ইমালোল, ইমা লৈবাক মনিপুরবু নুংশিবগী ঈফূৎনা থল্লবা এ কে শেরামগী শৈরেং লাইরিক, ‘নুংশিবগী তেংথারোল’- মিৎয়েং অমা

Homeআর্টসঅতৈ অতৈ

ইমালোল, ইমা লৈবাক মনিপুরবু নুংশিবগী ঈফূৎনা থল্লবা এ কে শেরামগী শৈরেং লাইরিক, ‘নুংশিবগী তেংথারোল’- মিৎয়েং অমা

কবিনা মনিপুর ইমানা নাওকোনবদি ফংজদ্রবা অদুগা থম্মোয়নুংদি মতম খুদিং চেৎনা নাওকোঞ্জরিবা লমদা তাম্না লৈখ্রবা বাংলাদেশকি মনিপুরীশিংনা ইমাগী লমদম মনিপুরদা ন

কবিনা মনিপুর ইমানা নাওকোনবদি ফংজদ্রবা অদুগা থম্মোয়নুংদি মতম খুদিং চেৎনা নাওকোঞ্জরিবা লমদা তাম্না লৈখ্রবা বাংলাদেশকি মনিপুরীশিংনা ইমাগী লমদম মনিপুরদা নোংমফদোক লাকপদা উরিবা তারিবা থেংনরিবা মীখা পোনবগী শক্তমগুম্না লৈরম্লিবা পোকনফম ইমাগী চেংলৌ অদু য়েংঙমদে। পাম্বৈ লৈতবগুম্না তোন্না লৈবদু খাংবা ঙমজদে। অসিগুম্বা ইমাগী অৱাবা ফীভম অদো ইদবসু ঙমদে অমুক কবিনা। মসিদা শোয়রিবসি ৱাখল থেল্লবা মচাশিং অসিনা শক্তি মুন্নবদা ওইহল্লিব্রা হায়বা ৱাহংশিং হংনিংবসু ফাওদবা নত্তে।

লাইরিক্কি মমিং- নুংশিবগী তেংথারোল (২০১৬)
অইবা- এ কে শেরাম
অফোঙবাঃ বাংলাদেশ মণিপুরী সাহিত্য সংসদ,
লালাদিঘির পূর্বপার, সিলেট- ৩১০০
লাইরিক্কী মখলঃ শৈরেং
লাইরিক্কী মখূমঃ এন যোগেস্বর অপু
লাইরিক্কী মমলঃ লূপা ১৫০/-
লাইরিক্কী লমায় মশিং- ৭৯


বাংলাদেশ মণিপুরী সাহিত্য সংসদকী ফাউন্দর প্রসিদেণ্ট শকনাইরবা অইবা এ কে শেরাম ফেব্রুৱারী ২৭, ১৯৫৩দা হবিগঞ্জ জেলাগী বিশগাঁও খুঙ্গংদা পোকখি। অপোকপা অমসুং অপোকপীগী মিংনা নবকিশোর সিংহ অমসুং থম্বাল দেবী কৌই। বাংলাদেশকি মমিং লৈরবা বেঙ্ক সোনালী হায়বসিদা দেপ্যুতি জেনরেল মেনেজর ফাওবা ওইরমদুনা হৌজিকনা থবক্তগী পোত্থারে। ইং ১৯৭৫কি ফেব্রুৱারী ২১দা লৈহাও ফরবা বাংলাদেশকি তম্পাক্তা বাংলাদেশ মণিপুরী সাহিত্য সংসদ লিংখৎখি। ইমালোল নুংশিবগী কল্লবা লিচিংনা মনিপুরী খোরিলোল, মনিপুরী কলচর অমসুং লোল নৌহৌননা মপাঙ্গল কনখৎনবা হোৎনবদা কবি এ কে শেরামসু মাংজিল থানা থবক কয়া পাঙথোকপা হৌরকখি। ঙসিসু লেপ্তনা মনিপুর খোরিলোলদা চাওরবা খুদোল কয়া তৌরি। খোরিলোলগী ওইবা লূপ অমা শেমদুনা থবক তৌবা হৌরকপদগী ইমালোলদা ইবা অহানবা চেফোঙ, দীপান্বিতা’ ফোঙলকখি। অসুম্না লাকপা সাহিত্যগী খোঙচৎ অসিদা কবি এঃ কেঃ শেরামগী অহানবা শৈরেংগী লাইরিক, ‘বসন্ত কুন্নিপালগী লৈরাং, ১৯৮২দা। মসিনা বাংলাদেশতা ফোঙবা অহানবা মনিপুরীগী শৈরেং লাইরিক ওইখি। মসিগী মতুংদা অতোপ্পা খোরিলোলগী পোত্থোক কয়া ৱারেংদা, শৈরেংদা, ৱারীমচা, নোভেল, নৈনা ৱারেং, ত্রান্সলেসন অমদি বাংলা লোন্দা ফাওবা মনিপুরী ফুঙ্গা ৱারীফাওবা ত্রান্সলেসন তৌদুনা মথং মথং ফোঙলকখি। অসুম্না লাকপা সাহিত্যগী খোঙচৎ অসিদা কবি অসিগী অনীশুবা শৈরেংগী লাইরিক ‘মঙলানগী অতিয়াদা নুমিৎ থোকপা’ ২০০৭ ফোঙখি। লোল ময়েক চাওখৎনবা অমদি ইশাগী ঈয়েকপু হৌরক্লিবা অঙাংশিংনা শিজিন্নবা তম্নবা লাইরিক ওইনবা হায়দুনা ‘কংলৈ ঈয়েক ঈপী’ হায়না মিংথোনবা মনিপুরী ময়েক( মৈতৈ ময়েক)কি লাইরিকসু ১৯৮৪দা ফোঙখি। বাংলাদেশতা অহানবা মনিপুরী নোভেলসু মহাক্কি ‘লম্মাঙনবা’ হায়বা অসিনা ওইখি। অসিতসু নত্তনা লমকোয়ৱারীসু ইদুনা ফোঙখি। অসুম্না হনবা লৈত্রবা থৌনা অমগা লোয়ননা মনিপুরী খোরিলোলদা লেপ্তনা ইদুনা অমদি খুদোল তমদুনা লাক্লিবা অইবনি। অসিগুম্বা মনিপুরী খোরিলোলবু মালেমগী মীয়ামদা মশক তাকনবা হোৎনরিবা অমসুং মনিপূরী লোল, কলচর, ত্রেদিসন অমদি খোরিলোলবু ঙাক শেল্লিবা মসিবু হেন্না চাওখৎনবা হোৎনরিবা কবি অসিদা সাহিত্য থৌপাং লূপ, ইম্ফালনসু ‘থিয়াম লাইরিকমচা ইণ্টরনেস্নেল এৱার্দ, ২০১১ পীদুনা ইকায়খুম্নখি। অসিতসু নত্তনা অইবা এঃ কেঃ শেরামদা তোঙাণ তোঙানবা এৱার্দ কয়া পীখিবা লৈরে। খরদং পল্লবদা, ‘য়েংখোম কমল নীংশিং মনা’ (সিলচর, ২০০৩); ‘সাহিত্যভূষন’ (আসাম মণিপুরী সাহিত্য পরিষদ, ২০০৮); ‘প্লাটিনম জুবিলী থোইদোকপা সম্মান’ (মণিপুরী সাহিত্য পরিষদ, ইম্ফাল, ২০১০); ‘হিজম ইরাবত মেমোরিয়েল ইণ্টরনেস্নেল এৱার্দ’ (ইম্ফাল, ২০১১); ধানসিঁড়ি সম্মাননা (ঢাকা, ২০১২); বাংলাদেশ লেখক সংঘ সম্মাননা (ঢাকা, ২০১৫) অসিনচিংবা কয়া অমা ফংখিবা লৈরে। কবি এঃ কেঃ শেরামগী অহুমশুবা শৈরেংগী লাইরিক, ‘নুংশিবগী তেংথারোল’ হায়রিবা অসিদা পুন্না শৈরেং ৫৬ য়াওরি। তোঙান তোঙাণবা থিমদা মরু ওইবা ইমা লৈবাক, পোকণফম লমদম মনিপুরবু মতম খুদিং নীংশিংজদুনা শোঞ্জদুনা লৈবা, ইমা মহাক্কী মরমদা শৈথাজবা অসিগুম্বা অইংবা অমদি থোৎণা মেংলবা ফজরবা শৈরেং কয়া য়াওরি। অদুগা পুন্সিবু য়াম্না ক্রিতিকেল ওইনা য়েংবা অমদি তুংগীদমক য়াম্না খঞ্জবা ৱাজবা মতৌশিং য়াওবা শৈরেংশিংসু মথেল অমা ওইনা য়াওবা থেংনৈ।
“নুংশিবা হায়বসি পুন্সিগী শিদয়াইনি, মিকুপ’মতা তৎন-থান য়াদ্রবা লেপ্পনাইদ্রবা পুন্সি-খোঙচৎকী তঙাইফদ্রবা খোঙবুরোইনি নুংশিবা। অদুগুম্বা নুংশিবদো ঙসিদি মতীক-ময়াই চমথরক্লবরা করিনো, নোংম নোংমগী মকশিল্লকই মাগী মায়থোং” (লাঃ০৯) কবিনা ইবা ৱাহৌদোক্তা অসুম্না মগুন হন্থরকলিবা মীওইবগী থম্মোয়গী মশক অদু ইরক্লি। ফোঙদোক্ত্রবসু থম্মোয়দা অসুম লাইজ ইফুৎকুম্না ফাওরক্লিবা নুংশি শৈরোলশিংদি তেংথাদবা ঙমদে। অমত্তা খাক্তনা ইনিংলকই। পুন্সিগী মীকুপ কয়াদা ইখিবা ফাওখিবা ইহৌরকখিবা পুম্নমক অদু কবি শেরাম্না লাচল্লকলি মহাক্কী অহুমশুবা শৈরেংগী লাইরিক অসিদা। অদুনা তম্লক্লি খুদোল ওইনা ‘নুংশিবগী তেংথারোল’ “নঙ কবিতা খক পাদে হায়বা ঐ খঙঙি,/ অদুমক্তদা ঐদি কবিতা ই।/ নুংশিববু নঙদি য়াম্না তুক্কৎচৈ/ মদু খঙনা ঐনা খুদোলজখি ঐগী নুংশিবা থম্মোয় অসে।/ নঙগী মিৎস্নাগী সমুদ্রদা কৈদৌঙৈসু ঐগী মমি তাখিদে/ অদুমক্তদা ঐগী অপংবা থম্মোইদি তত্তনা/ মঙ মঙই-কল্পনাদা তাউই…” কবিনা ইরিবা হায়রিবা ফোঙদোক্লিবা পুম্বা তাবিগদবা মহাকনা তাদ্রবদা নিংবা কায়দুনা লৈবগী মহুত্তা নুংশি শৈরোলদি লেপ্তনা অদুম শকলি কবিসু। অৱাংবা তলা পামেলদা খোঙ্গুমমৈশিং, ঊরৈশিংনা মাকুম মথা য়ৌরক্তুনা মকা লাম্না লৈশাৎ তমলমদুনা মতম অমুক লোইদুনা কেনখি। কবিসু অইবা ওইনা পোকলুবনা ইবগী লমসিদা নুংশিবা ৱাহৈনা, অচুম্বা ৱাঙাংনা তেংথারোল অমা শকচবা পাম্লুই। মসিদা তাবিনবা লৈতে খন্দুনা ইদবা তৌদে। নোংমা মকশিল্লবা থম্মোয়দুবু কুপশিল্লিবা উনগুম্লবা মতুমশিং অদু শৌদোক্তুনা নুংশিবগী লূরবা লাইজ অদু চেল্লকখিনি হায়না থাজবা থম্লি। ইচম চম্বা ৱাহৈনা হায়নিংবা থম্মোয় য়াৱাদি ৱাহৈ লীশিংনা ফোঙদোক্লি কবিনা মীওইবদা চেলহন্নিংবা মগুন অদুদি।

হিংনা হিংনা অশিবগুম্না মঙ হাদা চৎলিবা খুনাই অসিদা কবি শেরামগী ‘তেংথাখোল’না খোন্থাং অমদি লেপ্তনা য়ৈহল্লরি। পুন্সিগী ৱাহন্থোক হায়বদু করিনো খঙনরক্ত্রবা মতমসিদা থম্মোয় মপাউ অমদি তম্নিংই কবিতা ওইনা। অদুনা হায়রক্লি, শিখ্রবশিং নত্তে,/ ঐগী মায়কৈ মরিদা হৌজিকসু লেংঙি-চৎলিবা/ থৱায় য়াওদনা হিংদুনা লৈরিবা অশিবা ময়াম’সিগীদমক্তনি/ ঐগী ঙসিগী তেংথারোল অসে…হৌজীকসু হিংদুনা লৈরিবা অশিবা ময়ামসিগী অৱাবদি;/ মখোয়বু তিংথৌগুম খোঙনেৎনবীরি…” (লাঃ ১৪) তাবীনবা লৈতে খল্লবসু শক্তবা য়াদে খন্না শক্লি কবিনা। মিৎমাংদা উরে, মীওৎ মীনৈগী পাঊদি লোয়বসু নাইদে। অসুম তাদুনা লাক্লি। হেন্নসু তারক্লি। মীওইবগী থম্মোয় অসি শেংদোকপা পাম্লক্লি কবিনা। মীওইবা ওইনা লৈহণ্ণিংই। অদুনা খোঞ্জেল হৌনা শক্লক্লি তেংথাখোল ওইনা, “ অমুক্তদি, অহিংবা হকচাংদা অশিবা থৱায় পুরিবা মীওইবশিংসে/ হিংঙকসনু হিংবগী অশেংবা অথর্দা” (লাঃ ১৪)
পুন্সিদা হন্না হন্না য়েংদুনা মশক অমদি লেপ্নবা হোৎনৈ কবিশিংনা অইবশিংনা অদুবু করিগুম্বদা থাজবা হায়বসিনা তুংওইনরম্বদা নীংবা কায়দুনা লৈহৌবা হায়বসি হৌনশানি। কবিসু অসিগুম্বা ‘থাজবগী য়ুম’ অমদা লৈরম্মি অদুবু মসিনা নোংমা য়াম্না থাজদনা মাংখিবদা মঙলান্দ ওইদুনা লৈহৌবসু য়াওদবা নত্তে হায়বদু ফোঙদোক্লি। থাজবা হায়বসি লৈরিমখৈ অকিবসু লৈতে। শিগনি হায়বফাওবা কাওনরি থাজবা হায়বসিনা লেংদনা লৈবা মতমদদি। পুম্নমক হরাও তরামগনি, নুংশিগনি, নুংঙাইবনা থন্দুনা লৈগনি। অদুবু হেক মাংখিবা মিৎকুপশিংদদি য়াম্না ইন্সেক্যুওর ওইবা অকিবা ফাওরকপা হায়বসি মহৌশানি।
হৌজীক্কি মতমসিদা মমা মপা ওইবশিংনা মচাশিংবু মী ওইনবা হোৎনবদা থেংনরিবা খুদোংচাদবা কয়া অদুগী সিম্বোল অমদি ইমেজরিদা পুশিল্লক্তুনা ইমা শৈরেং মখল অমনি ‘ইমাগী ৱারী অদুগা তশেংনা ফোঙদোকনিংলিবা অমদি পীনিংলীবা পাঊজেলদি ইমা মনিপুরগী হৌজিক ওইরিবা লাইবক থিরবা মরাইবক অসিবুনি কবিনা পুথোক্লগা তেংথারিবসিদি। অদুনা কবিনা হায়রক্লি, ঙসি ঐনা ইজরিবসি করিগুম্বা কবিতা’মা নত্তে,/ মসি শুপ্ন মমা’মগী ৱারীনি;/…মকোক শারবা মমা’দুগী ৱারী; …মরৌ ফত্ত্রবা অতোপ্পা মীওই কয়াগী/ শরৌ লাংদা থুদুনা/ মথৌনা- মরিংজেল পুথোকপা ঙমজদ্রবী, কনা উহন্দনা লোন্না/ থম্মোই’নুংদা পিরাংগী ঈরিক শিন্থহনবতনা/মথৌদাং ওইনা লৈজরবা,/ লাইবক থীরবী ইমা অমগী ৱারীনি। মসি ঐগী ইমাগী ৱারীনি,…” (লাঃ ২৬) কবিনা মনিপুর ইমানা নাওকোনবদি ফংজদ্রবা অদুগা থম্মোয়নুংদি মতম খুদিং চেৎনা নাওকোঞ্জরিবা লমদা তাম্না লৈখ্রবা বাংলাদেশকি মনিপুরীশিংনা ইমাগী লমদম মনিপুরদা নোংমফদোক লাকপদা উরিবা তারিবা থেংনরিবা মীখা পোনবগী শক্তমগুম্না লৈরম্লিবা পোকনফম ইমাগী চেংলৌ অদু য়েংঙমদে। পাম্বৈ লৈতবগুম্না তোন্না লৈবদু খাংবা ঙমজদে। অসিগুম্বা ইমাগী অৱাবা ফীভম অদো ইদবসু ঙমদে অমুক কবিনা। মসিদা শোয়রিবসি ৱাখল থেল্লবা মচাশিং অসিনা শক্তি মুন্নবদা ওইহল্লিব্রা হায়বা ৱাহংশিং হংনিংবসু ফাওদবা নত্তে।
জাতি অমনা ঙাংনরিবা লোল হায়বসিদা খুনাই অদুগী মশক পুম্নমক লোয়না য়াওদুনা লৈগনি। লোলগী মরমদা শৈরেং ইবা। লোল অদুবু পার্সিনিফাইদ তৌদুনা শৈথাবা, মসিগী মরু ওইবদু অপাবশিংদা খঙহন্নবা হোৎণবা হায়বসি কবি নত্ত্রগা অইবা খুদিংনা লোয়না হেক্তা তৌবা থেংনদে। অইবা খুদিংমক লোল চাওখৎনবা হোৎনরম্বদি য়াই অদুবু হকথেংননা লোলগী ঈহৌ শাগৎপা লেঙ্গ্যুয়েজ এক্তিভিস ওইবদি মশিং থিবা য়াগনি। বাংলা লোল ঙাংবা মীওই মিলিয়ন কয়াগী মরক্তা মনিপুরী লোল ঙাংবা মীওই লীশিং খরদা ইমালোল মনিপুরী নুংশিবগী ঈহুল ফাওহনখিবা অমদি মসিবু মীরম লৈবাক অমদা চাওখৎনবা হোৎণবা হায়বসে তরাই তরাইবা থবক অমদি নত্তে। কবি এঃ কেঃ শেরাম চোকথবা নাইদে। ইমালোল্গীদম কত্থোকপা অমগা লোয়ননা থবক তৌদুনা লাক্লি অমদি লেপ্তনা থবক কয়া তৌরক্কনি হায়বসি মহাক্কী শৈরেং , ‘মৈতৈলোল’ হায়বসিদা মপুং ফানা ফোঙদোক্লি। অদুনা ইমালোলদা তেংথারক্, “মৈতৈ জাতিগী থৱায়নি নঙদি, নঙগী পীবুকনুংদা খোঞ্জেল ওইনা ফাওরিবনি/ ঐগী ইপা-ইপুগী থম্মোইগী খোন্থোক;/ নঙদি মৈতৈলোননি,/ …নঙগী খোন্থোক্কী খোন্থাংদা/ থম্মোইগী ফোঙঙ্মদ্রবা য়াৱাগী খোঞ্জেল হাপখি/ ঐগী ইপু-পুরেননা,…( লাঃ ৪৬) ইমালোনগী শেংলবা ময়েকনা অরিবা তালাগী অনৌবা য়েন্নিংগুম্না চোংলকপদা কবিনা চাওথোকচরি ইমালোলগীদমক। মপুংদা য়েংবদা কবি এঃ কেঃ শেরামগী শৈরেংশিংদা নেস্নেল্লিজম ওইবা স্পিরিত অমদি লোয়নদুনা চৎলি। লেপ্তনা মমল য়াম্লবা শৈরেং কয়াসু খুদোল তম্লকখিনি হায়না থাজবা থমজরি।

COMMENTS

WORDPRESS: 0
DISQUS: