কংলা শাগী শক্তমদা য়ানরক্লবা ৱাফম অদু লাল্লি হায়বা য়ারোই। য়াওরম্বা চৈঙাক অসি য়াওফম শুংথোক থোক্তবনি হায়নসু মখা তারক্লি।
অদুম ওইনমক কংলা শাগী ময়াদগী চৈঙাক নৎত্রগা কবাক নৎত্রগা পোঙজৈ হায়দুনা খঙনবা চৈশিং লৌথোকখিবগা মরী লৈননা কংলা ফোর্ট বোর্ডকী মেম্বারশিংদগী পাউচে অসিনা মখোয়গী ওইবা কম্মেন্টশিং লৌনবা হোৎনবদদি অমত্তা ফংবা ঙমখিদে।
কর্টসি: হুইয়েন লানপাউ

COMMENTS

WORDPRESS: 0
DISQUS: