অলিম্পিয়ান শুশিলা হরাও তরাম্না ওকখ্রে

Homeস্ক্রলবার

অলিম্পিয়ান শুশিলা হরাও তরাম্না ওকখ্রে

ইম্ফাল, আগস্ট ১৮ : টোকিও অলিম্পিক্সতা ইন্দিয়াগী অমত্তা ঙাইরবা জুদোকা ওইনা শরুক য়াখিবী লীকমাবম শুশিলা চনু ঙসি নুংথিল ইম্ফাল ইন্টারনেশনেল এয়ারপোর্ট য়ৌরক

ইম্ফাল, আগস্ট ১৮ : টোকিও অলিম্পিক্সতা ইন্দিয়াগী অমত্তা ঙাইরবা জুদোকা ওইনা শরুক য়াখিবী লীকমাবম শুশিলা চনু ঙসি নুংথিল ইম্ফাল ইন্টারনেশনেল এয়ারপোর্ট য়ৌরকপদা মহাক্কী ইমুং-মনুং, লৈকায়গী মীয়াম অমসুং শান্নববু পামজবা কয়ানা লৈ পরেং হুক্তুনা হরাও-তরাম্না ওকখি। থৌরম অদুদা শরুক য়াখিবা চীফ মিনিষ্টার এন বীরেন সিংহনা হায়, শুশিলানা হন্দক্কী অলিম্পিক্সতা মেডেল লৌরক্ত্রবসু মথংগী অলিম্পিক্সতা মেডেল শোয়দনা লৌবা ঙম্নবা মহাকপু পূক্নিং থৌগৎপগা লোয়ননা মণিপুর পুলিশ দিপার্টমেন্টতা ইন্সপেক্টর (হান্নদি সাব-ইন্সপেক্টর) দা প্রমোশন পীরগনি।
চীফ মিনিষ্টারনা হায়খি, গভর্ণমেন্ত অসিনা স্পোর্টসতা হেন্না পূক্নিং চঙলিবগী মরমদি খুন্নাই অসি অফবা অমা ওইনবগীনি। লমচৎ-শাজৎ ফজবা, অহল-লমদ মশক খঙবা, ওজা, লাই-গুরু মশক খঙবা খুন্নাই অদুবু অফবা খুন্নাই কৌনরি। অদুগুম্বা মচৎ অদু শান্নরোয়শিংদা লৈ। মরম অদুনা স্পোর্টসতা হেন্না মীৎয়েং চঙলিবনি। মণিপুরনা স্পোর্টসতা ইন্দিয়াগী পৱার হাউস ওইবনা লৈবাক অসিগী মী অমনা গোল্ড মেডেল লৌরকপদা মণিপুরনা থাগৎফম থোকই।
চীং-তম অনীমক্তা হোকিগী ফিল্ড, ফুটবোলগী ফিল্ডনচিংবা শান্নবুং কয়া শেমগৎলগনি। স্পোর্টসকী ফিল্ডদা করম করম্বা এরিয়াদা মণিপুরীশিংনা মাঙজিন থাবা য়াগদগে হায়বদু অখঙ-অহৈশিংনা য়েংশিল্লি।
গভর্ণমেন্তনা অলিম্পিয়ানশিংগী পোস্ট শেমদুনা থম্লে। মীয়াম্নসু স্পোর্টসকী লমদা হেন্না পূক্নিং থৌগৎমিন্নসি। অলিম্পিয়ান হেন্না পুথোক্নবা পূন্না হোৎনমিন্নিসি হায়না চীফ মিনিষ্টারনা মীয়ামদা আপিল তৌখি।
শুশিলানা হায়, লাক্কদবা অলিম্পিক্সতা মেডেল অমা লৌবা ঙম্নবা মখা তানা হোৎনখিগনি। হন্দক্কী অলিম্পিক্স অসিদা মেডেল লৌবা ঙম্লক্ত্রবসু মহাক্না শান্নবা চৎলমদদাইদা মতেঙ পাংবীখিবা অমসুং ‍ঙসি মহাকপু তরাম্না ওকপীদুনা পূক্নিং থৌগৎপীরিবা অসিনা মহাক্না মখা তানা হোৎননিংবগী পাঙ্গল থৌনা ওইরগনি।
‘মণিপুরদগী মেডেল হেন্না লৌবা ঙম্লক্কগদবা অলিম্পিয়ানশিং হেন্না পুথোকপা ঙম্বা ওইরসনু’ হায়না জুডোকা শুশিলানা ফোঙদোকখি। থৌরম অদুদা হান্নগী মিনিষ্টার ডব্লিউ যাগোর, ডিরেক্টর (য়াস) টি ফুলেন, ডিরেক্টর (তুরিজম) ডব্লিউ ইবোহল, মাইনর ইরিগেসন দিপার্টমেন্তকী এস ই ব্রজেন্দ্র অমসুং জুদোগী কোচ দেবেন মোইরাংথেমসু শরুক য়াখি।
সোর্স: পোক্নফম

COMMENTS

WORDPRESS: 0
DISQUS: