অরিবম রেসমাগী শৈরেং

Homeআর্টসশৈরেং

অরিবম রেসমাগী শৈরেং

মতম শিদা লাইরবী লুখ্রাবী চারা নাম্মনা হকচাংহী চৈঙাক ওই মুশি মুশি ঙাল্লিবা থাউমৈনা অমম্বগী মঙাল ওই লেঞ্জরকপা পুন্সি ঙসিদি কোক্লে ঙসিদি কোক্লে অম

মতম শিদা লাইরবী লুখ্রাবী

চারা নাম্মনা হকচাংহী চৈঙাক ওই
মুশি মুশি ঙাল্লিবা থাউমৈনা অমম্বগী মঙাল ওই
লেঞ্জরকপা পুন্সি
ঙসিদি কোক্লে ঙসিদি কোক্লে
অমুক্তা চাখিদ্রিবা চাকলুক
অমুক্তা শেৎখিদ্রিবা ফিজেৎ
শানা লুপানা লৈতেং ওই
হরাও খুথেক তম
নোকচরে মখোল থোক্‌না
কাংবান্নরবা অতিয়া, নামীবা নুংশিৎ য়ৈরে মাইথোংদা
থওয়াইগী মবুংঙো মহাক্‌না শানাগী লিকফাং শিবিরে
হিকথরবা শমলাং খোমগৎপিরে
নুংশাগী মঙালদা নোংজুগী ইরিক খিকপীদুনা চুমথাংগী ফজবা য়েংজরে
কুমওন কয়া উখিদ্রবা শক্তম য়েংজরে চেপথ চেপথ…
কদোমদগীনো খংহৌদনা অথাপ্পদা তারকই খোঞ্জেল
থুগাইরো থুগাইরো পোৎচৈশিংদো
পাংথোক্লকই খংপাং খোঞ্জেলদুনা মঙলানগী তাইবংদা তাওরুবদা
উইশিল্লুরবা মীৎ
উরকই চৈ পাইবা খাগী মচুগী ফিজোল শেৎ
পোৎচৈ থুগাই থুগাইদুনা লাক্লিবদো
নিংশিংলকই চারা হেন্দুনা লৈহৌরিবা ইচাশিং
উরকই কনাসু লৈবিবা তাক্ত্রবা মাংদা থমলিবা খ্ইুরবা য়েঞ্ছাং নাপী
তারকই থিংবা ঙমহৌদ্রবা পীরাং পাংলকই য়ুম মাইকৈ উপাই লৈত্রবদা
খল্লকই ওয়াখলদা হে নোংদম্বা নহাক্‌না ইচাশিংবু অরাম খৌরাংবা
কোকহনবীরবদি ঙসিমতং।

 

অওনবা উরকপদা উচেক্কী ৱাখল

খুঙ্গংগী লম্বী শোরোক্‌নি খল
পাইরুই নেমতক নেমতক।
ওইরম্মী শহরগী শোরোক
মী লৈতবা য়ুমগী শাইজিন শায়ানি খল
তোংলুই অদুবু ওইরম্মী কৈথেল।

কনাসু উদে চেং খরদি তারম্মী
হরাওনা চাজখি ঐগীদমক থারকলিবোই নিংই।
অদুবু ওইরমখি লম্বীদা দিসইনফেকটেন্ট চাইরম্বা চারুবগী
লমহাংদা অঙাংনা শান্নবা উরগা
য়েংজরম্বনি উশা ৱাশাদা তোং
অদুবু উখিদ্রে লোইনা শিখ্রবরা খল্লই
ওইরমখি য়ুম মনুংদা লৈনখিবা।
ৱাখল লমাংনরবা তাইওন্নরবা মতৌশিংশে উবদা
ৱাখল চোইরোই খল্লুই
অদুবু ওইরম্মী পুম্নমক কোরোনা ভাইরসনা অওনবা পুরকপা।

 

মতম ঈচেলদা জাতিসিগী অহোংবা

তারিব্রা য়াম শুবগী মখোল ইদ নোংমা ওয়াৎলিঙৈ
ঈুনরিবা নিংঙোলশিংনা মপামদা ইদ কী থাউদল
উরিব্রা থাউশুফাবী, খ্বাংনম নম্বী পাঙ্গল নিঙোল
মতমগী ঈচেলদা অহোংবা নংনা
হোংহনবিখ্রে জাতিশিংগী লন কয়া
শাগোন্নদুনা লৈরকপা পারি-পুরিগী ইতিহাসকি মচাক
বাবা মীংগৌদগী দেদি, পাপা
ইমা মিংগৌদগী মম্মী, মমা
ইচৌ মীংগৌদগী দাদা, ভয়া
মতমগী ঈচেলদা ঙমম্নমক হোংখ্রে
ইনম্মা, ইতৈমা মীংগৌদগী ভাবি
ইচে মীংগৌদগী দিদি
ও নুংশিইনদা পলেমগী পাম্মু মীংগৌ ‘নাহাৎ!
হাউবনিদা পলেমগী য়োৎশবিগী চরুনা থোংবা চাক
নুঙাইবনিদা অঈং অশা চানরবা ঈ না কুপ্পা শঙ্গাই
কাউঙমদেদো শারবা কালেনগী নুংশাদা পেন্নফম,
লৈবাক্কী খরুংগী অঈংবা লাইজা ঈশিং।

COMMENTS

WORDPRESS: 3
DISQUS: