ইন্দিয়ানা কোবিদ-১৯ নাবদা মালেমদা অনিশুবা লৈবাক ওইরক্লিবসি কুম্ভ মেলা অমদি ষ্টেট ৫গী ইলেক্সন পাঙথোক্লবদগীনি

Homeভারত

ইন্দিয়ানা কোবিদ-১৯ নাবদা মালেমদা অনিশুবা লৈবাক ওইরক্লিবসি কুম্ভ মেলা অমদি ষ্টেট ৫গী ইলেক্সন পাঙথোক্লবদগীনি

ইন্দিয়া অসি কোবিদনা নাহল্লবা মালেমগী লৈবাকশিংগী মনুংদা আমেরিকানা অহানবা অমদি ইন্দিয়ানা অনিশুবা লৈবাক ওইরক্লিবসি কোবিদ-১৯ গী অহানবা ওয়েভশিং মুথৎপা ঙমদ্

ইন্দিয়া অসি কোবিদনা নাহল্লবা মালেমগী লৈবাকশিংগী মনুংদা আমেরিকানা অহানবা অমদি ইন্দিয়ানা অনিশুবা লৈবাক ওইরক্লিবসি কোবিদ-১৯ গী অহানবা ওয়েভশিং মুথৎপা ঙমদ্রিঙৈদা কুম্ভ মেলা অমদি স্টেট ৫ গী ইলৈক্সন পাঙথোকপদা এসওপি ঙাকপা ঙমখিদবা অসিনা মরম ওইরগা কোবিদকী অনিশুবা ওয়েভশিংদা লৈরিবা মীয়ামদা পাক-শন্না শন্দোরকপনা অনা-অয়েক অমদি মীশি-মীনা মায়োক্নরকপগী লম্বী অমা ওইহল্লকখিবনি হায়না মণিপুর পীপলস পার্টি (এমপিপি) গী ভাইস প্রেসিডেন্ট ডাঃ এস ইবোমচা সিংহনা চেরোল অমদা ফোঙদোরক্লি।

চেরোলসিনা মখা তারদুনা, কুম্ভ মেলা অসি হিন্দু অমদি হিন্দু লাইনিং চৎপশিংগী মরুওইবা অচৌবা কুম্মৈ অমনি। য়ুপিদা পাঙথোকপা কুম্ভ মেলা অসিবু য়াওবা লাকখিবা ইন্দিয়াগী স্টেটশিংদগী হিন্দু লাইনিং চৎপশিং লাক্ষ কয়ানা কোবিদ লায়নাদগী ঙাকথোক্নবা এসওপি ঙাক্না চৎপা ঙমখিদে অমদি মেলা অসি লুপা ক্রোর লিশিং ৪ রোম চঙনা পাঙথোকখি হায়না সোসিয়েল মেডিয়াশিংনা হায়নরক্লি। লোয়ননা কুম্ভ মেলাদা শরুক য়ারুবশিং নোংমদা মীওই লিশিং ৫০রোমগী মথক্তা কোবিদ-১৯ নারকপগী পাউসু সোসিয়েল মিডিয়াশিংনা ফোংনরকখ্রবনি।

কুম্ভ মেলাদা তিনখিবা ভক্তশিং

অমরোমদা, ইন্দিয়াগী স্টেট ৫ হায়বদি আসাম, ওয়েস্ট বেঙ্গল, টামিল নাড়ু, কেরেলা অমদি পোন্দিচেরিগী এসেমব্লি মীখলশিং পাঙথোকপদা কোবিদ-১৯ গী এসওপি ঙাক্না পাঙথোকপা ঙমখিদে। মরমশিং অসিনা কোবিদকী অনিশুবা ওয়েবশিং স্টেট পুম্নমক্তা পাকশন্না শন্দোরক্নবা অচৌবা লম্বী অমা ওইরকখিবনি হায়বা ৱাফম এমপিপিনা থম্লক্লি।

মণিপুরদা কোবিদ-১৯ গী অনিশুবা ওয়েভ অসি খঙহেন-হেঞ্জিল্লক্লিবসি মপান্দা লৈরুবা মীওই লিশিং কয়ানা কোবিদ টেস্ট তৌদনা ময়ুম-ময়ুমদা চঙশিল্লুবদগী কোবিদকী লায়না অসি লৈকাই/লৈকাইশিংদা পাক-শন্না শন্দোক্নরকখিবনি।

কোবিদ নাবগী চাং অসি নোংমদা স্টেট অসিদা ৬০০ য়ৌরক্লে অমদি অনিশুবা ওয়েভতা শিখিবা মশিং ৪৪০ হেন্ন শিখ্রে। অনিশুবা কোবিদ ওয়েভ থিংনবা, অহানবা ওয়েব থিংনবা চত্থখিবা কাংলোনশিং, মপান্দগী চঙলকপা খুদিংমক কোবিদ সেন্টারশিংদা হান্না থম্লগা টেস্ট তৌরগা নেগেটিব ওইরবশিংতমক ময়ুম-ময়ুমদা হোম ক্বারেন্টাইন তৌফম খুদোং-চাদবশিংদা গবর্নমেন্টগী কোবিদ কেয়ার সেন্টারশিংদা থম্বীবনা চুমগনি। কোবিদ-১৯ নাবদগী শোকচিল্লবশিং হোস্পিটালদা পুখৎপদা স্টেট গবর্ণমেন্টগী অয়াবা য়াওদ্রবদি লায়েংবীয়ু য়াদ্রে, মীচং-শঙ্গ লৈজদ্রবা অনাবশিংদি শিবা তারিব্রা। মসিগী চৎনবী অসি চত্থদুনা লৈরবদি মীয়ামগী ইহৌ কয়া শোয়দনা লাকপা য়াই। মদুগীদমক এমপিপিনা মীপাইবা পোইক হায়রি।

মণিপুরগী হেলথ মিনিস্টারসু ওইরিবা মণিপুরগী চিফ মিনিস্টার এন বিরেননা অকনবা মীৎয়েং চঙবীদুনা অনাবগী মরক্তা শিবগী চাং ৱাংখৎলকপা অসি কোক্ননবা রিমস, জেনিমস অমদি প্রাইভেট হোস্পিটালশিং নৎত্রগা দিস্ট্রিক্ট হোস্পিটালশিং অমদি হেলথ সেন্টারশিংদা ডাক্তার, নার্স অমদি হেলথ ৱার্কারশিং মতিক চানা থম্লগা অনাবশিং লায়েংহন্নিংবগী অপাম্বা এমপিপিগী ভাইস প্রেসিডেন্ট চেরোলসিনা মখা তানা আপিল তৌরি।

অদুগা মপান্দা লৈরুবা লমদমসিগী মীওইশিং পুম্নমক মণিপুরদা চঙ-লকপদা অথিংবা থম্বীগনু। মখোই খুদিংমকপু লায়েংবীদুনা পুন্সি কন্নবা হোৎনব হায়বসি লৈঙাক পায়রিবা মপি-মপা ওইবশিংগী থৌদাংনি হায়বসি য়াফম থোকই।

লৈঙাক্না কোবিদ লায়না অসি থিংবা ঙম্লবা হোৎনবদা লৈঙাক্না দিস্ট্রিক্ট ৭তা কারফিউ থমজিনবদগীশু-নোম্লগা হিংজরম্বা ইমুং কয়াদি নোংমগী দরকার লৈবা চান-থক্নাবা চিঞ্জাকশিং ফংদবনা অৱাবা মায়োক্নরে। মীয়ামগী নোংমদা চঙবা চিঞ্জাকশিং দিস্ট্রিক্ট/দিস্ট্রিক্টশিংদা ডিপুটি কমিশনারশিংগী খুত্থাংদা য়ুমথোং খুদিংমক্তা য়ৌননবা থৌরাং পায়খৎহন্নিংই। গবর্নমেন্টগী শেমগৎ শাগৎপগী থবক্তি কোন্না তৌবা য়াই। অহানবদা মণিপুর মীয়ামগী পুন্সি কন্নবা অকনবা থৌরাং পায়খৎহন্নিংই।

মরমদুনা লৈঙাক্কী দিপার্টমেন্ট খুদিংমক্কী বাজেটশিং, এমএলএ লোকেল এরিয়া দিবেলপমেন্ট ফান্ডশিংদগী কোবিদ থেংনবদা মীয়ামগী মতেং পাংনবা শেনফমশিং খরা ককথরগা শিজিন্নবা য়ারগদি মদুনা মীয়ামগী মতেং পাংহন্নিংবগী অপাম্বসু এমপিপিনা থম্লক্লি।কোবিদ-১৯ অনিশুবা লায়চৎ থেংননবা রাজনীতি দলশিংগী খেন্নবা ৱাখল থাদোক্নরগা অল পোলিটিকেল পার্টি খুদিংমক্তা খন্ন-নৈনবগী অপাম্বা অদুসু ফোঙদোরক্লি।

সোর্সঃ সঙাই এক্সপ্রেস।

COMMENTS

WORDPRESS: 0
DISQUS: