অদুম লৈহৌগদৌরিবা কনানো খঙলব্রা –  নবকুমার ওইনা

Homeস্ক্রলবার

অদুম লৈহৌগদৌরিবা কনানো খঙলব্রা – নবকুমার ওইনা

ৱা ঙাঙনবা, ৱা খন্নবা য়াবগী থাক য়ৌদ্রবদি করি ৱা ঙাঙনগনি। হান্ননা থাজবা অরানবদু হোংদোকপা ঙমদ্রবদি নুংশিবা হৈবসু ৱাগদৌরিবনি। ঙকপা নৎত্রগা হরাওফম খঙদবা

ৱা ঙাঙনবা, ৱা খন্নবা য়াবগী থাক য়ৌদ্রবদি করি ৱা ঙাঙনগনি। হান্ননা থাজবা অরানবদু হোংদোকপা ঙমদ্রবদি নুংশিবা হৈবসু ৱাগদৌরিবনি। ঙকপা নৎত্রগা হরাওফম খঙদবা ৱা অমদি ৱারেং-শৈরেং ইবদা পুন্সি কত্থোক্লবশিংনা কদায় ফাওবা খুন্নাইসি মমায় চুম্লিবগে হংলকপদা পীননবা পাউখুম ইবদা য়াওরক্লব্রা হায়বসিনি। ওন্ন-তৈননা লান্না ইশিনবগী ৱাথোক ওইনা থোক্নরি, অঙকপনি। নুংশিবগী ৱাবু নুংশিনবা ঙম্নবা ফোঙদোকপা য়াওনরব্রা। নুংশিনববু নুংশিনৌ হায়রগা য়াবা নত্তে। লাই পঙনীং নীংবশিংনা মী নুংশিবা ঙমদবসি লাইনীং অদুনা ওইদবসু য়াই, লাইনীংদু মীংচৎ থীহনবা য়াওরকপদগী লাইনীংদু ওইনা মরায় চায়থবা মশানা তারকই। লাইনীংনা মী নুংশিনহনবা ঙমদ্রে, য়াথং ওইনা নুংশিনৌ হায়রগা, হাৎনরক্লিবনি।

 

মালেমগী লৈমায়দা মীওইবসি হোংবা য়াবা কয়ারক অহোংবা ৱাখল্লোনগা লোয়ননা লাকখ্রবনি। মালেমগী অঈং-অশা শাথেংনবদা হকচাংগী শক্তম ফাওবা হোংলকখ্রবনি। চিঞ্জাক্কী লান্দা শা-ঙা, মী কাঙলূপ কয়াগী মরক্তা শা-লান মশীং খঙদনা থোকখ্রবনি, হাৎনখ্রবনি। পুৱারী শেমদ্রিঙৈদা মীরোল কয়ারক শিখ্রবনি। তুং কোয়না লৈহৌগদবা কনা কনানো ঙসি ফাওবদা ময়েক শেংনা খঙলবা নৎত্রি। হীরম অসিদা পাক শন্না খন্নবদি চহী চাম্মরোমগী মমাঙদগী মপূং ফানা খন্নবা হৌখ্রবনি। ৱাখল্লোন অদুমক্না মীওইবগী মপোক অসিমক মশক থোক্না ফজহনবা হেনগৎকনি হায়বসু থাজনখ্রবনি।

চহী চাম্মগী মনুংদা শিবা নাইবা মীওইবা মরক্তা অদুমক লৈহৌগদবা হায়বসি কনা ওইগদৌরি। মী অমগী থৱায় লৈবগুম মীয়াম অসিগী থৱায় অমা লৈব্রা হায়বা ফাওবা হংনখ্রবনি। ৱাখল খনবগী মওং অমনা মী হায়বসি হোংহনবা ঙম্মী হায়না থাজনৈ৷ ৱাখল খল্লু য়াদবগী লায়ওং অমসু লৈরিবনি। মালেমগী থাক্তা লাম্বা ফংদ্রবসু লমদম অসিগী য়েংবদসু পিক্তক্না উবা ফংগনি খল্লগা য়েংবা তারকই। লমদমসিগী মীয়ামসু ৱাখল খঞ্জনবগী মওং কয়ারক হোংলকখ্রবনি। মহৌশাগী, লৈঙাক্কী অমসুং সাইন্সকী চৈথেং ময়ামসিনা খুন্নাই শাগৎপগী, খুন্থোক্লোনগী ৱাখল্লোনশিংদু পুমহোং হোংহনখ্রবনি। মচেৎ ওইনা হীরম অমা-অনীদা য়েংবা নত্তনা মপূম ওইনা য়েংবা ঙম্বগী লৌশিংসু ৱাৎলিবা ওইগদৌরি খঙনরবনি। হীরম অসিদা মায়পুননা হোৎনবা মীদি ইয়াম য়ামদ্রি হায়না উরবসু থৈরগা পুনবা মীদি মরাং কায়না লৈরে হায়বসু য়ারি। খরা খরদগী চনৈনরিবা নাট ওইনা উহল্লক্লবনি, চয়েৎনরে হায়না উনরবনি। মসি ফাওবদা তুং কোয়না লৈহৌগনি খনবা মানবা কাঙলুপ শাগৎপা লেপ্নদ্রিবনি। হংনরক্লিবা ৱাহংনা মদুনা য়ারদ্রা হায়বসিনি। মসিখক খঙননবা হোৎনবদা চঙগদৌরিবা লৌশিং লৈনরবরা হায়বসু খঙবা অমা চঙলি। থাজবা অমনা পংহোৎ হোনরগা হেক্তা য়ারগনি খনবদি মিথোলোজিগী মনুংদা লৈরিবসু ওইবা য়ারিবনি। চহী চাসিদা মতমগী চপ চাবা মী ওইরক্লিবা করি থৌদাং লৌনবা তারি। কাঙলূপকী থাক্তা থৱায় য়াওরিবা খুদিংনা কাঙলূপ অমখক্তনা কয়া কুইনা লেপ্পা ঙমগদৌরি হায়বা খঙবা অমসু চঙলি। থাজবা অমনা হেক্তা য়ারগনি হায়বসু ৱাফম থোক্তে, লৈমিন্নদবা য়াদ্রবা কাঙলুপশিং পূন্না ৱারেপ অমা লৌবা ঙম্বগী তঙাইফদবা লাক্লবনি। কাঙলূপ চাওথোক্নবা হোৎনবখক্না তুং কোয়না হিংবা ঙম্লবগী লম্বী ওইনা লৌরবসু অচুম্বা ওইরক্লরোই। তিন্নবা হায়বসিদা শক খঙনবখক্তনা য়ারোই, নুংশিনবা হায়বা অদুমা শোয়দনা চঙগনি, তিন্নবদু নুংশিনবা নৎত্রি।

ইনৌ নৌনা নুংশিনবা হায়বসি করি ওইগদৌরি। মসি খঙদবা মীয়াম্না করম্না নুংশিনগনি, নুংশিনদনা করম তৌনা পুনবা য়াগদৌরি, লুরিবসি মসিৱায়দনি। লাইদা নুংশিবা ঙম্লব্রা, পংথা থাজবনা হেল্লি। ইপা-ইপুনি হায়রগা করিগীনো নুংশিবা ঙমদ্রিবা? লাই ৱায়বদগী থোক্লকপা ৱাখল খুৎখন অমনি। লমদম খরদদি লাইদু শিখ্রে হায়না ৱা খন্নবা হৌবসু লৈরবনি। মসিগী মরম লৈগনি, লাইনীংবা তোক্লবা লমদমসু লৈরবনি। লাইদু চুম্মী-লাল্লিগী ৱাফম নত্তে, ৱাখলদু নীংতম্না খনবা হৌনবা লম্বী শেম্বনি। হৌজিক লৈরিবা নাৎ অমসুং লৈবাক মচা তাবগী থাক ৱাংলে, থৱায় য়াওনা হোৎনরে হায়রবসু উবদি ঙমদবা অচুম্বা পাম্বা, থৱায় মিরেলবু খঙবা পাম্বগী ইখৌ লাংবা, শাজৎতু চুম্না চৎলগা অফবা পুন্সি অমা তুং কোয়না লৈহৌনবা কত্থোকপগা লোয়ননা লান্থেংনরিবা মী কয়া তঙাইফদনা চঙলকই। মদুমক লৈবদি তুংগী পুন্সিদা য়াইফরগনি হায়বা লৈরে হায়বা য়ারোইদৌরি। ৱাখল লৌশিংদু লৈখায় তাদনা হেক্তা পামজবনি, ইপা-ইপু হাক্তক্তগী শাগৈগী পিবা নৎত্রগা নিংথৌ অমগী মচানা নিংথৌ ওইবগী চৎনবী মুত্থৎখ্রবনি। শিখাং খাংবা খরনা মালেমগী খোঙজেলদা খুরৌ থাংলগা লৈবসু য়াওরিবনি। থায়নগী ৱাখলদা শাহিং চাবা শা-কৈগী শাজৎ চৎলগা নুংঙাইবা লৌজবা মীওইশিংসু ঙসি ফাওবা হিংহৌরিবনি। খরা অমনদি মীওইবদি শিথরক্লে, ৱাখলসু থবকসু মেছিন্না, কম্পিউটারনা, রোবোটনা মহুৎ শিনজিল্লক্লে হায়রবনি। মেছিনশিং অসিনা মীওইবগীদি মতেং পাংলে অদুবু শেন্দোং তান্নবা মীওই খরনা মী লল্লোল্লিব্রা হংলিবনি। মদুগী মথক্তা মেছিন্না মীওইববু নুংশিবা ঙমগদ্রা হায়বগী ৱাদুনি। মেছিন্না মীওইববুদি লাক্নরে, নোংমৈ, টেঙ্ক, বোম, মিসাইল ময়ামসি মীনা হাৎনবা শারিবনি। করিগীনো হাৎনরিবদি, মী মরক্তা নুংশিনবা লৈতবগীনি হায়গনি।।

মী অয়াম্বনা লাইনীং অমা নৎত্রগা অমদা থাজরবসু নুংশিবদি মপূং ফানা খঙদ্রি, লাইনীং মান্নদবশিং নুংশিনবা ঙমদ্রি হায়ববু য়ারি। চীন্দা, ৱারীদা নুংশিনরি হায়বা খরনা য়ারবা নৎত্রি। নুংশিনগদৌবনি, পুনগদৌবনি হায়বা অসিদি য়াহৌ থেংহৌরবা মীশিংগী ৱাহৈনি। মদুনা থবক হৌরবনি খনবসু লানগদৌরিবনি, খঙদনা পঙহায় হায়বা নৎত্রগা মীগী খুদুং ইল্লগা হায়রিব্রা, মী খরনা তৌশিল্লগসু হায়বা ওইবা য়ারিবনি। মীতিক মীরৌ খঙবশিংনা অদুমক খঙবা ৱানি; মখোয়গী ৱাঙাঙ, মখোয়গী শাজৎ, মখোয়গী লূপ, মখোয়গী থবকশিংনা অদুমক তাকচরিবা ৱাফমনি। চিন্দা হায়বদু লোইনমক থাজৌ হায়বসি হায়বা য়াদবা ৱানি, ৱা ঙাঙথোক্ত্রবসু খঙনরবা মতমনি। ৱা ঙাঙনবা, ৱা খন্নবা য়াবগী থাক য়ৌদ্রবদি করি ৱা ঙাঙনগনি। হান্ননা থাজবা অরানবদু হোংদোকপা ঙমদ্রবদি নুংশিবা হৈবসু ৱাগদৌরিবনি। ঙকপা নৎত্রগা হরাওফম খঙদবা ৱা অমদি ৱারেং-শৈরেং ইবদা পুন্সি কত্থোক্লবশিংনা কদায় ফাওবা খুন্নাইসি মমায় চুম্লিবগে হংলকপদা পীননবা পাউখুম ইবদা য়াওরক্লব্রা হায়বসিনি। ওন্ন-তৈননা লান্না ইশিনবগী ৱাথোক ওইনা থোক্নরি, অঙকপনি। নুংশিবগী ৱাবু নুংশিনবা ঙম্নবা ফোঙদোকপা য়াওনরব্রা। নুংশিনববু নুংশিনৌ হায়রগা য়াবা নত্তে। লাই পঙনীং নীংবশিংনা মী নুংশিবা ঙমদবসি লাইনীং অদুনা ওইদবসু য়াই, লাইনীংদু মীংচৎ থীহনবা য়াওরকপদগী লাইনীংদু ওইনা মরায় চায়থবা মশানা তারকই। লাইনীংনা মী নুংশিনহনবা ঙমদ্রে, য়াথং ওইনা নুংশিনৌ হায়রগা, হাৎনরক্লিবনি। লাইনীং চৎপশিংনসু লাইগী য়াথং লোইনা ইনবা ঙমদে হায়বা মশানা খঙজবা ৱানি। মী অমা অনীগী ৱাফম নত্তে, হৌজিকপু নুংশিনৈ হায়বা কদায়দা লৈবগে, পামজবা, চান্নবা, তিন্নবদি ময়াম অমা মফম খুদিংদা উগনি। তৌশিন্নবসু মফম অয়াম্বদা লৈবা উনরমগনি হায়বা য়ারবা মতম অমনি। নুংশিনবদা কারল তাবা য়াবা, নুংশিনবদা তৌশিন্নবা য়াবা নত্তে, লাইনীং চৎপদা তৌশিন্নবা য়াবা নত্তে (লাই ৱায়বসি তৌশিন্নবা মালহল্লি)। লৈবাক নুংশিবদা তৌশিন্নবা য়াওরক্লবা, নুংশিনবদা তাৎ তৌবা য়াওরক্লবা খুন্নাইদু ওইনা মুত্থরক্লগনি হায়বা খঙলদৌবনি।

নুংশিবা নৎত্রগা নুংশিবা হায়বসিদা অশেংবা, অচুম্বা হায়বদু কয়া য়াম্না য়াওরবগে? নুংশিনদ্রবদি হিংবদি ঙম্লোই। নুংশিবা হৈতবা, নুংশিবা ঙমদবা, নুংশিবা খঙদবশিংদি হিংবা ঙম্লরোই। জাৎ ওইনা, লূপ ওইনদি নুংশিনবা মানবা খরনা হিংলগদৌবনি খঞ্জবগী ৱাতনি, হিংবদি ৱাগদৌরিবনি। হোৎনরিবা ময়ামসি মদু খঙনা চত্থবসু মান্দে, মুন্নবা মানবা থৌওং অমনা মাগী-মাগী লাল্লোং অদুদি ফোংনা উনরিবনি। পংখন খন্দুনা শান্নবা নত্তে, অশেংবা মিৎয়েংদু থিরিবনি, মসি খঙনদবদা হিংবা ঙম্লোইদৌরিবনি। নুংশিনদ্রবদি পূনবা য়ারোইদৌরি, পূনবা য়াদনবা শিনবদি ইরায় লায়, হেক্তা চোংশিল্লগা য়াওশিল্লগা ঐনা হায়রিবসি নৎত্রবদি য়াদে হায়না শিখাং খাংজিল্লগা ঐগী অপাম্বদা পুরগা লোইরে। তুং কোয়না লৈহৌগদৌরিবা মালেম অদুদা লমদম অসিগী মীয়াম্না করম্বা মওংদা য়াওহৌবা তারি। নোক্নবদু নত্তে, তুকৎচনবদুনা য়ারোই, হন্থনা য়েংনবদুনা কান্নরোই, কত্থোকপা য়াওদ্রবদি নুংশিনবা কৌবা য়াদে। খুন্নাইসি ঐগী নত্তে, ঐসে খুন্নাইগীনি, কত্থোক্কদৌবনি; কাঙলুপ্তু ঐগী নত্তে, ঐসে কাঙলুপ্তুগীনি। ঐগী কাঙলূপ হায়না ৱাখল খনবদু হৌবদগী লানবা হৌরে। লৈকোল অমদা লৈ অমখক্তা থাগে হায়বনি, ফজবা খঙদবা হায়বনি। ফজবদু কন্সত্রক্টিভ ওইগদৌবনি, নুংশিবা হায়বসু কন্সত্রক্টিভ হায়বনি। অপাম্বা লৌনীংবা, কল্লকপা, লাকথুবা, নৈহৎপা, হাত্তোকপা ঙম্বগী ৱাখল য়াওগদৌবা নত্তে। য়াওরবদি নুংশিবা নত্তে, মদুগী মথক্তা কত্থোকপগী ৱাখল্লোন য়াওগদৌবনি। ঐনা শারিবা উপুদুদা ঐ য়াওগদৌ নত্তে, ঐনা শারিবা মীতমদু ঐ মান্নবা (লোইনমক) শাবা নুংশিবা নত্তে। মশানা মশা খঙবা ঙম্না লমদম অসিদা নুংশিবা হায়বদু লৈরিব্রা? নুংশিনরবা মীয়ামদুগী থৱায় হাপ্পা ঙম্লব্রা? হৌজিক ফাওবদি থেংনদ্রিবা ওইগনি। | পামজবদি লৈরে, ঙাঙলিবসিদি থবক য়াওনদ্রিবনি হায়রিবনি। মী কিদবা মানবদু লৈবাক নুংশিবা নত্তে। ইরোয় অশিবা মনুংদা লংজানা খোঙবনি।

কর্টেসি: হুইয়েন লানপাউ

COMMENTS

WORDPRESS: 0
DISQUS: