এম এল এ রামেশ্বরনা কৌব্রু চীংদোন কাদুনা লাইফমলেনশিং য়েংশিনখ্রে

Homeকমিউনিটি

এম এল এ রামেশ্বরনা কৌব্রু চীংদোন কাদুনা লাইফমলেনশিং য়েংশিনখ্রে

কৌব্রুগী লাইফমলেনশিং শেমগৎ-শাগৎনবা লুপা লাক্ষ ২ পীরগনিঃ লৌরেম্বম রামেশ্বর ইম্ফালঃ কৈরাও কেন্দ্রগী এমএলএ ওইরিবা স্টেত প্লানিং বোর্ডকী ডিপুটি চেয়ারমেন

কৌব্রুগী লাইফমলেনশিং শেমগৎ-শাগৎনবা লুপা লাক্ষ ২ পীরগনিঃ লৌরেম্বম রামেশ্বর

ইম্ফালঃ কৈরাও কেন্দ্রগী এমএলএ ওইরিবা স্টেত প্লানিং বোর্ডকী ডিপুটি চেয়ারমেন লৌরৈম্বম রামেশ্বর মৈতৈনা কৌব্রু চীঙদোন মতোন লোম্না কাদুন কৌব্রুগী লাইফমলেনশিং, কৌব্রুগী অকোয়বগী মহৌশাগী ফীবমশিং য়েংশিনখিবগা লোয়ননা কৌব্রু লাইফমলেন অসিবু শেমগৎ শাগৎনবগীদমক্তা মহাক্কী মায়কৈদগী লুপা লাক্ষ ২ মতেঙ পাংলগনি হায়না ফোঙদোকখ্রে।

এমএলএ রামেশ্বরনা মহাক্কা লোয়নবা মী ৩০০ লোমগা লোয়ননা কৌব্রু চীং কাখি। মহাক্না কৌব্রু চীঙথক য়ৌরবা মতুং কৌব্রুগী লৈরিবা লাইফমলেনশিং য়েংশিনবগা লোয়ননা মহাক্না থাজজবগী মতুং ইন্না লাইফমশিং অদুদা ঈরাৎ থৌনিসু পাঙথোকখি। রামেশ্বরনা হায়, মৈতৈশিংগা থাদোক্নবা য়াদ্রবা মৈতৈশিংনা মরুওইবা লাইফমলেন্নি হায়না লৌনরিবা কৌব্রুগী লাইফমলেনশিং অসি চীফ মিনিস্টার এন বীরেনগা তান্নরগা শেমগৎনবা হোৎনরগনি। কৌব্রু হায়রিবা মফম অসি মণিপুর হায়না লৈরিবা লমদম অসিগী হৌরকফম অমসুং অহানবা ওইনা খুন্দারকখিবা মফমনি। স্টেত অসিগী মেজরিটি ওইনা লৈরিবা মৈতৈশিংগা কৌব্রুগা খক থাদোক্নবা য়ারোই। কৌব্রু লাইফমলেন কনবা হায়বা অসিদা মৈতৈ কাঙলুপ খক্তগীতা নত্তনা লমদম অসিদা লৈমিন্নরিবা ফুরুপ কাঙলুপ খুদিংমক নুংশি চাননা হিংমিন্ননবনি।

কৌব্রু চীঙগী হান্না লৈজরম্বা মহৌশাগী শক্তমবু থুগায়দুনা উজাও কয়া য়াল্লগা পুথোকখিবা, চীঙমায় কয়া মৈ থাদুনা পুংকোক কোকহনবা, অসিগুম্বা ফজখ্রবা চীঙ অসিবু মাঙহন্নবা হোৎনবা কাঙলুপ অমা লৈরে হায়বা অসি মীয়াম্না খঙনরবা ৱাফমনি। মরম অদুনা মাঙখ্রবা মহৌশাগী শক্তম অদুসু কনবা ঙম্লনবা লোয়ননা উ কয়া থাজিন্দুনা কৌব্রুবু অশঙ অমান্তনা থনবা মফম অমা শেমগৎনবগীদমক্তা কৌব্রুদা ফরেস্টকী অফিস অমা হাংদোক্নবসু চীফ মিনিস্টার এন বীরেনগা লোয়ননা তান্নরগনি হায়নসু এমএলএ এল. রামেশ্বরনা ফোঙদোকখি।

স্তেত গবর্নমেন্তনসু মৈতৈশিংনা থাজনরিবা লাইফম কয়া অমা শেমগৎপগী থবক তৌরি। মৈতৈ অমসুং অনাল জাতিনা লাইনি হায়না হৌজিকসু থাজনা থম্লিবা চান্দেলগী অনাল খুলেন্দা লৈরিবা ৱাংব্রেনগী খুভমসু শেমগৎ শাগৎনবা স্তেত গবর্নমেন্তনা পৈশা থাদদুনা হোৎনরি। মরম অদুনা মৈতৈশিংনা লাইনি হায়না থাজদুনা ঙল্লিঙৈ মতমদগী ইরাৎ থৌনি তৌদুনা লাক্লবা কৌব্রু লাইফমলেন্দা চঙবদসু কনাগুম্বা অমত্তনা অয়েৎপা অথিংবা পীবা তৌবীগনু হায়নসু এমএলএ, এল রামেশ্বরনা ফোঙদোকখি।

নাকল অমরোমদা, লমদম অসিদা লৈরিবা মৈতৈশিংনা ঐখোয়গী ইপা-ইপুশিংগী খুভমনি হায়না লৌনরিবা লোয়ননা ঐখোয়গী লাইফমলেন্নি হায়না লৌরিবা মফমশিং অসিবু ঐখোয়না য়োকখৎপা নত্রগা শেমগৎ শাগৎনিংদ্রগদি ঐখোয়গী ফুরুপ অসি হিংলুবগী অর্থ থোক্তে। মরম অদুনা মসিদা গবর্নমেন্তনা পুথোক্লগা তৌরকপা ঙায়বগী মহুত্তা ঐখোয়গী ফুরুপ অসিনা অঙম অঙম্বা পুথোক্নদুনা অসি য়োকখক্তুনা ঙাক শেন্দুনা থম্নবা হোৎনমিন্নসি। কৌব্রু লাইফমলেন শেমগৎ শাগৎনবা অমদি কৌব্রু অরিবা লম্বী অসি শেমগৎ শাগৎনবগীদমক্তা অহানবা ওইনা থোক্লপা কমিটি নত্রগা অর্গানাইজেসন অদুদা মহাক্কী মায়কৈদগী লুপা লাক্ষ ২গী শেনফম খুৎশিন্নজগনি হায়নসু এমএলএ, এল. রামেশ্বরনা ফোঙদোকখি।

মহাক্না হায়, কৈরাও কেন্দ্রগী মনুং চন্না লৈবা ফুনাল মরিং খুলগী চীঙথক্তা ফুনাল নিংথৌ তেলহৈবা হায়বা মৈতৈশিংনা ইরাৎ থৌনি তৌজবা মফম অমা লৈ। হায়রিবা লাইশঙ অসি মরিং খুলগী লৈরিবা য়ুমশিংগী মরক্তা লৈবনি। লাইশঙ অসি স্তেত গবর্নমেন্তকী আর্ট এন্ড কালচার ডিপার্টমেন্তনা শেমগৎ শাগত্তুনা হৌজিকসু লৈরি। চহী খুদিংগী ফুনাল মরিং খুন্দা চত্তুনা হায়রিবা লাইশঙ অসিদা ইরাৎ থৌনি তৌনৈ। মফম অদুগী অকোয়বদা লৈরিবা মরিংগী ইচিল ইনাওশিংনা মৈ থান্দুনা লাইশঙ অদুবু নিংথিনা ঙাক শেন্দুনা থম্লি। মসিনা মৈতৈ অমসুং মরিং জাতি অনীগী মরক্তা হেন্না নুংশিননবগী মরী অমসুং ওইহন্দুনা লাক্লি। মরম অদুনা কনুগুম্বা কাঙলুপ অমত্তনা কৌব্রুগী লাইফমলেনদা মৈতৈশিংনা ঈরাৎ থৌনিনবগীদমক্তা চীঙ কারকপদা অথিংবা পীবীরোয়দবনি হায়নসু এমএলএ, এল. রামেশ্বরনা মথা তানা ফোঙদোকখি।

কৌব্রু চীঙদোল অসি লাইফমলেন অমা ওইনা শেমগৎপগা লোয়ননা টুরিস্টশিংগী মীৎয়েং চীঙশিনবা য়াবা য়াম্না ফজরবা মফম অমা ওইনা শেমগৎপসু য়াগনি। মসিনা টুরিস্ট স্পট অমা ওইন লৈখিবা তারগদি পৃথিবীগী লম কোয়বা কয়া অমা লাক্তুনা মফম অসি মালেমদা মমিং লৈবা মফম অমসুং ওইগনি। লোয়ননা মফম অদুগী অকোয়বদা লৈরিবা মীওই কয়াগী হিংননবগী লম্বীসু হেন্না হেন্না লৈরগনি। হীরম অসিগী য়াবা থবকশিং অমদি পায়খৎপা য়াবা প্রজেক্টশিং করি তৌবা য়াবগে হায়বা অদুসু খন্নগনি হায়না রামেশ্বরনা ফোঙদোকখি।

COMMENTS

WORDPRESS: 0
DISQUS: