‘ইন্টরন্যাশনাল মাদার ল্যাঙ্গুয়েজ ডে’গী মিৎয়েংদা বাংলাদেশকী মণিপুরী লোন

Homeআর্টসৱারেং

‘ইন্টরন্যাশনাল মাদার ল্যাঙ্গুয়েজ ডে’গী মিৎয়েংদা বাংলাদেশকী মণিপুরী লোন

মণিপুরি লোন অমসুং সাহিত্য য়াম্না লিরবা অমসুং হায়ফেৎ চাওখৎলবা লোন-সাহিত্যনি। মণিপুরি লোনগী চহীরোন লিশিং অহুম মখাইরোম শুরে হায়না অখঙ-অহৈশিংনা মোত পী

এ কে শেরাম

মণিপুরি লোন অমসুং সাহিত্য য়াম্না লিরবা অমসুং হায়ফেৎ চাওখৎলবা লোন-সাহিত্যনি। মণিপুরি লোনগী চহীরোন লিশিং অহুম মখাইরোম শুরে হায়না অখঙ-অহৈশিংনা মোত পীরি (Parishad : 1970 : 35)। অইবা মণিপুরি সাহিত্য হৌবনা অহুমশুবা কুমজাদগীনি (Nilkanta : 1982 : 101)। মণিপুরি সাহিত্য হায়ফেৎসু চাওখৎলবনি, নোংপোক ভারত্তা বাংলা অমসুং অসমীয়াগী হেক মথংদা মণিপুরি সাহিত্যগী ফমনি হায়না অখঙ-অহৈশিংনা হায়রি (Jyotirmoy : 1973 : 1)। মণিপুরি লোন মণিপুর রাজ্যগী স্টেট-ল্যাঙ্গুয়েজনি, ভারত সরকারনসু ইন্ডিয়ান কনস্টিটিউশনগী নিপালশুবা সিড্যুলদা চনশিনবিদুনা মণিপুরি লোনসে অপূনবা ভারতকী ওইবা মরূ ওইবা লোন অমনি হায়নসু শক খঙবিরবনি। ভারতকী সাহিত্য একাডেমিনসু লোনসিবু শক খঙবিদুনা চহী চহীগী লোনসিগী মতীক চারবা সাহিত্য পোত্থোক অমমম্বু একডেমি এৱার্ড পীদুনা ইকাইখুম্নবিরবনি। মণিপুরদা স্কুল-কলেজতা লাইরিক-লাইশু তম্বসি মণিপুরি লোনদা তম্মি। মণিপুর ইউনিভার্সিটি অমদি ভারতকী অতৈ ইউনিভার্সিটি কয়াদসু মণিপুরি লোনদা তম্বা য়াই।

বাংলাদেশতা খুন্দা-লৈতাদুনা লৈরিবা মখল-মথেলগী মীওই ফুরূপ মচা মচাশিংগী মনুঙদা মণিপুরিসু অমনি। বাংলাদেশতা মণিপুরিশিংনা হৌজিক হৌজিক লৈরিবসি মরূ ওইনা সিলেট হায়না খঙনবা লমদমদনি; সিলেট ডিভিশনগী মনুঙ চনবা সিলেট, মৌলভীবাজার, হবিগঞ্জ অমসুং সুনামগঞ্জ ডিস্ট্রিক্টতা। হান্নদি ঢাকা, নেত্রকোণা অমসুং ব্রাহ্মণবাড়িয়াদসু মণিপুরি খুন্দারম্মি হায়বগী ৱারী লৈ। মণিপুরদগী হৌরকপা মণিপুরি হায়বা মীওই ফুরূপ অসি মঙ্গোলোয়েদ শাগৈগী ‘তিবেতো-বার্মিজ’ মশা-ফুরূপকীনি। মণিপুরি লোনসু অদুমঙাই।

   ‘মণিপুরি লোন’ হায়না ঐখোয়না হৌজিক খঙনরিবসি মমাঙৈদদি ‘মৈতৈ লোন’ হায়না খঙনরম্মি। মণিপুরি জাতিগী শকতাক-মিংলেনসু ‘মৈতৈ’ ওইরম্মি। তৌবগীদি হৌজিকসু ‘মণিপুরি’ কৌরিবা মীওই কাঙলূপ ঐখোয়সে ইশানদি’সুম ইশাবু ‘মৈতৈ’নি হায়না শক তাকপদনা হেন্না হৈনজৈ-ঐখোয়গী ইমালোনসিবুসু ‘মৈতৈ লোন’ হায়না হায়জৈ। মসিগী পরি-পখোং থিরুরবদি ঐখোয়না উবা ফংঙি, হৌজিক্কী মণিপুর অসিনা ‘মণিপুর’ মিংথোন লৌখিবসি পংকুই কুইদ্রিবা ঢ়ারীনি। খ্রিষ্টগী তরানিপালশুবা কুমজাদা লমদমসিগী লাইনীং লীচৎতা অহোংবা লাকখিবগী তাঞ্জা’মদা ওন্নতৈনবা ঢ়ারীদা য়ুম্ফম ওইরগা লৈবাক অসিগী মিংথোন ওন্থোক্তুনা ‘মণিপুর’ থোনখিবনি। মদুগী মমাঙদা হায়রিবা লম অসি মতম মতমদা ‘মৈতৈ লৈপাক’, ‘কংলৈপাক’, ‘মৈত্রবাক’ অসিগুম্বা মিং কয়াদা খঙনরম্মি হায়বগী ঢ়ারী ঐখোয়না ইতিহাসতা থেংনৈ। ‘মণিপুর’ কৌরবা’তুংদা অমসুং মিংথোন অসি ময়াম্না খঙনরবা, চৎনরবা অমদি য়ানরবা মতমদা লমদমদুগী মপুঙ ওইবা মীওই ফুরূপ ‘মৈতৈ’বু লৈবাক অসিগী মিংগা মরী লৈননা ‘মণিপুরি’ হায়না শক খঙনবা হৌরকখি। হায়রিবা ‘মণিপুরি’ কৌবা মিংথোন অসি ‘মৈতৈ’গী মহুৎ শিনবা ঢ়াহৈ ওইনা শিজিন্নখি। ইতিহাসকী অঙনবা মতমদা হৌজিক মণিপুর হায়না খঙনরিবা লমদমসিগী মচি মচিদা তোঙান তোঙানবা মীওই ফুরূপ কয়া খুন্দারম্মি। ঈরীগী মতুঙ ইন্না হৌরকফম অমতদগী চোংথোরকখিবনি হায়রিবা তোঙানবা ফুরূপশিং মশা মশাগী নিংথৌ পান্দুনা মনীং তম্না পাল্লম্মি। অদুবু মতমগী শাংলবা খোঙচৎতা য়েক/শালাই হায়নসু খঙনবা তোঙান তোঙানবা ফুরূপশিং তিনশিন্নদুনা অপূনবা ‘মৈতৈ জাতি’গী শক্তম লৌরকখি। ইতিহাসকারশিংগী মোততা নিংথৌজা য়েকনা খূৎকন পাঙ্গনবা হেল্লকপদগী অতৈ অতোপ্পা ফুরূপশিংবু খোপচিল্লগা অপূনবা লৈবাক অমসুং ফুরূপ অমা শেমগৎলকখি অমসুং নিংথৌজা য়েককী ওইবা মশাগী শকখঙ-মিংথোন ‘মৈতৈ’না ময়ামগী মিংথোন ওইরকখি। অসিগুম্বা নৌনা শক্তম লৌরকপা ‘মৈতৈ জাতি’গী পংকোৎতা মতম মতমদা মপাল লমদমদগী লাকপা অতোপ্পা ঈরীগী মীওই ফুরূপ কয়াদংসু তিল্লখি অমসুং মৈতৈ লোন-সংস্কৃতিবু নিঙাইদনা লৌখি। অদুগুম্বা ফুরূপ কয়াদি ‘মৈতৈ বামোন’ ‘মৈতৈ পাঙন’ অসিনচিংবনি। মখোয়শিংদু ‘মণিপুরি’না ‘মৈতৈ’গী মহুৎ শিল্লক্লবা মতমদা ‘মণিপুরি ব্রাহ্মণ’ ‘মণিপুরি মুসলিম’ অসুম্না খঙনরকখি। মৈতৈ লোনদুসু মণিপুরি লোন হায়না খঙনখি। অচৌবা মৈতৈ জাতিগী পংকোৎতা তিনদবা অতৈ মীওই ফুরূপশিং অদুম মশা মশাগী হান্নগী ঈরীগী ওইবা শক্তাক-মিং শিজিন্নৈ-মণিপুরি মিংথোন লৌদে। খুদম ওইনা পনবা য়াই ‘বিষ্ণুপ্রিয়া’শিংগী ৱা। লৈমনায়, নিংথৌনায়, ময়াং, কালিশা অসিগুম্বা তোঙান-তোঙানবা মিংদা শক তাক্লম্বা ঈরীগী ওইবা হৌরকফম অমত্তদগী থোরকপা ফুরূপশিংসি পূল্লগা ‘বিষ্ণুপ্রিয়া’ হায়না মিংথোল্লবসু মখোয়দি মৈতৈদা তিল্লমদবনিনা ‘মণিপুরি’ মিংথোল্লকপদসু মখোয়বু মণিপুরিনি হায়না খক শক তাকখিদে। অদুমক্তদা বিষ্ণুপ্রিয়াশিংনা মখোয় মণিপুরি জাতিগী শরূক অমনি অমসুং মখোয়গী লোন-বাংলা অমসুং আসামী লোনগী ‘মশা-লোন’ অমনি হায়না অয়াম্বা পন্ডিতশিংনা য়ানরিবা- ‘বিষ্ণুপ্রিয়া’ লোনসিসু মণিপুরি লোনগী মখল অমনি হায়না দাবি তৌরিবসি মণিপুর-মপানগী মফম খুদিংমক্তনি। বাংলাদেশতনমুক মসিগী দাবিগী ঈহৌ অসি খিৎ হেল্লিবনি-মসিদদি মখোয়না মতাঙ চাবা য়েংদুনা হেক হেক মখোয়গী লোন অসি অশেংবা ‘মণিপুরি লোন’মকনি হায়না দাবি তৌশিল্লিবনি। মসিগী ফিভমসিদনি ঙসি বাংলাদেশতা লৈজরিবা মশীং লীকপা অমসুং পাঙ্গল শোঞ্জরবা মণিপুরি ঐখোয়না ইমালোন মণিপুরিগী শক্তম ঙাকপা অমসুং য়োকপগী অকনবা খোঙজং চংশিঞ্জরিবসে।

   মণিপুরি লোন অমসুং সাহিত্য য়াম্না লিরবা অমসুং হায়ফেৎ চাওখৎলবা লোন-সাহিত্যনি। মণিপুরি লোনগী চহীরোন লিশিং অহুম মখাইরোম শুরে হায়না অখঙ-অহৈশিংনা মোত পীরি (Parishad : 1970 : 35)। অইবা মণিপুরি সাহিত্য হৌবনা অহুমশুবা কুমজাদগীনি (Nilkanta : 1982 : 101)। মণিপুরি সাহিত্য হায়ফেৎসু চাওখৎলবনি, নোংপোক ভারত্তা বাংলা অমসুং অসমীয়াগী হেক মথংদা মণিপুরি সাহিত্যগী ফমনি হায়না অখঙ-অহৈশিংনা হায়রি (Jyotirmoy : 1973 : 1)। মণিপুরি লোন মণিপুর রাজ্যগী স্টেট-ল্যাঙ্গুয়েজনি, ভারত সরকারনসু ইন্ডিয়ান কনস্টিটিউশনগী নিপালশুবা সিড্যুলদা চনশিনবিদুনা মণিপুরি লোনসে অপূনবা ভারতকী ওইবা মরূ ওইবা লোন অমনি হায়নসু শক খঙবিরবনি। ভারতকী সাহিত্য একাডেমিনসু লোনসিবু শক খঙবিদুনা চহী চহীগী লোনসিগী মতীক চারবা সাহিত্য পোত্থোক অমমম্বু একডেমি এৱার্ড পীদুনা ইকাইখুম্নবিরবনি। মণিপুরদা স্কুল-কলেজতা লাইরিক-লাইশু তম্বসি মণিপুরি লোনদা তম্মি। মণিপুর ইউনিভার্সিটি অমদি ভারতকী অতৈ ইউনিভার্সিটি কয়াদসু মণিপুরি লোনদা তম্বা য়াই। আসাম অমসুং ত্রিপুরাদসু প্রাইমারি অমসুং হাইস্কুলগী থাক্তা মণিপুরি লোননা লাইরিক তম্বগী খুদোং চাবা সরকারনা পীরে। মণিপুরি লোনগী মশাগী তোঙানবা ময়েকসু লৈজৈ। মতম্মদা চৎনরম্বা ময়েক অসি ইতিহাসকী তাঙ্কক অমদা মরম কয়াদগী মুত্থৎখিদুনা বাংলা ময়েকনা মহুৎ শিনখিবনি। হৌজিক অমুক অরিবা মৈতৈ ময়েক অসি মণিপুরদা চৎনরে। স্কুল কলেজতা মৈতৈ ময়েকনা ইবা লাইরিক তম্লে। মপাল মণিপুরগী অতৈ মফমশিংদসু মৈতৈ ময়েক চৎননবা হোৎনরি।

   অদুবু, বাংলাদেশতদি হায়ফেৎ চাওখৎলে হায়রিবা লিসু য়াম্না লিরবা মণিপুরি লোন অসি খরা অৱাবা ফিবমদা তাখি। মরমদি, বাংলাদেশতা মণিপুরিশিং মশীং য়াম্না লীকই। খুন্দাবসু য়াম্না চোইজাইননা তাই। চহী চহুমগা য়াঙ্খৈ হেন্না মমাঙদগী খুন্দাদুনা লৈদুনসু লমদমসিগী মণিপুরিশিং মমালোন মণিপুরিদা লাইরিক-লাইশু তম্বগী খুদোংচাবা ফংখিদে। বাংলাদেশ সরকারনা বাংলা নত্তবা লমদমসিগী অতৈ লোন অমত্তবু শক খঙবীদে। মমালোনগী হক তানবদা নিংঙাইদনা থঢ়ায় কত্থোকখিবগী মশক নাইরবা ইতিহাস য়াঙ্খৈনিথোইগী কুনমাথোই ফেব্রুয়ারিগী ময়েক লারবা নুমিৎ অদুবু ইউনেস্কোনা শক খঙবীদুনা মালেম শীন-থুংনা ‘ইন্টরন্যাশনাল মাদার ল্যাঙ্গুয়েজ ডে’ হায়না পালন তৌনরি। নুমিৎ অসিগী মরূ ওইবা পান্দমদি মালেমগী মমালোন পূম্নমকপু য়োকখৎপিবা অমসুং চাওখৎহন্নবা হোৎনবিবা অসিনি। মসি মরূ ওইনা স্টেট অমসুং সরকারগী দায়িত্বনি। অদুবু বাংলাদেশতদি বাংলা নত্তবা লোন অমত্তবু সরকারনা শক খঙবীদবনা লমদমসিগী ফুরূপ মচা মচাশিংগী মমালোন কয়া থৌশাবিদনা শিবা য়াবগী ফিবমদা লৈরি। ঐখোয়না থংনবা লৈবাক ইন্ডিয়াদা উবা ফংঙি, ‘স্টেট ল্যাঙ্গুয়েজ’ হিন্দিগা লোয়ননা লৈবাকতুগী অতোপ্পা মরূ ওইবা লোন কয়ামবুসু কনস্টিটিউশনদা চনশিনবিদুনা সরকারনা শক খঙবীরে অমসুং মখোয়গী চাওখৎনবগী লম্বীদা তেংবাং কয়া পীবিরি। সাহিত্য একাডেমিনসু লোনশিংদুবু শক খঙবীদুনা চহীগী অদুগুম্বা লোন খুদিংগী মতীক চারবা সাহিত্যগী পোত্থোকশিংদা একাডেমি এঢ়ার্ড পীদুনা ইকাইখুম্নবীরি। মণিপুরিসু হায়রিবা লোনশিংদুগী মনুঙদা অমনি। ভারতকী তোঙান তোঙানবা রাজ্য কয়া লৈ, অদুগুম্বা রাজ্যগী থাকতসু মখোয়না অসিগুম্বা খোঙথাং কয়াদং লৌবিরি। ত্রিপুরা রাজ্যদা ঐখোয়না উবা ফংঙি, ত্রিপুরাগী ‘স্টেট ল্যাঙ্গুয়েজ’ বাংলানি। অদুবু রাজ্যগী মরূ ওইবা অতোপ্পা লোন মঙা ককবরক, মণিপুরি, চাকমা, বিষ্ণুপ্রিয়া মণিপুরি অমসুং হালাম-কুকি লোনবু রাজ্য সরকারনা শক খঙবীরে অমসুং লোনশিংসিগী চাওখৎ খোঙথাং কয়াদং লৌখৎপিনবা সরকারনা তোঙানবা লোনগী ‘ডাইরেক্টরেট’ অমা শেম্বীরে। সরকারনা শীনবা ‘বুক ফেয়ার’দা হায়রিবা লোনশিংসিগী তোঙান তোঙানবা ‘বুক স্টল’ শাদুনা পী, মখোয়শিংদুবু সরকারগী ওইবা লোনগী থৌরম খুদিংদা শরূক য়াহল্লি, চহীগী লোনশিংদুগী চাওখৎপগীদমক থবক তৌরিবা মীওইশিংদুবু ‘ভাষা-সম্মান’ পীদুনা ইকাইখুম্নবা উৎলি। অদুবু বাংলাদেশতদি অসিগুম্বা থৌরাং অমত্তা ঐখোয়গী সরকারগী লৈতে।

   মহৈশঙদা তম্বগী খুদোংচাবা লৈত্রবা বাংলাদেশতা মণিপুরি লোন ইমুঙ-মনুংদতা ঙাঙনবগী লোন ওইনা লৈবনা মপালগী শাফূনা হেনজিল্লক্তুনা লোন অসি নোংমা নোংমগী’সুম শিথরকখি। অদুগুম্বা তাঞ্জামদা বাংলাদেশকী মণিপুরিশিং মিকপ থোরকখি। বাংলাদেশকী নীংতম লানগী অকনবা শাফূদগী অমসুং বাংলাগী মমালোনগীদমক্তা থঢ়ায় কত্থোকখিবগী ময়েক লারবা নুমিৎ ‘কুনমাথোই ফেব্রুয়ারি’দগী ইনোৎ ফংদুনা মিকপ থোকখিবা মণিপুরিশিং মমালোন মণিপুরি য়োকপা, হিংহনবা অমসুং চাওখৎহনবগী মিৎয়েংদগী খ্রিস্টকুম ১৯৭৫গী ১১ মে’দা ‘বাংলাদেশ মণিপুরী সাহিত্য সংসদ’ হায়বা সংস্থান অমা লিঙ্খৎখি অমসুং চহীদুগী ডিসেম্বরগী তাং ১৬তা বাংলাগী লানঙম নুমিৎকা মরী লৈননা ফোঙখি সংসদ অসিগী সাহিত্য চেফোঙ ‘দীপান্বিতা’। মসিনা বাংলাদেশতা ফোঙবা মণিপুরি সাহিত্যগী অহানবা চেফোঙনি। মদুগী মমাঙদা বাংলাদেশকী বিশগাঁও লমদমগী থোংখাতাবম নবকিশোর শর্মাদি খরা খরা শৈরেং ইরম্মি অমসুং ১৯৩৪ খ্রিস্টকুম অদুঢ়াইদগী হৌরগা মণিপুরগী ললিতমঞ্জরিনচিংবা চেফোঙ কয়াদা শৈরেং কয়া ফোঙলম্মি হায়বগী পাউ ঐখোয়না খঙবা ঙমখি। দীপান্বিতা চেফোঙগী তুং ইন্দুনা অতৈসু চেফোঙ কয়াদং ফোঙনরকখি; লিঙ্খৎনরকখি অনৌ-অনৌবা সংস্থান কয়াদং। মদুনা মরম ওইদুনা বাংলাদেশতা মণিপুরি সাহিত্যগী য়ুম্ফম অমদি লিঙ্খৎলে-মণিপুরি লোন শিথরকপগী চাং খরমখৈদি ঙাকপা ঙম্লে হায়বা য়ারে। অদুমক্তদা মণিপুরি লোনগীদমক্তা লাংতকèবা কোক্লে হায়বদি য়াদ্রি। মরমদি নৌনা হৌরক্লিবা অঙাংশিংগী মনুঙদা মণিপুরি লোন ঙাঙবা-ইবা অমদি পাবা ঙম্বগী চাংদি থোইনা হেঙ্গৎত্রি, নোংমা নোংমগী অহোইনদুম মশীং তারক্লি। অদুনা মহৈরোয়শিংগী মনুঙদা মণিপুরি লোন পাবা অমসুং ইবা ঙম্বগী চাং হেঙ্গৎহন্নবা হৌখিবা খ্রিস্টকুম ২০০৮তগী হৌদুনা বাংলাদেশ মণিপুরী সাহিত্য সংসদনা মহৈরোয়শিংগীদমক ওইবা থৌরম ‘মণিপুরি ল্যাঙ্গুয়েজ ফেস্টিভেল’ চাং নাইনা পাংথোরক্লি। থৌরমসিগী মখা পোন্না মণিপুরি লোন্না ইবা ‘মণিপুরী নাচোম’ কৌবা লাইরিক মচা’মা ফোঙলগা হাইস্কুলগী থাক্তা তম্লিবা মহৈরোয়শিংদা য়েন্থোক্লগা মদুগী মথক্তা পরীক্ষা লৌই অমসুং পরীক্ষাদা মায় পাকপা মহৈরোয়শিংবু মনা-মথুম পীদুনা থৌগৎপি। লাইরিকসিদা মৈতৈ ময়েকসু হাপ্পি অমসুং মৈতৈ ময়েককী মথক্তসু পরীক্ষা লৌই। মসিনা মরম ওইদুনা বাংলাদেশকী মণিপুরী মহৈরোয়শিংগী মনুঙদা মণিপুরী লোন পাবা অমসুং ইবা খরা খরদি ঙম্নরক্লে। মদুগা লোয়ননা মৈতৈ ময়েক্কসু শক খঙনরে-অয়াম্বনা মৈতৈ ময়েক পাবা অমসুং ইবা ঙম্নরক্লে। মসি য়াম্না হরাউনিঙাইনি। মতাঙসিদা পনবা য়াই ‘মণিপুরী ভাষা গবেষণা ও উন্নয়ন সংস্থা’ কৌবা সংস্থান অমনা মৈতৈ ময়েককী তম্ন লাইরিক ফোঙদুনা তোঙান তোঙানবা মফমদা স্কুল হাংদুনা অঙাংশিংদা মৈতৈ ময়েক তম্বীবগী থবক চত্থরি। ‘একডো’ কৌবা এনজিও অমনসু অদুগুম্বা স্কুল খরা হাংদুনা মৈতৈ ময়েক তম্বীরি। মসিগী থৌরমসি ঐখোয়না চাং নাইনা চত্থবা ঙম্লবদি বাংলাদেশতা ঐখোয়না লোনগী মতাঙদা মায়োকèরিবা অঢ়াবা খরা মখৈদি কোকপা য়াগদ্রা খল্লি। মরকসিদা পনবা য়াবা অমনা, স্কুলগী থাক্তা মমালোননা লাইরিক তম্বগী খুদোং চাবা পিবিয়ু হায়না ঐখোয়না দাবি তৌরক্লিবসি কুইরবনি। মসি মশা মশাগী মমালোন লৈজবা ফুরূপ মচা খুদিংগী মহৈরোয়শিং খুদিংমক্কীনি। ঐখায়গী কন্না তকশিনবগী মহৈ ওইনা সরকারনসু হৌখিবা ২০১৬-১৭ খ্রিষ্টাব্দদগী লোন মঙাখক খনগৎলগা লোনশিংদু ঙাঙবা মহৈরোয়শিংবু প্রাইমারি থাক্তা মশা মশাগী মমালোননা লাইরিক তম্বা য়াবগী থৌরাং লৌখৎলে। মসিদা মণিপুরি লোন য়াওদে। অহানবা খনগৎপা লোন মঙাদুদি চাকমা, মারমা, ত্রিপুরা (ককবরক). গারো অমসুং সাদরিনি। তৌবগীদি মথংগী লোন খনগৎলকপদদি মণিপুরি লোনসু য়াওরনি হায়বগী থাজবমদি সরকারগা মরী লৈনবা কাঙবুনা পীবিরে। অদুদসু চিংনবা অমা-নুংনাংনবা অমদি ’সুম লৈরি। মরমদি, বাংলাদেশসিদা ‘বিষ্ণুপ্রিয়া’ কৌবা কাঙলুপ’সিনা মতম’পুম্বদা ইয়েৎতা য়েৎশিন্দুনা লৈরি। মখোয়না মখোয়গী মমালোন ‘বিষ্ণুপ্রিয়া’ লোনসিবুসু মণিপুরি লোননি হায়না মতম মতমদা দাবি তৌশিল্লি। মদুদা থাজবা-মখোয়না হোৎনবা কনবদগী লান্না লৌশিনবা মীওই কয়াদংসু সরকারগী ফম্নাইবশিংদা য়াওরি। অতোপ্পা মরম অমনা, বাংলাদেশতা মণিপুরি লোন ঙাঙবা মীশীং য়াম্না লীকই। চাউরাকনা লিশিং কুনমঙারোম ওইগনি। বিষ্ণুপ্রিয়াগী মশীংনা খরা হেনবগুম তৌই। মসিগী খুদোংচাবসি লৌদুনা রাজনীতি শান্নবা কাঙবু’মসু য়াওরি। মসি পুম্নমকসিনা মরম ওইদুনা ঐখোয়গী খরা পাখৎনিঙাই ওইবা মরমদি ’সুম লৈরিবনি। অদুনা ঐখোয় মণিপুরি ময়াম খরা চেকশিন্না থঢ়ায় য়াওনা হোৎনবা তাই। অনীশুবা তাঙ্কক্তা লোন খনগৎলকপসিদা মণিপুরি লোনসু তঙাইফদনা চনশিনহৌনবা হোৎনবা অমসুং অশেংবা মণিপুরি লোন মশাগী ময়েক্তা ইবদু ওইহনলৌনবা ময়াম চঙনা হোৎনবা তাই। মসি হৌজিক্কী মতমগী য়াম্না মরূ ওইরবা থৌরাং’মা ওইগদবনি অমসুং মায়কৈসিদা মণিপুরী খুদিংমকনা য়াম্না থৱায় য়াওনা চঙশিল্লকপা অমসুং অঙম্বা তেংবাং মতেং পিনরকপা হায়বসি তঙাইফদনা মথৌ তারবনি। নত্রবদি অশোয়বা অমসুং অরানবা থৌশিলনা মহৈ য়ানখিদুনা বিষ্ণুপ্রিয়া লোনবু মণিপুরি লোননি হায়না লাইরিক তম্বগী থৌরাং সরকারনা লৌখৎলকপা তারবদি ঐখোয় মণিপুরিশিং অমুক মণিপুরিনি হায়না শকতাকপা ঙম্বগী ফিবমদা লৈররোয়। মায়কৈসিদা ঢ়াখল লৈবা মণিপুরি খুদিংমকনা অঙম্বা তেংবাং পীবা অমসুং থৌদাং য়াবা ঐখোয়না আশা থম্লি।

অরোয়বা ওইনা ঐনা হায়জনিংবদি, মণিপুরি লোনসি ঐখোয়গীদি ইমালোননি। ইমালোনসি হিংহনবা, য়োকপা অমসুং শৌগৎপসি মণিপুরি মচা অমা ওইনা ঐখোয় খুদিংগী দায়িত্বনি। অদুনা ইমালোন ঙাঙসি-অঙাংশিংবু ইমালোন ঙাঙহনসি, ইমালোননা অঙাংশিংগী মিং থোনসি। ইমালোন হায়বদি মণিপুরি লোনসে ঐখোয় মণিপুরি খুদিংমকনা ঙাক্কদবনি, য়োক্কদবনি, শন্দোক্কদবনি। মদু নত্রবদি জাতি অমা ওইনা লমদম’সিদা য়াম্না মশীং লীক্লবা মণিপুরি ঐখোয় হিংবা ঙম্মোয়।

নৈনখিবা লাইরিকঃ

  1. Manipuri Sahitya Parishad; Glimpses of Manipuri Language, Literature and Culture; Imphal, 1970.
  2. Padmasree E. Nilkanta Singh; Aspects of Indian Culture; Imphal, 1982.
  3. Prof. Jyotirmoy Roy; History of Manipur; Imphal, 1973 (2nd Ed.).

COMMENTS

WORDPRESS: 1
DISQUS: