অঙাংশিংগী খোরিরোলগী পূক্কৈদা নাওরেম লোকেশ্বর সিংহগী “তোমথিন অমসুং খুজি”: মীৎয়েং অমা  

Homeৱারেং

অঙাংশিংগী খোরিরোলগী পূক্কৈদা নাওরেম লোকেশ্বর সিংহগী “তোমথিন অমসুং খুজি”: মীৎয়েং অমা  

  লাইরিক্কী মমিংঃ তোমথিন অমসুং খূজি অইবাঃ নাওরেম লোকেশ্বর সিংহ অফোংবাঃ মনিপুর লিতরেরি সোসাইতি, ইম্ফাল লাইরিক মখলঃ অঙাংগী খোরিরোল

তোংব্রম অমরজিত

 

লাইরিক্কী মমিংঃ তোমথিন অমসুং খূজি

অইবাঃ নাওরেম লোকেশ্বর সিংহ

অফোংবাঃ মনিপুর লিতরেরি সোসাইতি, ইম্ফাল

লাইরিক মখলঃ অঙাংগী খোরিরোল

মমলঃ লুপা ৩০০

লমায় মশিংঃ ১১৩

লাইরিক্কী মখুমঃ সনাতোম্বা মোইরাংথেম

মনিপুরী খোরিরোলদসু থেংলবসু থেংনা অঙাংশিংগী খোরিরোলদা অইবশিংনা পুকনিং চংলক্তুনা মশিং য়াম্না পুথোকপা নত্রবসু খরা ইদুনা ফোঙলক্লিবসি পুকনিং থৌগৎনিংঙাই ওই। মরমদি অঙাংশিংগী খোরিরোলনা মীওইবনা হেক পোকপদগী শিবা ফাওবদা থেংনগদৌরিবা তাইবংগী চৎনবী, থাজনবী, লাইনিং লাইশোল, মহৈ মশিংগী লৌশিং, অফবা ফত্তবা অসিনচিংবা কয়া অসি অঙাং ওইরিঙৈ মতমদা মমা মপানা ইমুং মনুংদা, কৈরোই লৈকাইদা অমদি মহৈ তমফমশিংদা তাকপী তম্বীদুনা মপুং ফাবা মীওই অমা ওইনবা হোৎনরিবনি।

অঙাংগী সাহিত্য হায়বসি ঐখোয়না তরাই তরাই লৌবা য়াদবা মখলগী খোরিরোল অমনি। অদুগা অঙাংশিংনা পাবা য়াবা লাইরিক ইবা হায়বসিসু অরাইবা থবক অমসু নত্তে। হায়রিবা মখলগী খোরিরোলসি হৌজীক্কি মতমদসু য়াম্না মরু ওইনা লৌদবা য়ারক্তে। মতম অমদদি ফুঙ্গা ৱারী লীদুনা মপু মবেলশিংনা মশুশিংবু নুংঙাইরবা চাকঙাই ৱারী কয়া লীবীদুনা অঙাংশিং অদুদা মোরেল লেসন কয়া তাকপী তম্বীরম্মি। মীওইবগা মহৌশাগা লৈনরিবা তৎনা থানবা য়াদ্রবা মরিগী মতাংদা, মালেম তাইবঙপান অসিদা লৈরিবা থৱায় পানবশিংগা মীওইবগা লৈনরিবা মরি; অচৎ-চৎতা লেংলি পাল্লিবা কয়াগী; থা থাৱানমিচাক্কি ৱারী কয়া লীদুনা নুংঙাইরবা তাইবঙ অমদা অঙাংশিংদা ৱারী লিনরম্মি। ঐখোয়গী থায়নদগী চিনবুং সাহিত্যদা লৈরক্লবা নুংঙাইরবা ৱারী কয়া ঙসিদি মতমগী অহোংবা অওনবা কয়াদা তপ্না তপ্না তাখিদবা কয়া য়াওরকলি। অকাওবগী লৈরোন্নুংদা লৈখিবা কয়ানি। তৌইগুম্বশুং মীওইবা খুনাই শেমগৎলকপদা অফবা খোরিরোলগী পোৎথোক্তি য়াম্না মরু ওই। তরানিপাল শুবা চহীচাদা য়ুরোপ্তা ফেরি তেলস্পু অঙাংশিংগী সাহিত্য ওইনা লৌরম্মি। তশেংবসু লাইরিক ওইনা নম্বগী খুদোংচাবা লৈত্রিঙৈদা চিনবুং সাহিত্য ওইনা লৈরম্মি। মতমগী মতুং ইন্না অঙাংশিংনা পাবদা নুংঙাইনবা অয়েকপা লাইশিং য়াওবা ফুঙ্গা ৱারীশিং, নাওশুম ঈশৈ, ঈশৈ-নোংমাইগী ওইবা, কার্তুন য়াওবা অঙাংশিংনা পাবদা নুংঙাইগদৌবা লাইরিক কয়া পুথোকনরকখি। মালেম শিনবা থুংনা ফাওরবা জে কে রোল্লিংগী হেরি পোত্তর অঙাংশিংগীদমক পুথোকখিবা লাইরিক ওইরগসু কোন্নথংদদি অহল্লোনশিংনসু য়াম্না পাম্নখি অমদি হোল্লিৱুডকী মূভি ওইনা পুথোক্তুনা হৌজীকসু মালেম পুম্বদা য়াম্না পাম্নবা ৱারী ওইদুনা লৈরি। লেৱিস কেরোলগী মমিং চৎলবা এলিস এদ্ভেনচরস ইন ৱান্দরলেন্দ ঙসিসু অঙাংশিং অমদি মীপুম খুদিংনা য়াম্না পাম্নদুনা লৈরি। অদুগা রুদয়ার্দ কিপ্লিংগী দি জঙ্গল বুক থোইদোকনা মমিং য়াম্না চৎলি।

মনিপুরী খোরিরোলদসু থেংলবসু থেংনা অঙাংশিংগী খোরিরোলদা অইবশিংনা পুকনিং চংলক্তুনা মশিং য়াম্না পুথোকপা নত্রবসু খরা ইদুনা ফোঙলক্লিবসি পুকনিং থৌগৎনিংঙাই ওই। মরমদি অঙাংশিংগী খোরিরোলনা মীওইবনা হেক পোকপদগী শিবা ফাওবদা থেংনগদৌরিবা তাইবংগী চৎনবী, থাজনবী, লাইনিং লাইশোল, মহৈ মশিংগী লৌশিং, অফবা ফত্তবা অসিনচিংবা কয়া অসি অঙাং ওইরিঙৈ মতমদা মমা মপানা ইমুং মনুংদা, কৈরোই লৈকাইদা অমদি মহৈ তমফমশিংদা তাকপী তম্বীদুনা মপুং ফাবা মীওই অমা ওইনবা হোৎনরিবনি।

অইবা নাওরেম লোকেশ্বর মশাগী ৱারীমচাগী লাইরিক অনী হাণ্ণা ফোঙখিবা লৈরে হন্দক মহাকনা মনিপুরী খোরিরোলদা খুদোল তম্লকলিবা “তোমথিন অমসুং খূজি” অঙাংশিংগী খোরিরোলদা চাওরবা খুদোল অমনি হায়না লৌদবা য়ারোই। লাইরিক অসিদা পুন্না পান্দুপ কুন থোক্তুনা য়াম্না এদ্ভেনচরস ওইবা খুৎইদা অপাবশিংদা নুংঙাইরবা মহাও অমদি পিরি। লাইরিক অসিদা পুন্না অয়েকপা লাই ২২ হাপ্তুনা অঙাংশিংনা পাবদা হেন্না নুংঙাইহল্লি অমদি ৱারী পরিং অসি অসুম লেপ্তনা লোইবা ফাওবা পানিংবা পোকহল্লি। তেন্তক তেন্তকনা ইরিবা পান্দুপ অসিদা পীরিবা মিংথোল পুম্নমক অমগী মথংদা অমা লাকপা পরিং অসি পাবদা য়াম্না নুংঙাইহল্লি। মরু ওইবা শক্তম লাংলিবা তোমথিননা মহাক্কী লূনা তৌজবা হুই, অরাংবীনা নোংমা নুমিদাংৱাই অমা চৎথোকখিবদগী থিবা খঙদদুনা ‘হুই থিবা চৎপা’দগী ৱারী হৌদুনা হেল্লোই তরেৎকি খ্বাই অতোম্বী ইচল থেংনবা, অদুদগী ইচলগী মচে য়াইমগী খূজি মাংখিবদু হুই অমনা চেন্দুনা পুখ্রে হায়না মদুবু খরা থিবীরকনবা তোমথিন্দা অমুক ইচলগী অশংবা মচুগী খূজি য়াই থোকপা পিরকপা। অসোমদা তোমথিনগী মমা মপানা লৈকাইগী মীওইশিংদা মচা থিবা খঙদ্রে হায়দুনা মাইবা মাইবী খোমদুনা পুং ঝাল থিন্দুনা হেল্লোইনা চেনখ্রে হায়দুনা কোইথি থিনখি। তোমথিনদি অসোমদা খুজি য়াই থোকপা পুদুনা লাকখি। অমদি অঙকপা কয়া হেল্লোইগী লমদমদা থেংনরকপা, লৈদগী কুরাক ওনবা থেংনবা; ময়ুমদা হল্লকপা অদুদগী মহাক্কি হুই অরাংবীনা হেল্লোইগী খূজি অদু ময়ুমদা চেন্দুনা পুরক্লমখি। তোমথিন্দা লোত্তুনা থম্লিবা খূজিগী মতিক ময়াই অদু তোমথিনগী মমাগা মপাগানা চাংয়েং তৌরকপা অমদি ইচলনা মী কনা অমদা হায়দোকপা য়াদে করিগুম্বা হায়দোকলুরবদি খুজি অদু মতিক ময়াই মাংখিদুনা মচু মুশিল্লক্তুনা মতেক মতেক তেক্কনি হায়রকখি। মদুমক থোকখি তোমথিন্না মমাদা খূজিগী অরোনবা হায়দোক্লুবদা। তোমথিন য়াম্না ৱাখি মরমদি ইচলগী মফমদা মাংখিবা খুজি অদু ফংবগা পুদুনা লাক্কে হায়খি। খুজি থিনবা চৎপগী লম্বেলদা থেংনবা অঙকপা থৌদোকশিং। মঙ হা-গুম্বা থৌদোক কয়া থেংনবা। মসিদা মাইবী হানুবী অমা থেংনবা; তোমথিননা থেবা ওনবা অদুদগী থেবদগী অমুক মী ওল্লকপা। শন্নাউদগী লৈশাবী ওল্লকপা তাংকক কয়াসিদা অইবনা য়াম্না হৈ-শিংনা ৱারীগী পরিং অসি অমত্তা কায়দনা অমগা অমগা মরি লৈনহন্দুনা লীনবা হোৎনরি। লাইরিক অসিদা অইবনা থায়নদগী চৎনরক্লবা থাজবী অমা ওইরিবা কনাগুম্বা ইমুংগী মীওইশিংনা লংফৈদগী হল্লকপদা শুক ফৈনা কোন্থোংদা থমদুনা মদু কান্দুনা চংলকপগী চৎনবী অদু অয়েকপা লাই হাপ্তুনা তোমথিন হেল্লোইনা চেল্লুরে হায়না খন্নরুরবা মতুংদা ময়ূমদা হল্লকপদা শুক কাল্লগা চংহল্লি। অমত্তা পোকচবা মচা তোমথিন্না মফম খঙদনা মাংখিবদা মমা মপা ওইবশিংনা মচাগীদমক কয়াম ৱাজবা অমদি কৈরোই লৈকাইনা মতেং পাংনবা ফজবা কমম্যুনিতি লাইফ অদুসু ফোঙদোকলি। অঙাংশিংগা য়ুমদা য়োকপা শাশিংগা লৈনরিবা নুংশিরবা মরি কয়াদুসু নীংথিজনা ফোঙদোকলি। ইনে ইবেচা কৌবা মাইবী অদুনা মশুনুপী অমত্তং লৈজবদু লম হেল্লি হায়দুনা মহাক্কী য়াই চেনবা চৈনা কন্দুনা শন্নাউ ওলহনখিবা; অদুগা কোন্না তোমথিন্না মাইবী অদুবুসু থেঙ্গু ওলহনখিবা মতাংদা হনুবীদুনা অশাওবগী নুংশিরবা মশুনুপী অদু শন্নাউ ওলহনখিবদু কোন্না নীংঙমখিদে। মতাং অসিদা অইবনা ঙাইহাক্কী অশাওবনা মীওইবগী পুন্সিদা খুদোংথিবা ক্য়া থোকহল্লি হায়বদু মাইবী হনুবী অদু তোমথিন্না য়াই পুবা চৈদুনা কন্দুনা থেঙ্গু ওল্লগা লৈরবা মতমদা ৱাখল তাহনখি। মমৈথংদা হনুবীদুসু থেঙ্গু ওইরমবদগী মী ওল্লকখি। তোমথিন্না অঙাং ওইবনা ৱাখল খন্থহৌদনা তৌখিবা কয়াদু মাইবী হনুবীদুদা ঙাকপীনবা হায়জখি। ইচলগী খূজিসু লোইশিল্লকপদা তোমথিন্না থিনবা লাক্তুনা লোইশিল্লি। মসিদা অইবনা থায়না থাজনরম্বা হেল্লোইগী তাইবঙপান অদুগী ৱারীদু অঙাংশিংনা পাবদা চুশিন্নবা হায়দুনা য়াম্না চম্না অঙাংশিংগী পূকনিং থম্মোয়দা চংশিন্দুনা ইনবা হোৎনবী মমি তারি। লাইরিক অসিদা য়াওরিবা তোমথিনগী ৱারী অসিনা অপাবশিংদা পীনিংলিবা পাউজেলদি অঙাংশিংনা অহল লমনশিংনা তৌগনু ফত্তে হায়বদা লম হেন্দুনা থবক তৌবদা অৱাবা খুদোংথিবা নংবা, অমদি থবক অমা চৎকদবা লৈবদা য়ুমগী অহল লমনশিংদা হায়দোক্তনা লোন্না চৎলুবদা থেংনবা থৌদোকনা ৱারবা মতমদা হেন্না খুদোংথিবা নংই হায়বনচিংবা পাউজেল কয়া পুদুনা চৎলি।

অয়েকপা লাই কয়াসু য়াওরি অদুবু অইবগী খূৎই অসিদা য়াম্না মরিক চুম্না ইবনা ভিজ্যুএল ইফেক অমসু পীবা ঙম্লি। হৌরক্লিবা তুংগী মীরোলনা অসিগুম্না নুংঙাইরবা লাইরিক কয়া অসি পাবগী হৈনবী অমদি লৈহন্নিংই। হৌজীক লৈরিবা মীরোলনা পাবা নুংঙাইনবা হায়দুনা লাইরিক অসি মনিপুরী (বেঙ্গলি ময়েক) অমসুং মৈতৈ ময়েক অনীমক্তা পাবা ফংহল্লি। মসিগুম্বা মখলগী লাইরিক অসিমক ইংলিস্তা ত্রান্সলেসন তৌবসু য়াম্না কান্নগনি। মরমদি লৈবাক অমা চাওখৎনবা হোৎণবদা ঐখোয়গী হৌরক্লিবা অঙাংশিংগী পুন্সিরোলদা লমদম অসিগী ফজরবা কলচরেল ইঠোস কয়া মতম চানা মতাং চানা তাকপী তম্বীবা তঙাইফদে।

COMMENTS

WORDPRESS: 0
DISQUS: